2010年12月17日 星期五

兩日一夜澳門行 (14.12.2010) 1/3

2010年轉眼又快到尾聲,喺哩個月裡面要清埋今年剩返落嚟嘅大假,所以哩個星期又可以放吓假,本來都想出去玩吓,但又唔知去邊,再加上無咩盤川,所以就只係搵埋我細妹「大笨蛋」過澳門玩咗兩日,行吓食吓嘢啦!


九點就到咗碼頭,諗住係平日,既然早咗到不如就搭早啲嘅船啦!點知之前班船竟然滿晒!咁就唯有照原定時間坐9:30開出嗰班啦!




個幾鐘船,10:45到達澳門碼頭。



一出碼頭就去搵酒店嘅免費穿梭巴士,我哋就跟人潮行咗去碼頭嘅右邊,搵咗好耐都唔見有我要搵嘅巴士,後來工作人員話係碼頭左邊先係,左邊雖然見到好多酒店嘅穿梭巴士停車處,但係都係搵唔到皇都酒店嘅車,再去問吓人,原來皇都酒店嘅穿梭巴士只得一部,所以碼頭無設專用嘅停車處,工作人叫我哋喺馬路中間搵。



喺碼頭呆等咗半個鐘都唔見有車到,等咗咁耐要我自己坐車又唔奮氣。



等呀‧‧‧等呀!最後因為一啖氣就等咗成個鐘啊!



去到酒店都已經12:00嗱!



酒店已經有三十幾年歷史,不過前兩年內部重新裝修過,感覺都好新好靚啊!而家澳門都有好多比較新嘅酒店,喺選酒店時見哩間同利澳酒店都一個恆溫泳池,而利澳酒店比皇都酒店就腳,但利澳酒店內有賭場同夜總會,睇過一啲評語話比較雜,所以最後都係選咗哩間皇都酒店。





辦好手續,放底行李(其實都係一個轆轆袋啫!)就開始去食、食、食嘞!


我哋沿住東望洋斜巷、水坑尾街行大槪三個字就到達板樟堂前地,都幾方便啊!


玫瑰聖母堂(St. Dominic's Church)



喺教堂旁邊有個市政綜合大樓,我哋嘅目標係喺哩座大樓嘅三樓熟食中心。




哩間檔口相信好多人都識啊!




$28一碟淨牛什,份量唔算太多,不過味道就唔錯,雖然戒緊口,但都忍唔住食咗少少啊!



跟住就係哩到嘅瓦煲咖啡



$7細細杯,個人覺得味道一般,缺點係唔夠熱,而且檔口負責人態度頗囂張。



下一站就沿住新馬路去福隆新街。經過議事亭前地,哩到佈飾咗好多聖誕燈飾,夜晚著晒燈一定會好靚啊!




啲公仔都得意啊!





話咁快又到咗福隆新街,好耐之前哩到係一條花街柳巷,而家就演變成一條食街嗱!星期六、日哩到都會擠滿遊人,聽講就算平日某啲食店都仍然會出現長龍,但我哋入到哩見到條街水靜河飛,心知不妙啊!



果然不出所料,我哋想去哩間傳聞中嘅舖頭竟然拉晒閘。



重要係休息兩日,想第二日嚟都唔得啊!



咁無辦法啦!影吓相之後就返出新馬路向另一方向進發 ─ 豆腐花。見到哩間屋掛滿紅燈籠覺得得意外,亦係一個記號呀!因為見到就要轉入哩條庇山耶街。




行一個街口就會見到新埗頭街,向前行十多個舖位就會見到順德行李康記豆腐花嗱!






哩都啲豆腐花係加花奶,如果好似大笨蛋咁唔食花奶要講明先啊!



$5.5一碗!好滑、好好味呀!如果唔係諗住跟住重要食嘢,真想食多碗呀!



食完豆腐花就行返出新馬路搭車去返外港碼頭轉免費穿梭巴士去威利斯人。


                     


                                                                                               

here


                                                                    .........兩日一夜澳門行 (14.12.2010) 2/3


 


 


 


 


3 則留言:

  1. 我剩係記得有一間好似叫義順,
    係食燉奶的.
    [版主回覆12/18/2010 09:23:00]係呀! 我以前都有去咖! 不過而家香港都開咗好多間, 同埋好多人都話佢哋而家啲出品唔係咁得, 所以我今次都無去啊!

    回覆刪除
  2. D牛什好正.......引死我 =.=!
    [版主回覆12/18/2010 09:48:00]! 真係好正咖! 不過我都唔敢食咁多, 都係食咗一、兩嚿, 所以我睇住我細妹食都比佢引死呀!

    回覆刪除
  3. 兩日遊寫出多篇網誌,同一天出台,真要待有空時慢慢欣賞了。

    回覆刪除