141209 ~ 181209 嘔吐獅子魚

由14號打完化療針後嘅半夜開始就化身成一條新加坡名勝「嘔吐獅子魚」嘞！

無論食咩落肚都全不保留咁嘔返晒出嚟，就算飲啖水落去都要嘔返出嚟！除咗覺得辛苦之外，當時真係感到有啲氣餒啊！但眼見B女媽咪重冇放棄過咁不斷煮啲可以容易入口，又有營養嘅食物，又諗方法慶住啲嘢等我半夜三更爬起身想食嘅時候都有得食，嗰份心機真係令我好感動同唔安落，咁大個人重要佢咁擔心，所以同自己講點辛苦都要捱，點樣嘔都要食落去，至多再嘔過啫！有咩大不了吖！

好彩我重有個強項係瞓覺，以前遇到有咩唔開心、唔想諗我就會去瞓覺，所以今次我都一樣呀！嘔到倦覺得好辛苦就去瞓，瞓咗當冇事發生，終於捱到今日總算食嘢落去都唔再嘔啦！

今日中午公司人事部重搵人送咗個生果籃嚟屋企，佢哋話哩啲係員工福利喎！我做咗咁耐都唔知有哩啲福利啊！

嘩！裡面好多生果啊！

重有我最鐘意嘅士多啤利呀！我一口氣食咗八粒士多啤利，真係又香又甜呀！

好耐未試過今日咁食咗咁多嘢呀！原來食嘢可以好滋味咖！

頭髮喺第一針化療藥副作用下都開始一束束咁甩出嚟，而家頭皮都會因為頭髮脫落而痛，所以見有返啲精神就去髮廊將三千煩惱絲一次過剃去。