不經不覺2009年又成過去啦！今年對於自己係難忘嘅一年，實在發生咗好嘢！當中有開心亦有唔開心，開心嘅我會永遠記住，但唔開心嘅我希望隨住2009年嘅過去都跟住過去啦！
喺到祝願大家新一年有新嘅開始，開開心心，最緊要係身體健康啊！
2009年12月31日 星期四
2009年12月18日 星期五
141209 ~ 181209 嘔吐獅子魚
由14號打完化療針後嘅半夜開始就化身成一條新加坡名勝「嘔吐獅子魚」嘞！
無論食咩落肚都全不保留咁嘔返晒出嚟，就算飲啖水落去都要嘔返出嚟！除咗覺得辛苦之外，當時真係感到有啲氣餒啊！但眼見B女媽咪重冇放棄過咁不斷煮啲可以容易入口，又有營養嘅食物，又諗方法慶住啲嘢等我半夜三更爬起身想食嘅時候都有得食，嗰份心機真係令我好感動同唔安落，咁大個人重要佢咁擔心，所以同自己講點辛苦都要捱，點樣嘔都要食落去，至多再嘔過啫！有咩大不了吖！
好彩我重有個強項係瞓覺，以前遇到有咩唔開心、唔想諗我就會去瞓覺，所以今次我都一樣呀！嘔到倦覺得好辛苦就去瞓，瞓咗當冇事發生，終於捱到今日總算食嘢落去都唔再嘔啦！
今日中午公司人事部重搵人送咗個生果籃嚟屋企，佢哋話哩啲係員工福利喎！我做咗咁耐都唔知有哩啲福利啊！
嘩！裡面好多生果啊！
重有我最鐘意嘅士多啤利呀！我一口氣食咗八粒士多啤利，真係又香又甜呀！
好耐未試過今日咁食咗咁多嘢呀！原來食嘢可以好滋味咖！
頭髮喺第一針化療藥副作用下都開始一束束咁甩出嚟，而家頭皮都會因為頭髮脫落而痛，所以見有返啲精神就去髮廊將三千煩惱絲一次過剃去。
2009年12月14日 星期一
141209 第一針化療針
今日下午三點到醫院覆診，今次哩個醫生比較後生，所以比我感覺比較輕佻，佢睇一睇個file就話：「之前個醫生offer比你嘅療程須自費HK$24,000.00，而家比多個選擇你，喺每枝針都加新藥，每枝HK$8,000，合共HK$48,000，然後每四日打一枝補血針，每枝HK$800，可以返醫院打、去賽馬會打、或者返屋企自己打都得。」吓！自己打都得？？唔係呀嘩！
跟住重講：「其間重有藥要食，加埋晒成個療程比十萬蚊到啦！」吓！十萬？？咁我就問佢個效果係咪好啲，副作用係咪少啲，但佢話效果同副作用係一樣，分別係二萬四嘅係歐洲出品，十萬嘅係美國出品。我覺得點解我今日都打第一針，佢哩一刻先比啲咁困惑嘅難題比我喺幾分鐘內決定呀！上次又唔講，咁即係想點呀？
同媽咪商量咗一陣，都係用返原本個plan，因為既然成效同副作用都一樣，咁無充分理由要我比多咁多錢囉！Confirm咗之後，哩位醫生連我個傷口都無檢查就叫我出去等打第一針化療針嘞！喺哩一刻我有啲懷疑佢係咪有佣分咖！
終於喺四點半就開始打針，我真係好驚打針咖！
嘩！見到姑娘攞住成盆針藥，我心諗唔會全部係我嘅，但坐埋位時，果然全部都係我咖！嘜唔係一針過咖咩？！醫生幫我打咗六枝針，哩啲針藥好勁呀！一打落去已經感覺到由手臂開始，然後到身體，跟住就走上頭，所以開始覺得有啲暈。打完六枝針後重要吊兩包紅色藥水，好似人哋吊盬水咁呀！吊完咗之後重要打多一針鹽水！整個過程都要成九個字啊！
而家暫時除咗有少少手腳痺同腰痛，其他都未有啲咩特別嘅反應！但我知道過多幾日嗰啲所謂嘅副作用就會出現，希望到時唔會太差啦！
