2011年5月21日 星期六

好想放假去旅行啊!

都好耐無update個blog,主要原因緊係因為四月份去唔成京、阪賞櫻之旅而無心機,另外就係近哩兩個月工作真係十分忙,每晚返到屋企都好似死咗咁唔想郁,一返到去就食飯,跟住立刻沖涼瞓覺,所以都好耐無上網嗱!

而家咩都唔想,淨係想放大假去旅行。由於真係好攰,提唔起勁去搵資料,同埋到時都唔想用個腦諗嘢,估計今次會跟團,但未落實去邊好。暫時有幾個選擇都好似幾吸引啊!

1. 吉隆坡、浮羅交怡
哩個地方幾年前去過,幾鐘意浮羅交怡嘅環境,所以都好想再哩個地方,同埋可以好relax咁喺酒店hea吓!

2. 沙巴
其實啲活動同浮羅交怡差唔多,不過價錢就平少少囉!

3. 曼谷、七岩、華欣
我啱啱做嘢時儲到錢第一次出國旅行就係泰國,但當年去完之後嘅印象都係麻麻哋,所以咁多年都無再去過,今次見到哩個團嘅價錢比上面兩個平好多,而且重係豪華團添,都係陽光海灘好似幾吸引啊!


大家話去邊到好呢?
Thinking
  不過最緊要都係度吓個假,唔批假就邊到都唔使去呀!



最後假期都係唔批,以上嘅諗頭全部要擱置,到十月中先可以放假呀!

13 則留言:

  1. 適當時候要讓自己休息下架 !!
    [版主回覆05/25/2011 19:47:00]我都好想啊! 不過老細唔批個假呀! 而家要等到十月中先可以放啊!

    回覆刪除
  2. 去這些地方有沒有分季節性呀,不過差不多都是夏天。計劃吓,好呀,去旅行又可义電,有時工作太忙碌,出外走走,relax 吓,回來再做都醒神啲!
    [版主回覆05/25/2011 19:53:00]無啦! 假期泡湯啦! 而家要到十月中先可以放呀! 唉! 當堂無嘢心機呀! 星期六再詳談嗱!

    回覆刪除
  3. 死仕既我 都係重要去日本  哈哈   同埋而家機票好鬼抵丫  ~~~~諗諗佢尼 嘰~~~
    [版主回覆05/25/2011 19:55:00]我直情想即刻飛過去呀! 而家香港快運去東京機票都係千幾蚊咋! ANA去北海道三千幾重包兩晚札幌酒店真係好吸引呀! 但最後我個假唔批, 而家邊到都唔使去啊! 無奈!!

    回覆刪除
  4. Shirley :          好 ~ 休息 , 叉電 , 人都襟玩D架 .  
    Bye Bye !
    [版主回覆05/25/2011 19:57:00]Bad news, 個假唔批, 要延至十月中先可以放啊! 當堂成個人謝晒!

    回覆刪除
  5.  可以嘅 . . . 放假啦  , 一系就邊度都唔去 . . . 真系比自己放假, 連個腦都放埋, 入長州, 上寶蓮寺住幾日  如果想外遊. . . 有無伴? 我就當然選擇日本, 關東唔敢就關西, 最多去沖繩晒隻燒豬番嚟 . . .  比面嘅, 上北海道幫我影多兩張相 . . . 我好掛住佢  不過, 唔一定要跟團呀, 比人當鴨仔都唔會玩得開心 . . . 比自己hea吓啦
    [版主回覆05/25/2011 20:01:00]家陣邊到都唔使去繼續返工, 因為個假唔批, 所以真係咩都唔使諗呀! 

    回覆刪除
  6. 我會選擇沙巴haha....
    [版主回覆05/25/2011 20:03:00]多謝你嘅意見啊! 不過而家十月中先可以放假, 唯有將旅程再閣置, 遲吓先再諗過啦!

    回覆刪除
  7. Yes, confirm the vacations first : )
    [版主回覆05/25/2011 20:04:00]唉! CC, 要十月中先比放假, 而家真係邊到都唔使去啊! 無晒心機嗱!

    回覆刪除
  8. 如果攰到咁的話,去邊度都可以啦,最緊要係有得放假!
    唔,若果未去過沙巴,不如就揀佢啦。
     
    [版主回覆05/25/2011 20:08:00]你講得啱, 只要有假放就去邊到可以啊! 但可惜短期內都唔可以放假住, 所以沙巴要遲啲先可以諗嗱!

    回覆刪除
  9. 唔緊要,十月中真係好快到,而且是今年嘅事,而plan 吓plan 吓也到啦,我覺得時間像飛一般快,同時十月也是不錯時間,秋涼都好舒服!

    回覆刪除
  10. 嘿, 10月中的話睇紅葉 . . . 上立山啦. . . 我10月頭 上  

    回覆刪除
  11. Shirley :          真係一個令人心痛既消息 .  
    算啦 ~ 依家再籌備 , 十月玩鋪勁金既 .  
    Bye Bye !

    回覆刪除
  12. 同你一樣, 我都好想放假去旅行, 但最近工作上實在太忙, 好想好想好想去北海道呀~~~
    [版主回覆06/14/2011 07:27:00]北海道係我至愛, 我都好想去啊!  而家去唔到唯有睇住TVB個北海道節目頂住引先啦!

    回覆刪除
  13. 去住短線先,2日1夜都好呀!記住要Work life balance,小心身體!
    [版主回覆06/30/2011 21:15:00]! 你真係好知我心意呀! 經我死纒之後, 老細終於批咗下星期兩日假比我, 咁加埋星期六、日可以放四日, 但由於放得咁趕, 所以plan唔切, 而家報咗團去沖繩四日呀! 噚日重開咗茶會添呀! 真係好開心呀!  因為真係做得好攰, 雖然今次旅程短短哋, 但真係好期待呀!  好多謝你嘅關心啊!

    回覆刪除