2009年12月8日 星期二

化療前準備


自從28/11/2009出院後好似一直到忙個不停,每日嘅行程都排得密密。



出院第一件事去做係攞私家醫生嘅轉介信到政府醫院排期做化療、電療療程。好好彩只須兩日已經可以約見醫生,當醫生評估咗我嘅狀況後,決定須要用四個月時間打六枝化療針,及兩至兩個半月做電療,完成咗哩兩項療程後,就口服五年嘅荷爾蒙藥。如果14/12/2009覆診身體冇特別問題的話,當日就可以打第一枝化療針啦!


醫院有個資源中心幫我哋哩啲新症嘅人,佢哋開咗好多癌症嘅專題講座,講解一吓我哋做治療前後要注意嘅事項,平時嘅飲食、作息留意嘅嘢。約時間聽咗幾個講座,真係幾有幫助啊!


講座中重免費派好多好有用嘅資料比我哋閱讀。



除咗上面啲書仔,重送咗兩包奶粉,哩隻奶粉話可以喺化療期間幫助提升白血球嘅數量,不過要成HK$50一包啊! 好似貴咗啲啊!



除咗去見政府醫院醫生外,亦要到隔幾天到私家醫生處覆診,跟住為咗打好個底令自己打化療時抵抗力好啲,又每三日睇一次中醫,真係好似好忙咁啊!


由於化療後身體會比較差,所以會好長時間唔可以出街,於是就襯住哩個幾星期重可以四周圍走嘅時候,扣除上面見醫生及聽講座嘅時間就不斷咁約親戚、朋友們見面,因為大家對我真係好關心,我真係好多謝大家對我嘅支持啊!


得到癌症後,上網睇咗好多關於哩個病嘅資料,從其中有啲Blog中得知一啲買假髮嘅舖頭,所以今日都上咗去其中一間諗住睇吓!點知一睇就啱啦!


如果係自己頭髮我就一定唔會染髮,但係既然係假就一於試吓自己未試過嘅嘢啦!



帶咗上去都幾自然,唔係好假啫!



萬事駒備,而家只係等下星期一嘅來臨,雖然資料聽同睇咗好多,知道將會做啲咩,但始終未試過,點都係有啲緊張,希望會安然渡過啦!


28 則留言:

  1. 一個乳癌,一個鼻咽癌,現代醫療科技,此乃很濕碎的病症,放開懷抱,當小病是福啦,不要太介懷自己有病在身,就當是傷風感冒好了!食好 D,想法正面 D,萬事皆吉,多點到有樹木,有陽光和海灘的地方,世界實在很美!
    [版主回覆12/08/2009 20:18:00]Yes Sir, 我會照辦咖啦!

    回覆刪除
  2. 要保持心境平和.開朗 , 常常保持微笑 , 天助自助人啊 !!
    努力 , 加油 ! 我期待再次人看到妳的旅行遊記 !!
    [版主回覆12/09/2009 09:50:00]多謝你嘅提點啊! 我諗微笑唔夠勁呀! 要保持大笑會好啲啊!  
    我一定會努力啊! 我重想去好多好多地方玩啊!

    回覆刪除
  3. 現在醫學昌明,不要太擔心!
    [版主回覆12/09/2009 09:52:00]多謝阿威哥啊! 其實我一向都好怕打針啫! 所以有少少緊張囉!

    回覆刪除
  4. Shirley :            我會精神上支持妳 ,    一定要打敗佢 .    
    等睇妳既遊記 . 
    Bye Bye !
    [版主回覆12/09/2009 09:56:00]知道啦 man wai !! 有你嘅支持, 我一定ok啊! 我嘅遊記都要等一輪啦! 不過我期待緊你嘅再闖北海道呀!

    回覆刪除
  5. Impact速癒素在敎協買會平啲,平均為$33.
    還有五味菜湯都是對癌症有幫助的,在一田買會新鮮啲同平啲,$28一包煲一次分三日飲.部分百佳都有得買為$30一包(我覺得唔係好新鮮囉)
    我老公原先叫我明天取Impact比妳試吓,因為個人口味不同,試過OK先好買,因為都幾貴.現見妳有得試~我就取叧一牌子比妳試吓啦.
    [版主回覆12/09/2009 10:02:00]Delia, 真係好多謝你呀! 比咗咁多資料我, 之前我都有聽我個護士朋友講Oral Impact幾好啊! 但因為我唔知我自己到時情況係點, 所以就未買, 咁啱噚日講座中又有送, 所以可以試吓啊! 五味菜湯我都試吓先!
    真係好感激你嘅關心, 我相信你先生亦都好快會康復啊!

    回覆刪除
  6. 默默支持你 ! 加油呀 )))))))
     
    [版主回覆12/09/2009 10:03:00]Thank for your supporting. 我會努力啊!