2009年12月8日 星期二
化療前準備
自從28/11/2009出院後好似一直到忙個不停，每日嘅行程都排得密密。
出院第一件事去做係攞私家醫生嘅轉介信到政府醫院排期做化療、電療嘅療程。好好彩只須兩日已經可以約見醫生，當醫生評估咗我嘅狀況後，決定須要用四個月時間打六枝化療針，及兩至兩個半月做電療，完成咗哩兩項療程後，就口服五年嘅荷爾蒙藥。如果14/12/2009覆診身體冇特別問題的話，當日就可以打第一枝化療針啦！
醫院有個資源中心幫我哋哩啲新症嘅人，佢哋開咗好多癌症嘅專題講座，講解一吓我哋做治療前後要注意嘅事項，平時嘅飲食、作息留意嘅嘢。約時間聽咗幾個講座，真係幾有幫助啊！
講座中重免費派好多好有用嘅資料比我哋閱讀。
除咗一啲書仔，重送咗兩包奶粉，哩隻奶粉話可以喺化療期間幫助提升白血球嘅數量，不過要成HK$50一包啊！ 好似貴咗啲啊！
另外去見政府醫院醫生外，亦要到隔幾天到私家醫生處覆診，跟住為咗打好個底令自己打化療時抵抗力好啲，又每三日睇一次中醫，真係好似好忙咁啊！
由於化療後身體會比較差，所以會好長時間唔可以出街，於是就襯住哩個幾星期重可以四周圍走嘅時候，扣除上面見醫生及聽講座嘅時間就不斷咁約親戚、朋友們見面，因為大家對我真係好關心，我真係好多謝大家對我嘅支持啊！
得到癌症後，上網睇咗好多關於哩個病嘅資料，從其中有啲Blog中得知一啲買假髮嘅舖頭，所以今日都上咗去其中一間諗住睇吓！點知一睇就啱啦！
萬事駒備，而家只係等下星期一嘅來臨，雖然資料聽同睇咗好多，知道將會做啲咩，但始終未試過，點都係有啲緊張，希望會安然渡過啦！
2009年12月3日 星期四
驚聞惡耗
一直冇咩大病痛，還得戚咁同自己講：「重有個多月就到年尾，今年都未攞過一日病假真係叻嘞！」
11月11號做例行身體檢查前兩日已經發現左邊乳房出現咗一塊少少嘅硬塊，當時心知不妙，但仍不斷咁安慰自己冇事嘅！ 果然醫生都同意有個硬塊須進一步檢驗。一輪化驗、檢查、睇不同醫生都得出同一結果係一個唔係幾好嘅腫瘤，須要割除，但範圍不太而且發現尚早，加上家族並冇哩啲病歷紀錄，所以問題不大，一切都係樂觀嘅！
於是快刀斬亂麻，11月23號就入院做切除腫瘤手術，醫生重喺我昏迷前安慰我瞓醒一覺就咩事都冇會好返咖啦！但好可惜當我瞓醒時醫生話攞出嚟嘅係一粒惡性嘅瘤，所以腋下亦切除咗九粒淋巴核做化驗 … 最後報告顯示癌細胞已經擴散至淋巴，正式確診為「乳腺管癌第二期」，俗稱為乳癌。
一切都嚟得太快，十幾日前，癌症哩樣嘢好似對我係遙不可及，十幾日後哩位新朋友竟然已經走入咗我體內，霎時間都不知點樣招呼哩位新朋友好啊！
喺哩段時間察覺身邊嘅親戚朋友對自己真係好好，大家都不斷送上關心、祝福、慰問，尤其媽咪無微不至嘅照顧，令我知道我自己唔可以氣餒，否則會令關心我嘅人擔心同失望。
所以唔開心咗一段少少嘅時間後，而家就等傷口痊癒然後開始進行四個月嘅化療同埋兩個月嘅電療，據我所知化療並唔係一個簡單嘅療程，過程會出現好多副作用，嘔吐、甩頭髮就一定走唔甩，但都冇辦法，唯有希望自己到時身體唔好太差，能夠順利應付一連串嘅治療啦！
為免到時甩起頭髮帶嚟嗰種震撼，所以將留咗多年嚟嘅長髮剪短，希望將個震撼感減底啦！
升上中學後都未試過咁短頭髮啊！
訂閱：
文章 (Atom)