2010年6月24日 星期四

電療最終回 (第廿八至三十一次)

隨住今日第三十一次電療嘅結束,歷時六個半月嘅癌症治療終於告一段落啦!而家回望真係好似發咗一場惡夢咁啊!以前都睇過人哋嘅抗癌經歷,但到自己置身其中就真係另一番滋味啊!但並不回味。

前兩日亦見咗醫生,今次覆診嘅唐醫生係我第一次喺QE見嘅醫生,當初就係佢幫我決定用邊隻化療藥同電療次數,佢好細心咖!檢查時好緊張咁話我損咗嘅傷口都唔細,擔心會細菌感染,所以開咗好多消毒藥水比我洗傷口,另外又再開過一隻比較好啲嘅藥膏。

上次比啲藥膏都未用晒,而家又一罌,真係有排搽啊!



跟住醫生話要做嘅療程已經完晒嘞!而家只須要繼續食控制荷爾蒙藥,至於電療嘅損傷就要過多兩、三星期先可以慢慢減退,所以佢要我再休息多一個月先可以返工,復工日就定喺八月二號啊!

哩大半年唔停咁喺哩座腫瘤科大樓出出入入,終於可以同佢暫別啦!九月覆診先再返嚟啊!踏出門口嗰刹那真係唔知點解喊咗出嚟呀!

    

今次真係好感激上天嘅眷顧令我喺治療期間身體唔太差,好多發生喺其他人身上嘅問題如生飛滋、喉嚨痛、發燒甚至感染等都冇喺我身上出現。多謝天主保佑!

除此之外,喺到我好想多謝哩大半年嚟一直慰問、鼓勵、安慰我嘅親朋戚友們、同事們、BLOG友們,如果冇你哋一直喺我身邊嘅支持,喺哩段日子我都唔知點撐落去啊!每當我感到低落、唔開心、好氣餒嘅時候,見到大家比我嘅留言為我打氣或收到慰問嘅電話,立時好似打咗支強心針咁,令我好有力量咁繼續落去啊!尤其老闆、上司、同事們嘅體諒,令我可以好專心同安心咁休假做治療,除咗講多謝之外,真係唔知再可以講啲咩啦!真係好多謝...好多謝你哋啊!  I love you all !!

    多謝.....

                    

38 則留言:

  1. 為妳高興,因為真的可以告一段落;休息過後又是條好漢 ,依點解向QE見吾倒妳,柯!可能我時時在一樓打針沒有見到妳la!祝願前程美好.....
    [版主回覆06/25/2010 15:58:00]多謝你呀! 因為我喺地下嘅4號同7號機做治療, 個位置比較入, 如果你唔係做電療跟本唔會行入去, 就連覆診都係喺地下到見, 唔使上4樓, 所以咪撞唔囉!
    我都希望你順利完成療程早日康復啦!

    回覆刪除
  2. 真係不容易!終於完成了!為您喝采!
    往後日子都要戒下口,食得健康 D,瞓多 D!做下運動!
    盡量唔好食雞羅,因為香港實在全是打針雞,激素大勁。
    呵,當年我奶奶的主診亦是唐醫生啊,他是一位十分十分十分好的醫生!
    現在我奶奶覆診定期照鼻鏡都係佢,真係好好人!好有醫德!
    希望您早日完成所有治療。
    復工後都要小心,盡量係人多的地方都帶口罩羅,
    以免無謂的細菌入侵,傷風感冒都唔好啦!
    加油啊!
     
    [版主回覆06/25/2010 16:06:00]真係! 真係唔容易, 而家回想返啲化療針真係重有啲怕怕啊!
    而家都重戒緊口呀! 而且有啲嘢係以後都唔可以食, 我平時都唔係好鐘意食肉, 不過都最鐘意食雞, 但而家連我唯一鐘意食嘅肉類都冇埋啊!
    原來你奶奶都係睇唐醫生咖! 我只係第一次同今次係佢睇, 其次Angus Leung都好好, 亦係我遇到最多次, 其餘嗰啲就真係好求奇, 尤其個女醫生就衰到冇人有囉! 不過無辦法啦! 又唔可以自己簡醫生。
    多謝晒你嘅鼓勵同一直以嚟提供有用嘅資料呀!

