2009年8月6日 星期四

北海道仲夏賞花の旅 (第五日-Part 1)

30/07/2009  晴天 

    定山溪 à 藻岩山à 札幌


(Part 1)


話說噚日check in時,個職員問我係咪自己揸車嚟,我話只係搭巴士,咁佢話如果係咁今日我哋走嘅時候可以坐酒店提供嘅免費巴士返去札幌,咁就緊係好啦!又可以慳返啲車錢,重可以慳返啲時間,因為公共巴士要站站停吖嘛!


咁一早起身浸完溫泉就去食早餐,之後重有啲時間四周圍行一陣添喎!



又搵多幾隻河童呀!







哩到有部自動售賣機賣印有河童嘅毛巾咖!¥200一條,我同大笨蛋一心諗住扭多幾條做記念,點知扭晒都係得三條咋!部機重唔知點解冇毛巾跌出嚟返而跌返¥200比我哋,真奇怪,所以我哋最後係用咗¥400就扭咗三條毛巾啦!



啲水好夠熱,好舒服呀!



哩到係定山溪案內所,有齊晒地圖同住宿資料咖!如果搵唔到住宿,哩到可以幫你搵咖!裡面職員識講英文同埋好鬼熱情咖!我都係好驚啲太熱情嘅對待,都唔知點應付好,可能自己唔係一個熱情嘅人啦!咁樣硬係周身唔聚財呀!




好啦!夠鐘返去搭車啦!


大部份工作人員都出嚟歡送我哋呀!




十個字到就返到札幌啦!快過搭巴士半個鐘呀!



嘩!今日幾好天!真係好曬呀!




我哋由JR車站行去西四丁目(近大通車駅),搭札幌市電



由西四丁目搭9個站去到ロープウェイ入口(Rope Railway)落車



間車外型好似香港嘅叮叮呀!



途中有個婆婆喺對面座位走嚟我面前,同我講咗堆日文,我估佢想問我哋去邊,於是我比我個schedule佢睇,啲字太細佢睇唔到,但佢都重不斷咁同我講嘢,我終於搵到個地圖指個站比佢睇,佢一見到就走去車頭推開啲人然後喺個車頭個袋到攞咗三張couple比我哋,原來只要搭札幌市電去藻岩山,喺車到攞張couple,落車時比司機喺couple上打個洞,咁一陣坐覽車可慳返¥200咖


婆婆真係好人呀!佢重要臨落車時提我哋下個站要落車啦!真係好感人啊!




落咗車都有好清楚嘅指示板教我哋行去覽車站





見到哩個牌又要轉上斜路啦!



到啦...到啦!





就係因為多得婆婆,原本¥1,100嘅票而家900就得啦!



哩隻係藻岩山嘅吉祥物呀!幾 cute!



啱啱好可以上車啦!




當覽車一開,真係嘩一聲叫咗出嚟呀!好靚呀!真係好靚呀!



藍天白雲,真係好靚呀!



見到 JR TOWER(兩節玉色嗰座) 呀!但係札幌塔就比啲大廈姐咗啊!



搭完覽車重要搭多程小巴先可以去到展望台啊!




藻岩山展望台



我日日都有上網睇哩到嘅風咖!但都係自己親眼睇靚好多啊!其實哩到係出名睇夜景咖!但我覺得日頭睇景會比夜晚好啊!




睇完嘢都係記念品店逗留咗好耐先走,大家都有收穫呀!



                                                                                                              .....續


8 則留言:

  1.  
    他們迎著太陽歡送妳們,是真誠服務;小子在絲綢之路的酒泉酒店也曾遇上這樣招呼,還拿著熱水瓶要為我們添熱水才上路,至今難忘。
    [版主回覆08/08/2009 11:53:00]係呀!當時真係好曬咖!佢哋重企咗成兩三個字駕車先開, 真係好有誠意呀! 令人留下深刻印象呀!

    回覆刪除
  2. Shirley :         我果條 "定山溪" 毛巾已經用爛咯 ,    行出黎歡送呢招收買人心 , 香港永遠都難達 ,    係呢 ~ 部接送巴士坐得滿唔滿 ?    Wow ~ 真係出路遇貴人呀 , 我去果陣都遇唔到咁有 Heart 既婆婆 ,    夏天黎真係睇多好多野喎 , 我果陣上到山上 , 能見度係零 , 好羨慕妳呀 . 
     