    回覆刪除
  7. 表姐...妳好勁呀!! 個幾星期做左咁多野! 都話妳呢個病假會好忙架喇!不過妳出街記住戴口罩保護自己呀! 因為近排d病菌好犀利,周街d人都咳咳咳! 妳得閒就多d update個blog喇,等我地可以知道妳既最新進展啦 ^^. 我同媽咪遲d會上妳家探妳呀,到時我地又可以談天說地喇 ^^ 再call妳喇!
    [版主回覆12/09/2009 10:07:00]好似好勁! 其實都唔算係, 唔知點解個人好容易倦, 所以每次只可以安排一至兩個活動, 所以就攤長咗日日去做囉!
    你講得啱, 條街真係好多人咳呀! 尤其搭地鐵嗰陣, 車廂又迫喎! 真係驚驚哋呀! 醫院啲工作人員都有叫我哋最好戴返個口罩啊! 只係我自己好似未習慣, 我以後出街會帶返咖啦!

    回覆刪除
  8. 早日康復
    [版主回覆12/09/2009 10:03:00]Thank you!!

    回覆刪除
  9. 個假髮一d都唔假喎, 幾自然ar : )
    So many people are supporting you ar, keep your open mind to fight for that!
    By the way, how many days sick leave you got?
    [版主回覆12/09/2009 11:16:00]我都驚太假呀! 好彩都睇得吓!
    我知好多人好關心同支持啊! 所以我會努力啊!
    我頭同公司講暫時估計要半年, 但一切要睇個療程係咪順利, 因為關鍵係化療, 雖話三星期一枝針為期四個月, 但如果落針前白血球唔能夠回升到正常狀態就會delay直到可以打到為止, 所以可能剩係哩項療程都唔共四個月啊!  醫生就暫時比假比到出年一月尾, 到時先再續落去囉! 
    唉! 喺哩啲咁嘅時勢, 分分鐘比人炒埋呀!

    回覆刪除
  10. 今早在facebook知道你這個消息,真是很突然。 衷心希望你治療順利,早日康復。
    ps 很期侍再看你的旅遊blog....加油加油!!!!!!!
     
    [版主回覆12/09/2009 14:20:00]唔好講你, 其實我自己都覺得好突然, 但放心, 有咁多人支持, 我一定會好努力咁快啲好返啊! 好多謝你嘅慰問同祝福啊!

    回覆刪除
  11. Shirley, 你要好好照顧自己呀。我一開始知道依一個消息,我都好突然呀,以為你講笑添..... 你一定唔可以放棄嫁,好彩你係一個樂觀嘅人... 你千千萬萬唔可以放棄呀!!!!!!!!!!!!!!!!! 加油加油!!
     
    [版主回覆12/10/2009 07:44:00]! 我都想係講笑啊! 放心啦! 我唔會放棄啊! 有你咁落力同我打氣, 我一定會加盡油努力啊! Thank you!!

    回覆刪除
  12. 你好呀!我是恰巧路過的,見到你能如此勇敢、堅強地面對,真的叫人興奮!雖然素未謀面,但真的很想留言以表支持。希望你往後的日子,無論是順境、逆境,你都不要放棄,一定要像今日般積極去面對人生啊!
    願主祝福你!
    [版主回覆12/10/2009 07:49:00]多謝你嘅祝福啊! 我會記住你嘅說話啊!

    回覆刪除
  13. 我是睇到妳的旅遊誌, 才visit妳的blog, 無意中知道這個消息, 覺得妳非常堅強, 希望妳繼續努力, 戰勝病魔.
    [版主回覆12/10/2009 16:48:00]多謝你嘅到訪, 其實都唔算得上係啲咩堅強, 只係面對現實啫! Anyway好多謝你嘅鼓勵啊!
    你啱啱有咗BB, 都要小心身體啊! 我都為你祝福, 希望你生個肥肥白白、精靈可愛嘅BB啊!

    回覆刪除
  14. 我真係好羨慕你,可以有一個咁樂觀嘅性格...
    [版主回覆12/11/2009 07:10:00]唔使羡慕, 你都可以咖!

    回覆刪除
  15. 你好 !  我是一個乳癌康復者,經歷過手術、化療、電療、標靶治療,到而家兩年了,身體好好啦,只是還有些少後遺症吧 !
    知道你要面對的療程會辛苦,但你一定要堅強啲挨過呀 !
    化療期間會冇精神同胃口的,要休息多啲,試吓飲速癒素,我化療時都迫自己飲佢,補充營養,所以針針都很順利完成。
    祝你療程順利,爲你祈禱
    [版主回覆12/12/2009 09:51:00]好多謝你嘅鼓勵啊! 其實我有嘢心理準備化療將會帶嚟嘅不適, 但未試過點都有啲緊張同擔心囉! 不過我知只要我努力面對, 我一定可以捱得過啊!
    我都祝福你以後都健健康康, 哩啲咁嘅壞朋友以後都遠離你啊!

