2008年7月26日 星期六

巴黎、瑞士之夢想自遊行(第十天)

06/07/2008(星期日) 晴時雨  勞特布魯尼(Lauterbrunnen) → 少女峰(Jungfraujoch)


Lauterbrunnen嘅清晨



今朝起身諗住煲蛋做早餐,但點知原來Pantry係八點後先可以開火嫁!好彩我哋有私家煲。



食飽出發啦!



食飽就向少女峰進發啦!上山時天氣都好好啊!我哋有Swiss pass雖然有折,但都要CHF100.00。












我哋由Lauterbrunnen去到Kleine Scheidegg轉另外一間車去Jungfraujoch。




而由Kleine Scheidegg去Jungfraujoch程有三分二係喺個山窿到嫁哩條鐵路係好多好多年前用人手掘出嚟嫁!真係好犀利呀!





中途會有兩個站比我哋落一落車抖一抖去吓洗手間,影吓冰河。




終於上到Top of Europe - Jungfraujoch,初初都驚有咩高山症嫁!好彩大家都冇咩嘢,咁我哋第一個目標係去觀望台先。


但出到觀望台個天色開始變啦!好大冒,隔咗陣重落雪添呀!






阿雷奇冰河


然後我哋出咗戶外行咗陣,但真係又大風又凍,吹埋嚟嗰啲又雨又雪,所以留咗一陣就返入去啦!




跟住就去咗冰宮啊!







行完冰宮就去買吓記念品同去寄明信片。哩個係少女峰嘅印仔啊!





我買紀念品時遇到喺瑞士第一次嘅無禮對待呀!話說我想買幾把刀仔,咁選好之後我咪話比個收銀收錢,佢好悔氣話你放喺到我一陣會收,ok我等佢搞完嘢同我收錢,咁佢用一個紙袋同我袋晒幾把刀入去再比一個大膠袋我,咁我就同佢話我係要嚟送禮唔該可唔可以比幾個細嘅紙袋仔我呀!嗰啲袋仔只係喺佢手邊,但佢唔理我,咁我再唔該多次,佢又好悔氣咁問我要咩!我再第三次咁講多一次,跟住佢劈一個細紙袋比我,我再講多次我係要幾個細紙袋用嚟送禮,佢跟住竟然鬧我:「我已經比咗一個大膠袋同一個紙袋比你,你重想點呀!你究竟重想要啲咩呀」嘩!咩事呀!我想要幾個袋仔姐!冇嘢呀!我咪又再講:「我因為要送比人先問你要幾個紙袋姐!我而家比返晒啲膠袋你我只係要你幾個細紙袋」佢跟住將佢手邊個叠細紙袋成叠咁劈過嚟然後自己喺櫃到攞過叠新,重同隔離個同事妙咀妙舌,我當時真係好嬲呀!我即時當住佢面數返我要嘅數目然後將剩返嗰啲好大力咁劈返比佢囉!我同佢講我只係要我要嘅數我冇攞多你嫁!


嘩!究竟哩啲係咩待客之道?嬲得我呀!


好!我唔想影響我心情,我唔同哩啲人計!為咗平伏我心情,我哋就去開餐


我哋每人都買咗杯咖啡 / 熱朱古力,然後就食自己帶嚟嘅嘢食。好豐富呀!



食食吓聽到好熟嘅語言話:「嘩!離晒譜嫁!一個杯麵加杯朱古力成100蚊,搶錢咩!」我哋自然哋轉頭望,大家一笑香港人,佢哋見我哋將枱咁豐富就讚我哋醒目自己帶上嚟食,我話上網啲人實有講哩到啲嘢好貴嫁喎!佢哋話冇睇啊!





如果比我要喺哩到食咁貴嘅杯麵我會寧願去下面餐廳食個set lunch都係廿幾蚊瑞士法郎,起碼有view有service,喺到食十幾蚊咩都冇真係唔底。


食飽諗住出去展望台,但真係太大風雪啦!出到去都企唔隱都係回程啦!



車站等車



回程時我哋就選擇由格林戴爾華德(Grindelwald)返落山,哩個鎮真係勁多日本人,佢哋大部份會住喺到,而Lauterbrunnen就多韓國人。哩到有間超市竟然星期日都開門,所以裡面都好多人。我哋都喺到入咗貨,咁今晚同明朝都有著落嘞!






嚟到哩到又幾好天啊!不過山上都重好多雲。行咗陣就搭車去Interlaken Ost。





但係因為落到嚟都六點幾,而且今日重係星期日所以好多舖頭都收咗工或者係休息。我哋行咗陣見個天想落雨,於是決定打道回府。




去到車站我哋送車尾呀!重要原來六點後係一個鐘先有一班車返去。唉!即係要等到八點先有車呀!


