2009年8月5日 星期三

北海道仲夏賞花の旅 (第二日-Part 2)

27/07/2009  陰天

  富良野 à 美瑛 à 美馬牛 à 上富良野 à 富良野


(Part 2)


上返車之後下一站就係四季彩,哩到比我哋停留30分鐘,如果係我哋自己嚟哩到,2個鐘都唔夠呀! 因為真係好靚呀!



四季彩の丘標誌



 




唔想自己行可以坐哩啲車,佢會帶你圍繞花場行一個圈啊! 唔記得係¥300定¥500一個人。









好多向日葵呀! 不過啲花面向地嘅! 




啲花好靚呀!不過就差咗個藍天啊!






哩到都有個小小嘅小賣店



               


12:16就返到美瑛駅,開頭諗住喺哩頭行一陣食個晏先去美馬,但因為而家想去埋上富良野,所以決定搭13:02開出嗰班車咁即係我哋而家得半個鐘食晏,一心諗住食向日葵拉麵,但去到竟然休息喎! 時間關係就諗都唔諗入咗去隔離嘅咖喱店嘞!



原來哩間咖喱店都幾出名咖!



一入到去我哋好快就order咗3個set lunch,但後來見到隔離枱嗰碟都幾大碟吓!所以最後都係同師傅講要兩set就夠啦!


師傅好好心機慢慢煮佢嘅大餐,但無奈我哋真係好趕時間,佢用咗三個字煮哩餐飯,但我哋只係用咗五分鐘就完成咗哩個晏仔嘞! 師傅同隔離枱對情侶都睇到獃咗! 心諗哩三個人做咩咁趕呢?


不過哩餐真係好好味,啲咖喱好香,啲雞肉同豬肉都諗啊!



Picture


哩幾日哩個輪輪袋係我哋嘅良伴呀! 我哋將要飲嘅水,要帶嘅旅遊書,要食嘅小食,要買嘅手信都交託晒比佢呀!



原來13:02開出哩班車係夏季限定嘅富良野美瑛ノロツコ号,我鐘意叫佢做烏龜火車,因為佢以龜速行駛




車位設計可以令乘客好舒服咁欣賞風景



喺指定席嗰間有記念印仔同埋記念品部




烏龜火車去到某啲位置會減速比乘客影相咖!




我哋搭咗一個站就到咗美馬牛駅! 出咗車站會見到佐藤商店哩到可以寄存行李咖 ! 佢旁邊有條路,我哋就行入哩條小路向Kanno Farm進發嘞!



沿途都係啲民屋,家家戶戶都有個花園仔種吓花花、瓜菜呀! B女見到羡慕到不得了呀!




見到哩間屋就轉彎



然後見到哩間中學



再直行就會見到哩條唔係路,山頂嗰幾棵樹就係Kanno Farm嘅所在地。 我喺某人個blog教過就咁行上去就到啦! 於是我哋都照辦嘞! 就係咁就出咗事嘞!



哩條唔係路真係唔係人行嘅路全部係泥嚟咖!可能之前又落過雨,啲泥好鬆軟,我同大笨蛋托住個輪輪袋又鬼咁重,當每行一步都感受到自己泥足深陷,但回頭已是太晚了,咁就唯有頂硬上。 有幾步重好似踏咗喺浮泥上差啲扒咗喺到呀! 雖然行咗10分鐘到,但真係好似行咗成世呀!


大家認住哩條唔係路!千奇千奇唔好行呀!




你哋睇到哩到一個個草球係咪好得意呢! 見到哩到證明我哋到咗啦! 但係.....



哩到係花圃最高嘅地方,亦係最搶眼嘅地方,好多人都會攞住相機由下面炒上嚟哩個咁靚嘅景


就係喺哩個時刻,有三個茂里突然從花圃中心彈出嚟,當時個刻嘅心情真係筆墨難以形容,剩係知道要盡快離開哩個是非之地,因為已經好多人喺到指指點點啦



真係好魚呀 ~~~~!!!


對鞋比我搞成咁呀! 終於抺鞋都抺咗四個字呀!  

Tantrum



做完善後工作就開始影相嘞! 哩到啲花好靚呀!  















從Kanno Farm遠望重可以見到今年五月先開放嘅魔天輪,哩個魔天輪喺富良野居民一片返對聲中興建,居民覺得佢同大自然風景好唔合,所以強烈反對,我諗即係好似當年羅浮宮前嘅玻璃金字塔咁! 遲啲居民可能因佢而自豪咖啦!



唉.! 唔行頭先條唔係路奇實係可以有條平坦大路行咖! 只係行多十分鐘到,我哋抺鞋都抺咗廿分鐘啦!



好快又返到嚟美馬牛駅嘞! 哩個車站比較簡陋



哩到有間工程車幾得意




車駅裡面有一個好熱情嘅站長,佢識講英文咖! 一見你係外國人就不停咁聊你傾計咖!



我哋搭哩班15:24開出去上富良野嘅列車原來又係烏龜火車呀!



搭一個站,話咁快又到咗上富良野啦!




                                                                                                                       .....續


3 則留言:

  1. 太陽花見冇乜太陽, 所以瞓下覺先
    薰衣草田好靚呀, 不過其實我唔太鍾意薰衣草隻味.
    你地食果D咖哩飯, 黃色嘅?
    [版主回覆08/06/2009 15:03:00]哈..哈! 係喎! 咁都比你諗到!
    唔係個個人都鐘意薰衣草啲味咖! 我細妹都唔鐘意咖! 但睇就好壯觀囉!
    係呀啲飯係黃色咖! 但我哋實在太趕時間, 所以冇研究佢加咗啲咩呀! 不過哩餐飯其實好好食咖! 而家都好回味呀!

    回覆刪除
  2. Shirley :         D花田真係好靚呀 ,  夏天黎 "北海道" , 真係另有一番風味 .       (不過午飯果餐太趕 , 未免有D可惜)
    Bye Bye !
    [版主回覆08/07/2009 11:45:00]係呀! 對住一望無際嘅花田, 真係好正好舒服呀!
    我都覺得好可惜呀! 嗰餐真係好正呀! 但係冇計啦! miss咗一班車要等個幾鐘先至有下一班呀! 所以如果識揸車會好好多, 啲時間會好使啲, 唔使吓吓比個火車表限住時間囉!  但我都玩得好滿足咖啦!

    回覆刪除
  3. thanks .. 等我去睇下先..
    [版主回覆08/07/2009 16:23:00]唔使客氣!!

    回覆刪除