2010年3月1日 星期一

010310 唔知係好彩定唔會好彩

今朝照例返醫院抽血,下就見醫生睇報告,但今日約見醫生時間係四點,比平常晏咗兩個鐘。初初覺得好怪,因為打針部門係收五點咖嘛!四點先見醫生咪好趕囉!原來有原因啊!


等到四點九先見到「失魂醫生」,佢話白血球指數係4,升返少少,而肝酵素亦下降返到41,但正常係35,不過既然係有下降嘅趨勢,咁哩針都可以打。


聽到哩到我好開心咁就問係咪即係可以食定止嘔藥等打針呀!(因隻好貴嘅止嘔藥係要打針前45分鐘食,當時已經快5點啦!) 佢答我係呀!我重前後問咗佢兩次,佢都答係,跟住就忙住填寫一大堆資料,重話照舊開返我食開啲藥比我,但今次我哩針係要自費打,所以佢話要搞啲嘢,返轉頭再同我講。然後就將print出嚟嘅report、覆診信等文件同file攞走晒。


喺哩個時間,身邊亞B女係咁催促我快啲食止嘔藥啦!如果唔係有排等,人哋收工咖啦!咁我咪「咕」一聲就吞晒啲藥,喺嗰刹那,「失魂醫生」返嚟話confirm咗啦!因為哩針係自費,啲藥唔同咗,今日冇得打,幫你book咗哩針星期三打呀!


吓.....! 醫生我吞晒啲止嘔藥啦喎!佢話點解你唔問吓我先呀!


吓.....! 醫生我問咗你兩次啦喎!咁而家點呀??


最後佢只係安慰我冇事嘅,啲藥有效5日,而且哩枝新嘅化療針冇咁嘔咖!唔使擔心啊!嗰刻我只好唯有接受佢實牙實齒嘅說話。佢重話你出去等,一陣姑娘會教你哩針要做啲咩準備咖啦!咁佢就收工走人嘞!


咁就又等啦!不過比平時等得耐,差不多最後一個入去,姑娘第一句問我有冇攞咗張覆診紙去預約下次覆診時間,我話冇啊!醫生都冇比。姑娘:「唔係嘛!我哋哩到都冇喎!咁去咗邊呀?咁有冇比抽血紙你呀!」我再話冇喎!姑娘:「吓!咁你即係好返唔使再嚟咖啦!」吓..!唔係呀話姑娘。姑娘:「如果唔係你好返,有咩理有又冇覆診紙、又冇抽血紙呀!真係激鬼死呀!」佢應該係話個醫生。


又搞咗一大輪姑娘都搵唔返啲文件,咁佢就手寫過晒一set,再同我講解聽日同後日啲止嘔藥點食,我話比佢知我啱啱食咗一次啊!姑娘:「吓!你食咗....!咁而家點呀!」醫生話你哋姑娘會話比我知會點做啊!姑娘反眼加氣頂:「唔係呀嘛!」跟住佢唔識講嘢咁制!最後佢話聽日同醫生搞清楚咗先再打電話比我。但都已經搞到成六點,預約覆診同交錢買藥嘅部門都收咗工,要過急診室嗰邊同人一齊迫。真係好多人啊!但最後原來哩位「失魂醫生」只係開咗一隻普通嘅止嘔藥,其他食開尤其打完針要食嘅抗生素都全部冇開到。咁點算....!


最後八點先返到屋企重要係咩都冇做到,但無論如何星期三可以一定打到第四針,其他我都唔想諗啦!大不了咪又做返條嘔吐獅子魚囉!


                   

        


9 則留言:

  1. 呢 啲 究竟係乜 嘢 醫生 嚟咖?咁都得....!
    [版主回覆03/02/2010 13:21:00]我都大開眼界啊! 今朝姑娘打嚟話返我知啲藥應該點食返時, 醫生都係話我自己食咗, 並唔係佢搞錯囉! 算啦! 可以比我打針我都唔想同佢argue啦! 費時佢玩我要我delay就弊家伙啦!

    回覆刪除
  2. 妳果間係乜野醫院, 乜野醫生, 唯有寄望星期三啦
    [版主回覆03/02/2010 13:26:00]醫院咪係英國皇室最高領導人嘅醫院囉! 至於係嘜嘢醫生我都想知啊! 佢應該有前科咖啦! 如果唔係啲姑娘都唔會咁嘅反應啦! 唉!冇計啦! 公立醫院係咁咖啦! 祈禱希望下次、下下次都唔好見到佢啊!最好見輕佻醫生, 起碼有文有路又次次比我過關嘛! 聽日一定打到針啊! 錢都比晒啦! 所以放心啊!