重落起大雨添!




哩到有啲設施比啲人搵酒店嫁!只要拑上面啱心水嘅酒店,下面地圖會顯示佢嘅位置,然後隔離有個免費電話,你可以打顯示板上嘅號碼就會接到去酒店,咁你就可以訂房嫁啦!



八點半返到去,今日要由大房搬去三人房。環境緊係好咗啦!有自己嗰層嘅廚房同浴室,只須要同返自己嗰層啲人share,唔會好似地下個廚房咁多人。


重有個露台仔開餐添呀!



B女又搞掂今晚哩餐嘞!





食飽又沖涼瞓覺啦!


我覺得住Hostel有樣嘢真係唔係幾慣嘅係每次入住時都要入床單被袋同枕頭袋,而退房時又要抆返晒出嚟先連鎖匙一齊退還。



]


一輪功夫之後先可以安睡。



: 少女峰飲品: 咖啡2杯: CHF7.80 (CHF3.90 x 2)


                熱朱古力: CHF3.90


    香蕉3隻:CHF2.70


    啤梨3個:CHF3.30


    Supermarket: CHF35.80



: LauterbrunnenàJungfraujoch來回: CHF300.00 (CHF100.00 x 3)


手信: CHF75.00


        Postcard : CHF1.00 x 3


: CHF90 (CHF30.00 x 3)



10 則留言:

  1. 你好,我在八月四日也會出發去瑞士旅行!
    我想問問現在上雪山的衣著應怎樣?不著羽絨可以嗎?
    是否著水鞋會較防滑?
    謝!
    P.S.你的相片影得很靚呀!
    [版主回覆07/27/2008 09:19:00]我冇著羽絨但我媽咪就有 ,裡面我著咗一件薄冷衫同一條雪褲, 因為諗住坐雪兜唔使濕晒條褲,但天氣唔好冇玩到,同埋我哋都袋咗個暖包囉!不過冰宮裡面就真係好凍而且地下好滑,至於水鞋我未著過唔知會唔會防滑,我著波鞋就好慢好慢咁吓,我媽咪就喺波鞋下面加咗個防滑底(有幾粒小釘)都ok嫁!

    佢上次去北海道時喺旅行社茶會買嫁好以幾十蚊,我諗運動舖都有得買.
    多謝讚賞,基本上喺瑞士你就咁攞起相機映都全部好似postcard咁,你到時都得嫁!
     
     

    回覆刪除
  2. 我即時當住佢面數返我要嘅數目然後將剩返嗰啲好大力咁 劈返比佢囉!我同佢講我只係要我要嘅數我冇攞多你嫁!<- 做得好!! 話晒旅遊區, 呢d咁o既待客之道真係不知所謂!

    呢間都唔係好野! 上次我阿嫂買杯麵對快子一開就爛, 咪叫佢換囉, 點知佢做個好襪視的表情, 要後再做個要$的手勢  呢d咁o既店, 應該大家blacklist佢等佢執節笠!
    [版主回覆07/27/2008 11:05:00]我發覺佢哋都係有歧視嫁!佢哋對啲日本人一樣係咁差嫁!

    回覆刪除
  3. 有私家露台! "飯他食"!!! 有B女妳地三餐都唔使憂啦!
    仲有妳地帶埋私家煲, 醒!
    [版主回覆07/27/2008 11:10:00]係呀!我哋負責行程,佢負責我哋飲食,每次入去supermarket都係由佢發板嫁! 不過我哋都有幫手拾頭拾尾嫁!
    開頭諗住個煲喺巴黎用,因為酒店冇廚房,但原來瑞士啲hostel大部份都有煮食時間,我哋又早喎!所以我哋個煲都用得著.

    回覆刪除
  4. 謝謝!你的回覆很詳盡呀!
    你著一件薄冷衫都足夠?
    不過我問過瑞士旅遊局,佢地話天氣好時上雪山,著短袖都得tim!好似又誇得滯!
    [版主回覆07/30/2008 07:34:00]係呀天氣好有太陽真係唔凍嫁 ! 我以前都試過呀一件 t-shirt 都 ok, 但如果好似今次咁天氣唔好就會凍囉 ! 我講漏咗 , 我冇著 羽絨但我有著一件隔綿褸嫁 !
    其實唔使太擔心嫁,如果天氣唔好你都只會喺室外留一陣,你凍咪返入室內抖吓暖吓再出去囉!

