2008年7月19日 星期六

巴黎、瑞士之夢想自遊行(第三天)

29/06/2008(星期日) 天晴    巴黎


今日瞓醒精神晒!食個豐富早餐就出發正式展開我哋巴黎嘅旅程



第一站係蒙馬特嘅聖心堂。我哋plan好喺St-Michel(4號線)坐到Rochechouart轉2號線去Anvers,好順利咁上咗車。






要拉手制先可以上車同落車,個手柄都幾實,要好大力先拉得郁。


咁傾吓講吓,突然有個講廣東話嘅女士問我哋邊到嚟,佢都係香港過嚟嫁!咗十幾年啦喎!咁講講吓我哋話轉車,佢之前聽到我哋話去聖心堂,佢話唔使轉,一直坐到去Chateau Rouge先落車一樣到,原來佢附近住嫁!咁今次佢咁實牙實齒就信佢啦!出咗地面佢叫我哋往上行就得啦!其實嗰附近好多條路都到!因為聖心堂喺山上,而四周圍啲路圍繞住佢,總知條條上山嘅都可以上到去。


上完斜路再行樓梯終於到啦!



日日睇人哋啲相,今日終於自己嚟到啦!唔知係咪星期日呢!哩到真係好多人啊!




聖堂內係唔准影相,我偷偷影咗幾張,不過因為好緊張所以手鎮咗呀!


 



今日唔知咩日子呢!哩到有大彌撒啊!重有好多神父喺聖堂門口做儀式,其中一個應該係主教負責用權杖搞門。



今日好多人做街頭表演啊!




哩到可以望晒成個巴黎嫁



然後就行過去特爾特廣場,啲畫真係好靚嫁



哩條街好多紀念品買,原來哩區啲價錢都算平嫁啦!我哋之後行去其他地方都貴過哩到。




之後我哋就行兩個地鐵站去紅磨坊嘞!哩到係紅燈區,我諗夜晚哩頭都幾雜。到此一遊之後我哋就去夏瑤宮嘞!搭地鐵前我哋見到有間麥記,於是我哋走入去睇吓有冇洗手間囉!有嫁有嫁!係唔使錢嫁!之後我哋喺巴黎都係入去麥記同QUICK嘅洗手間。



因為我哋之前都跟過旅行團上過鐵塔所以今次我哋就用遠距離去睇巴黎鐵塔啊!



影完相就坐底抖陣食吓嘢然後就去羅浮宮。


去羅浮宮目的並唔係要入去睇咩夢羅麗沙,我哋三個啲藝術細胞加埋都係零。因為我哋報咗個去聖米切爾修道院嘅團,明朝七點要去到旅行社集合,所以今日去探定條路點行,間旅行社係喺羅浮宮附近嫁!







搵到旅行社又計好明日出發路線之後,我哋而家想坐遊覽船,問咗旅行社啲人佢叫我哋向塞納河方向行就搵到嫁啦!



咁我哋又行啦!經過協和廣場,見到塞納河旁有個碼頭咪落去問吓啦!但係話只係賣one day pass,但當時已經四點幾五點,買one day pass唔底,所以我哋想買round trip,但如果要買一個round trip票就再行落啲啦!


咁又繼續行行重行行,一邊行一邊欣賞吓塞納河,沿途每個站都去問吓,每個站都叫我哋行落啲,最後嗰個就寫咗個地方名係Pont de L'afma。



咁又繼續行,當過咗亞歷山大三世橋後又見到一個碼頭但又咩都冇寫,都唔似之前嗰啲觀光船碼頭,見啲人行去買完票就上船,咁咪去問吓啦!原來哩到係另外一間公司,佢就專做round trip嘅船河,每次個半鐘,之前嗰間買個one day pass就可以喺佢指定嘅八個站自由上落。




咁我哋就買票坐6:30開出個班船,哩隻船好大,好多旅行團都係坐哩隻船



由亞歷山大橋經過鐵塔、聖母院、好多名勝到巴黎自由神象就返轉頭










差唔多八點返上岸,咁我哋就搭地鐵返去啦!落到地鐵站Invalides發覺喺哩個站可以搭RER都可以返到去重只係兩個站唔使轉車,咁咪又試吓囉!係兩層火車嚟!