    回覆刪除
  16. 請努力,加油 ! 我會支持妳
    雨後有晴天,妳一定會戰勝而回.
    請upate 進展
    take care !
    [版主回覆12/12/2009 09:54:00]多謝你啊! 有你哋咁多人支持, 我都知道我一定可以打勝哩場仗啊!
    放心, 我會將我嘅情況update上嚟咖啦! 真好多謝你嘅關心, 我會好快好返啊! 我重要去日本睇櫻花呀!

    回覆刪除
  17. 個假髮好好睇呀! 加油呀! 唔洗驚, 我俾晒成個膽你!!!
    [版主回覆12/12/2009 09:57:00]你都話個假髲ok咁就放心啊! 有你個膽做膽, 咁就真係唔使驚啊!  咁我唔客氣攞去用住先啦!

    回覆刪除
  18. 你好勇敢好樂觀呀!!祝你早日康復!!努力加油!!我會精神上支持你架!!
    [版主回覆12/13/2009 16:17:00]多謝你嘅支持, 我會努力咖啦!

    回覆刪除
  19. 你好,祝福你輕渡難關。
    [版主回覆12/13/2009 16:17:00]Thank you !!

    回覆刪除
  20.  
                               
    祝妳生日快樂!青春美麗!希望妳的不速之客徹底及盡快離開!
    今年生日或者心情較往年不同,但這件事發生後,發現你有很多家人、親友、同事、朋友、 blog 友對你的支持及豉勵,真的為你高興,這麼多人為妳打氣,妳一定勝利,雖然前面路有些險阻,相信一定成功!
    衷心祝福你 。
     
    [版主回覆12/13/2009 16:21:00]今年嘅生日真係比較特別, 淨係食生日飯都食咗個幾星期呀!  
    其實所為慶祝都係為咗幫我打氣, 送上一份關心同慰問啊! 真係令我好感動!
    我今年嘅生日願望係所有人都身體健康, 快快樂樂, 哩啲嘢真係有錢都買唔到啊!
    好多謝你嘅祝福啊!

    回覆刪除
  21. Shirley :           咦 ~ 聽講生日喎 ,    送埋生日蛋糕俾妳 , 算係咁掛 .               
    祝妳 : 生日快樂 , 早日痊癒 , 身體健康 !!   
     

     
    仲有 : 聽日就係 12月14日 , 祝埋妳事事順利 .  
    Bye Bye !
     
    [版主回覆12/14/2009 08:53:00]哈..哈! 真係好鬼感動啊! 係呀! 我13號生日,醫生尊登等我過埋生日先做治療呀!  (我自己諗咖咋!!)
    真係好多謝你呀 man wai!

    回覆刪除
  22. 日本睇櫻花 ! 我下年都會去, 還有七月董衣草,八月太陽花,十月紅葉,年年都要去,實在太好了.
    看來下年櫻花對妳特別有意義,因為櫻花出現時就是妳完全康服的時候,對嗎.
    祝生日快樂!
         身体健康!
         所有願望成真!
     
    [版主回覆12/14/2009 08:51:00]多謝你呀Thomas!! 出年就應該趕唔切啦! 後年(2011)希望可以啦! 好似好遙遠咁呀!
    好多謝你嘅祝福啊!

    回覆刪除
  23. Shirley,
    雖說遲了些link妳,都給妳點支持。以妳樂天的性格,很快就會康復的。
    遲些公司見吧。
    [版主回覆12/14/2009 21:08:00]Joe,一啲都唔遲啊! 睇到你嘅留言好似打咗枝強心針咁呀! 真係好多謝你啲嘅支持啊!  今日打咗第一個療程,除咗有啲倦暫時冇咩特別反應。
    我都希望快啲好返可以返公司見你哋啊!

    回覆刪除
  24. 祝你早日康復,加油!
    [版主回覆12/14/2009 21:09:00]Thank you!!

    回覆刪除
  25. Impact速癒素 係醫院既復康店都有 $500/盒 (15包),比起街買平好多! 奶粉都係!

    回覆刪除
  26. 你好!我有個親戚都因為化療後脫髲想買假髮,可否告訴我地址,謝謝!
    [版主回覆07/15/2010 08:59:00]我喺嘉雯仿真髮到買咖! 旺角雅蘭中心11樓1113室, 電話: 2789 4894, 佢平日十二點至七點, 假日好似開下午, 但你最好打個電話問吓佢有冇人先, 因為佢哋係兩夫婦開, 如果冇特別佢哋可能會晏開, 我試過等到一點幾佢哋先開。
    希望你親戚早日康復啊!

    回覆刪除
  27. 我亦是乳癌患者,先要做化療才做手術。而家幾擔心,我會睇住你個blog,希望你俾D意見,更重要係迅速痊癒。
     
    Irene
    ireneymlee@yahoo.com.hk

    回覆刪除