    回覆刪除
  5. 我記得少女峰嘅山洞好凍喎, 不過出咗雪地就唔凍喇, 因為我地去果日好好太陽, 晒到好熱添, 我仲記得我攞咗人地留低嘅黑色大膠代來滑雪, 坐喺上面滑落來, 好好玩o架
    [版主回覆08/08/2008 21:18:00]我開頭都諗住坐吓雪兜嫁!但天氣越嚟越差,又大風大凍所以放棄咗囉!

    回覆刪除
  6. 請問記唔記得上少女峰o個程火車原價幾錢 ?謝謝
    [版主回覆04/15/2009 07:39:00]因為我哋有Swiss Pass,所以由Lauterbrunne去到Wengen都唔使錢(即係Swiss Pass比咗), 而由Wengen去到少女峰就係CHF100.00一個人囉! 但如果有Swiss Pass就要CHF161.40一個人啊!
    你可以click去SBB個website到check時間同價錢咖! http://www.sbb.ch/en/

    回覆刪除
  7. 謝謝你哦....^_^ 我要跟你學野至真!! 嘻嘻......我依家勁頭痛, 得八日o係瑞士, 度度都好吸引, 都唔知去邊好! 睇完你個blog, 勁想去 lauterbrunnen , 住valley hostel! 哈哈! 不如你教下我邊編行程吖, 我會巴黎入, zurich出! total: 8日, 但我唔想日日都搭火車拾行李 (好似跟團咁 ><) 謝謝你先....
    [版主回覆04/15/2009 22:09:00]其實我都係喺Paris入,Zurich走咖! 而我喺瑞士就九,所以同你都差唔多啊!
    我自己就勁鐘意策馬特(Zermatt), 但少女峰又好值得去啊! 其實瑞士好多地方都好正, 比我再去, 去咗十幾日都唔覺多呀! 但你就一定要行吓山囉! 啲風景真係好靚啊! 如果你真係要book Valley Hostel就真係要早啲呀! 因為佢哋嗰到真係勁full咖!
     

    回覆刪除
  8.  係呢, 你介唔介意話我知你地呢個trip用左幾錢 ? 我依家粗略估計淨機票 + 交通費都已經10000蚊,仲未計住同食呢....>< 真係估唔到瑞士呢個咁細既國家, d交通費咁貴!!
    [版主回覆04/16/2009 08:10:00]係呀!瑞士消費真係幾高啊! 我去嗰陣eur對12.5,chf對7.5呀! 但如果swiss計得好用個swiss pass真係慳返好多, 我哋只係頭尾嗰日個pass包唔到,其他就可以用盡個pass咁就唔會覺得太貴咖啦! 因為佢哋啲鐡路真係值收唔多啊!  好似我哋淨係最尾嗰日嘅車程都已經歸本啦!
    我哋4日paris8日swiss(3人計)喺當地用咗:
    食: EUR124.11 / CHF276.55
    住: EUR440.00 / CHF1,098.60
    行: EUR147.90 / CHF647.30
    另外每人機票HKD7,563.00, Swiss pass:HKD1,893.00, 保險:HKD170.00
    如果咁樣計落去而唔包買手信, 我哋每人用咗HKD19,484.53喺哩個旅程上啊! 我每個遊記下面都有mark底每日使費, 如果你想再仔細啲可以參考吓, 咁可以有個concept有槪要遇幾多錢囉!

    回覆刪除
  9. mm....好詳細呀! 多謝你呀...咁你記唔記得paris去geneve o個程幾錢呀 ?
    [版主回覆04/16/2009 09:47:00]哈..!哩程好搞笑, 我哋係上網book咖! 人哋話網上價係海鮮價越早book越平,我check過心目中係三十幾四十蚊EUR搭9:00嗰班車,咁到同partner一齊上網book時,竟然淨返最平EUR60重要搭7:00嗰班, 到最後confirm先醒起我哋入咗3個人,所以EUR60係for3個人, 即係每人只須EUR20, 真係底到爛呀! 因為我有個同事之前喺巴黎出trip,佢自己去車站買車票過swiss要千幾蚊港幣呀!
    你可以去哩個website check到timetable同價錢 http://www.tgv.com/EN/
     

    回覆刪除
  10. 請問你點樣book tgv 張飛呀 ? print out e ticket ? post 俾你 ??
    [版主回覆04/17/2009 12:46:00]我係選擇寄張車票過嚟咖! 但會有寄失嘅風險囉! 如果選e-ticket就只須要print出嚟到時上車比佢check就得咖啦!
    哩個人都得好詳細,我都係跟住佢做咖!
    http://dorcas.pixnet.net/blog/post/5995131

    回覆刪除