     
    個紀念品中心好多野賣架 , 我隔離餐廳飲支鮮奶 , 正 !
     
    Bye Bye !
     
    今晚睇住咁多先 , 第日再黎過 . 
    [版主回覆08/08/2009 12:00:00]吓!咁快爛咗啦! 我哋想扭多條都冇呀!  間巴士除咗我哋三個就只有一團十幾人嘅日本團, 所以都唔full, 幾好呀!
    係呀!個婆婆真係好好人咖! 唔係佢我都唔知可以咁樣有discount坐覽車, 喺香港真係話鬼知你呀! 所以而家我有時見到啲人擺住地圖頭昴昴, 我都會去問吓佢哋有冇嘢可以幫忙咖! 人哋幫我, 我都要幫返人先得呀!
    藻岩山真係好靚呀! 你唔使羡慕, 咪比會個借口自己下次再去過囉! 冬天同夏天又唔同玩法呀!

    回覆刪除
  3. 我去到日本時, 會俾佢地嘅熱情感染到, 自己都會忽然熱情咗.
    [版主回覆08/11/2009 07:25:00]尤其上咗年幾嗰啲, 真係好鬼好咖! 喺街頭昂昂就會自動走嚟教你路, 唔識講都會用盡佢嘅身體語言嚟幫你, 但有時會熱情都不知所措咖! 好似佢食鐵板牛咁, 成為全店人嘅焦點, 真係唔係好自在咖!

    回覆刪除
  4. 食鐵板牛搞到成為全店人嘅焦點? 佢做過D咩來呀?
    [版主回覆08/11/2009 19:41:00]係呀!因為連個老板都出埋嚟招呼哋, 所以佢哋啲員工都不敢怠慢, 我哋郁一郁佢哋就走嚟服待我哋, 想影張相又走過嚟幫你影, 張掛件衫係椅背又走過嚟幫你, 不斷咁問你啱唔啱食, 夠唔夠飽, 好唔好食, 就因為得到咁嘅待遇, 其他客人就不斷咁望住我哋一舉一動, 咁重唔係成為全店焦點, 不過真係唔係幾自在呀!

    回覆刪除
  5. 唔通佢以為你地係電視台派來嘅? 可能期間好努力咁搵緊個camera喺邊
    [版主回覆08/12/2009 12:51:00]Hmm...有咁嘅可能呀!

    回覆刪除
  6. 我上次去 藻岩山,坐完吊車是坐(吊椅)上觀景台的,腳fling fling很剌激。 點解而家變了坐小巴﹖
    [版主回覆08/21/2009 12:46:00]我之前都係人哋啲blog都見過係坐山兜上去咖! 但係大風啲就暫停, 天氣唔好又暫停, 冬天落大雪就更加會停, 年中都唔知又幾多日係開, 好似今年起(唔記邊到睇過), 為咗安全理由山兜已經係停止使用啦! 所以取而代之係間小巴囉!
    我上到去到見到山兜條纜, 但就冇晒啲椅啦! 真可惜呀!

    回覆刪除
  7. 香港真係好需要d甘有heart的customer services先得.  
    [版主回覆09/01/2009 07:34:00]其實香港都唔錯咖啦! 不過係有一啲害群之馬影響晒囉! 我喺狸小路都遇過一啲黑人憎嘅sales冇禮對待啊!

    回覆刪除
  8. 真係非常羨慕您,個日咁好天氣!!!可遇不可求,有福氣!睇完你的相,令我決定MUST上 藻岩山,食多個'tea to dinner' tim.  順帶一問: 如果我只係去定山溪既"日歸浴"或者淨參觀,您估可唔可以坐酒店提供 嘅免費巴士往返札幌阿拉。
    [版主回覆09/09/2009 12:54:00]唔使羡慕, 我相信你下星期去都會好天咖!
    如果你去定溪山係 "日歸浴", 你嘅巴士站可以買到啲日歸嘅套票! 你包來回巴士同埋浸浴費用, 否則我相信酒店會比較難安排免費巴士, 因為佢哋只會安排下午接你去酒店, 上午送你返札幌, 咁就好似同你嘅日歸浴計劃剛剛相返啊!

    回覆刪除