17/08/2008 晴天 香港 → 深圳
今日約咗我啲老表、亞姨一行十幾人一齊去咗深圳半日，我今次上去嘅目的係想去書城，因為好多人都話嗰到幾好所以想去睇吓！但又基於我之前去過羅湖城嗰頭覺得好亂，所以一直都唔感自己上去，今次遇啱亞姨佢哋上去揼骨，就順理成章跟埋上去嘞！
我哋坐火車喺落馬洲過關，因為哩邊人少啲過關舒服啲，而且由落馬洲去書城唔使轉車同埋近啲啊！
火車站一出就已經係皇崗關口啦！
哩條通道好舒服好好行，同羅湖嗰邊真係天淵之別。
左邊係香港
右邊係大陸
一過咗關就已經可以直接落去地鐵站
車票係一個膠嘅coin，由福田口岸站去少年宮站要三蚊人民弊
只須要搭四個站就到啦！幾方便！
車廂內全用白色，感覺到幾方便整潔。
到咗啦！
一出站行幾分鐘就可以到書城啦！
書城裡面都有好多食市嫁！
開始行之前去味千拉麵食個晏仔先！價錢比香港平一半有多，而且重多選擇好多。
地方真係好大啊！足足行咗幾個鐘呀！但係如果有心去攞書的話就嘛嘛哋！因為佢設計攞位有啲問題，同類型嘅書可以放喺兩個唔同區域，一左一右真係行餐你死呀！但價錢真係好平啊！
最後二百蚊唔使買咗七本書啊！
然後同其人喺福田站集合去小肥羊打邊爐啊！哩間小肥羊好多人嫁！六點幾門口已然排晒長龍，好彩表哥醒目，早一日已經喺香港打電話上嚟book訂位。
一人一鍋，個湯底好多藥材料，不過都幾燥。
好好味啊！食飽飽九點就回程返香港啦！
小肥羊平均消費如何?
回覆刪除[版主回覆08/20/2008 21:33:00]我哋十二人book咗間房, 房要最低消費800蚊,而我哋就食咗千一蚊,食咗勁多嘢呀!我表哥重飲咗兩枝紅酒添啊! 都幾底啊!
乜真係咁方便, 我都搵日走去睇下先.
回覆刪除[版主回覆08/20/2008 21:35:00]我都覺得幾方便呀!而且重幾安全添!冇喺羅湖嗰邊咁驚呀!
係, 我都覺得落馬洲過去都幾好, 又唔屎同人迫, 又可以坐到去尾站...
回覆刪除[版主回覆08/21/2008 21:09:00]係啊...係啊! 又唔多人, 真係唔錯!
我幾年前去過羅湖商業城同埋東門, 去時覺得冇乜野, 返到香港睇新聞先知我地走果日, 有個香港男仔喺東門俾人搶野, 仲俾人插咗一刀 , 自此我就冇返過大陸喇! 好驚呀!
回覆刪除[版主回覆08/21/2008 21:07:00]所以我好少返上去嫁! 因為佢哋啲治安實在太差啊! 但今次就有啲改觀囉!
好介紹 , 音符 得閒又去吓先
回覆刪除我都想去書城買書。
回覆刪除[版主回覆09/16/2008 07:39:00]去啦! 真係好方便, 又幾好行啊!
我瀏覽了好幾個妳的網誌,看見一張張的旅遊照,真的很想很想又去旅行....看見一些去過的地方,好想再去,e.g北海道和歐洲; 未去過的,好羡慕,e.g京都大阪.
回覆刪除[版主回覆10/27/2008 07:19:00]去旅行真係一大樂事, 我一年最多去一至兩次旅行, 但個心就一年365日都去咗旅行,哈..哈!
唔使羡慕啊! 想去就一於plan下次去啦!
我都鐘意上深圳買書. 不過多數經羅湖過關, 去購書中心睇. 福田站小肥羊近唔近地鐵站嫁? 可以點行呢?
回覆刪除[版主回覆11/01/2008 15:27:00]深圳購書中心喺邊o架? 難唔難去嫁?
褔田小肥羊就係喺地鐵站對面咋! 個地鐵出口係喺個商場裡面架, 好易搵o架!
購書中心好易去嫁. 響科學館站出轉個彎就到. 褔田小肥羊響邊個地鐵站對面嫁?
回覆刪除[版主回覆11/01/2008 19:35:00]係喺褔民地鐵站, 但唔記得係A定係B出口嘞!