    回覆刪除
  3. 不要太擔心, 反正藥已經吃了, 等星期三的打針, 祝你順利!
     
    [版主回覆03/02/2010 13:27:00]Thank you!!! 係呀! 反正佢肯比我打針, 我都唔理咁多啊!

    回覆刪除
  4. 我都想知妳係邊度做化療架,大概都看過妳個blog,我都係妳個同路人;而家我係接受緊(標靶治療),有時都會為安排打針,抽血,覆診的安排等等的程序,都有點不服,因為醫生有醫生講,護士有護士做的一套,所以令到病人都好無忍?*\! 同是天涯綸落人!
    [版主回覆03/02/2010 14:08:00]係囉! 佢哋好似都分黨咖! 打針房同9號房啲姑娘唔啱, 9號房啲姑娘又數唔同組啲姑娘做咩那西, 醫生大家之間好似冇默契, 總之玩到你啲病人氹氹轉啦! 如果唔係有家人陪埋去, 試問一個病人唔停咁喺幾座大樓之間走嚟走去, 若然打埋針wing wing吓再騰嚟騰去攞藥,  問你死得未! 不過算啦! 都係一個過導期, 我哋好快會挨過哩啲日子, 以後都唔返嚟哩到咖啦! 大家一齊努力啊!

    回覆刪除
  5. 我知道妳在那裡覆診,我都係這間醫院,可能曾經見過妳面都不出奇,妳會否出席(妳+你+祂)的分享會呢?希望到時見到妳面!
    [版主回覆03/02/2010 14:13:00]係呀! 如果唔係delay咗! 我頭兩次都係見返同一班病友咖! 不過哩兩次delay咗就少見咗囉! 不過我由第一針開始, 次次都遇到一個坐輪椅個婆婆, 佢有個印籍工人陪佢嚟, 個工人好錫佢咖! 唔知你有冇留意呢? 咁我三星期後可能都見到你啊! 個分享會要睇我到時身體點先知去唔去啊! 上次癌協有個講座我報咗名但最後因為唔舒服都去唔到啊! 所以而家我都未知啊!

    回覆刪除
  6. 我都覺得佢地好吾合拍,有時一樓打標靶裡面的姑娘都係有這情況;不過攸病人都不會理佢地咁多野! 我已經不用帶帽,生番的頭髮了,我下一針會在22/3下午2:00,吾知會不會見到妳呢?
    [版主回覆03/02/2010 15:50:00]我嚟緊哩針係聽日上就打, 22號就3:30覆診睇吓可唔可以打第五針囉! 不過大家都應該係朝早抽血, 都好大機會會見到啊! 睇吓到時有冇緣啦!

    回覆刪除
  7. Shirley, 好耐冇上blog, 所以唔知發咩事....唔好意思..
    妳一定要加油, 見妳咁樂觀, 相信問題好快解決的~~支持妳呀!加油~
    [版主回覆03/02/2010 20:42:00]Hello!! 好耐冇"見"啊! 搬咗屋幾好嗎? 
    傻啦! 唔使唔好意思喎! 我知道大家都好有心啊! 放心啦! 有你哋一班blog友嘅支持鼓勵, 我一定會努力啊! 挨多幾個月就咩事都冇咖啦!
    好多謝你嘅慰問啊!

    回覆刪除
  8. 今天的辛苦,換來明天的幸福!努力,忍耐啊!
    [版主回覆03/04/2010 17:35:00]知道啦! 星期一付錢嘅辛苦換來今日副作用大減嘅幸福啊! 哈...哈!!

    回覆刪除
  9. Shirley :           嘩 ~ 有冇攪錯呀 , 點樣做醫生架 ? 好唔專業 . 
    個姑娘仲衰 , 講埋D咁既說話 , 有冇理過病人既感受架 .     真係鬼唔望將妳既病轉移晒俾佢 , 等佢知道病人既心態 ,    好人好姐 , 你估真係好想見佢咩 ? 睇到妳呢篇 , 對香港既醫療真係好失望 . 
    Bye Bye !
    [版主回覆03/04/2010 17:40:00]以前睇到新聞話咁多醫療失誤覺得唔會咁離譜啩! 原來真係唔出奇囉! 下次真係要金精火眼咁盯住佢哋每一個步驟同confirm再confirm啊! 試過今次真係有啲怕怕啊! 
    估唔到家陣先發覺原來亞「輕佻醫生」隨咗講錢之外, 佢做嘢係最有文有路, 每樣嘢都交待得清清楚楚, 真希望下兩次都可以遇返佢啊! 

    回覆刪除