果然好快返到去,好彩搭到間快車,因為返到去已經八點幾,超市要姍門啦!我哋啱啱入到去但裡面啲工作人員開始趕人走啦!大部份地方都攔住唔比人行,我哋嗱嗱聲選咗個菜同啲生果重有幾枝水就走啦!收錢嗰個重黑口黑面好似我哋阻住收工咁!


返到去煮麵同煮菜




好豐富啊!食飽飽又沖涼瞓覺,明日要早起身去呀!


: Supermarket:€7.15


       (生菜: €1.50


        蘋果0.595kgs: €1.90


        香蕉0.64kgs: €1.15


        Evian(5L)4: €2.60)


: Boat Trip:€10.00x3


    10 Carnet: €11.10


其他: Toilet: €1.00


: €110.00


手信: €29.50


7 則留言:

  1. 嘩!很快已寫了幾篇文章,內容很詳細,很多細微的地方也記得起 ,所以才稱得上遊記。
    自遊行真開心呀。
     
    [版主回覆07/20/2008 00:38:00]因為我想過咗好耐自己睇返都可以細細回味,所以就長氣啲囉!

    回覆刪除
  2. 收錢嗰個重黑口黑面好似我哋阻住收工咁! <- 呢d咪係歐洲人的服務態度囉!!!
    地鐵同d街都好臭, 意大利一鬼樣...
    [版主回覆07/21/2008 20:40:00]如果係香港實比人complaint到暈呀! 我唔明點解一個國際大城市可以咁樣,重被冠為浪漫花都,真係......

    回覆刪除
  3. 我傍晚到聖心影夜景, D 黑人多到人驚, 有無見人玩紅繩屈錢
    [版主回覆08/01/2008 21:24:00]都有呀!但可能我係星期日朝早去有好多人,變咗目標太多,只有一個行埋嚟,見我哋唔睬佢,佢都自己走開.

    回覆刪除
  4. 原來巴黎比想像中靚 ! 我怕我會愛上佢, 但係又去唔到就慘囉......
    [版主回覆08/06/2008 08:35:00]你睇真啲就未必會愛佢嫁啦!

    回覆刪除
  5. 巴黎真係好浪漫............上次跟團去,玩得唔夠喉,所以想自遊行淨玩paris,唔知治安好唔好?
    [版主回覆08/06/2008 08:34:00]我同你嘅情況一樣,因為好多年前跟團去過巴黎冇咩時間,所以今次再去,地方建築物喺好靚,好值得去,但當多咗時間接觸哩個地方後我唔敢再話浪漫花都囉!佢真係好多地方同啲人都一塗糊塗,亂七八糟,所以要有心理準備就唔會咁失望呀!

    回覆刪除
  6. 我都試過坐船遊塞納河呀, 不過係睇夜景.
    你地自己帶電爐同埋煲去煮野食?
    [版主回覆08/08/2008 20:56:00]我之前跟團去都係夜晚坐嫁!不過當時倦得制又涷所以瞓咗!今日咪諗住日光日白睇清楚啲囉!
    係呀!我哋帶咗兩個電煲去呀!諗住可以自己煮吓麵唔使餐餐出去食咁貴吖嘛!我哋重煲吓涼茶,花萁芯呀!無咁熱氣啊!

    回覆刪除
  7. hey, quick 都係快餐店黎呀 ? 係咪個個麥當當都唔駛錢去toilet呀 ? 可唔可以講我知大約o係邊到 ? 咁商場toilet駛唔駛錢呀 ? (我見paris好多商場喎) ^_^ 謝謝你哦....
    [版主回覆05/14/2009 13:09:00]係呀! QUICK都係類似麥當當嘅快餐店嚟咖! 以我所見大多麥當當都唔使錢可以去TOILET,佢哋門口有個密碼鎖, 只要你買咗嘢食, 收條上就會提供個password,但因為toilet通常都有人出入,所以只要喺門口等就唔使買嘢都可以入去啊! 尤其遊客區跟本就自出自入(e.g. 紅磨坊, 香謝麗舍大道都有mc咖)
    而商場我哋只係去過老佛爺同埋春天, 嗰到好多層都有toilet,所以唔使擔心啊!

    回覆刪除