    回覆刪除
  3. 恭喜妳終於完成這些治療啦!
    小心護理皮膚, 好好休息, 養好身體!
    祝身心康泰!
    [版主回覆06/25/2010 16:09:00]多謝你呀! 你都要好好休息, 放埋哩幾日假你就要返工啦! 希望你以後都順順利利, 身體健康啊!   

    回覆刪除
  4. 叻叻叻叻叻叻叻叻叻叻叻叻叻叻叻叻叻!!!  \ ( ^ v ^ ) /
    辛苦你了... : )
    Pui
     
    [版主回覆06/25/2010 16:10:00]! 終於捱完啦! 等我瞓夠就搵你慶功啦!

    回覆刪除
  5. Congratulations!!
    對自己好D, 食餐勁就梗要,食得是福!!看見妳完成哂D療程, 心情也Happy自己化療反應都少D, 一切小心為上, 為妳高呼 Yeah!!  
    [版主回覆06/25/2010 16:12:00]好快我都可以為你 Yeah 啊! 所以你都要比心機努力啲啊!  我會一直支持你咖! 加油....加油!!

    回覆刪除
  6. 為妳感恩,終於完成晒療程啦!叻女!
    [版主回覆06/25/2010 16:23:00]多謝你呀! 你重有四枝都好快咖啦! 比心機呀!  

    回覆刪除
  7. 恭喜啊  祝早日徹徹底底的康復 !
    QE那座大樓 , 曾幾何時也是我陪媽媽共同經歷人生的地方 , 不敢回憶 , 但未能忘記呢 .......
    [版主回覆06/25/2010 16:24:00]多謝你呀! 係呀! 哩啲經歷真係永世難忘呀! 但唔想重溫囉!

    回覆刪除
  8. 好啊,好消息,告一段落,新開始,祝之後順順利利。
    [版主回覆06/25/2010 16:25:00]係呀! 我都希望以後可以順利呀!

    回覆刪除
  9. Shirley :           總算捱過最艱難既日子 , 打後時間就好好咁調理好身體 , 之後再去 "日本" 玩鋪勁既 . 
    Bye Bye !
    [版主回覆06/25/2010 16:29:00]多謝你呀man wai!! 哩段時間多得有你嘅支持啊!
    我而家真係想好似倪匡咁走去機場同航空公司講, 有咩機位去日本即刻飛嘅就比我啦! ! 你當我發開口夢啦!

    回覆刪除
  10. 嘿, 又一條好漢 . . . .  好女子 .才對    好好休息, 不要太急進補 . . . . 不單是雞, 燕窩也不是時候  運動時也要注意未康復的皮膚   . . . . 北海道會等妳的, 放心
    [版主回覆06/25/2010 16:35:00]我要同啲雞+燕窩絶交啦! 以後都可以食佢哋啊! 暫時我都未有氣力去做運動啊! 所以真係要抖一排先得! 旅行就更加要再再再一排啦!
    真係多謝你一直以嚟嘅鼓勵同慰問, 又成日影啲靚相比我睇, 希望好快到我可以寫返個遊記比你睇吓而唔再係病歷啊!

    回覆刪除
  11. 好嘢!終於都完成所有療程,要好好慶祝,
    不過記住唔好攞重嘢!買東西揾人幫你拿呀!
    調理好身體,先至好返工,再一次恭喜你.
    [版主回覆06/25/2010 16:38:00]多謝...多謝! 而家我都唔敢比佢(即係隻左手呀!) 攞嘢! 就算手袋我都用右手, 因為我好擔心會水腫啊!
    好多謝你一直嘅鼓勵同分享你嘅經驗比我, 令我更了解自己嘅情況啊!
    希望大家以後都健健康康啊!

    回覆刪除
  12. 恭喜,賀喜!
    你真的很勇敢,很堅強!
    否極泰來!
    [版主回覆06/25/2010 16:38:00]多謝..多謝你啊!

    回覆刪除
  13. Shirley:
    感謝神!你已順利完成所有療程,真替你高興!
    下星期一我會開始電療,而標靶針就仲有11次哩!
    願主恩永溢!
    [版主回覆06/25/2010 16:41:00]咁你都係好消息喎! 我都為你祈禱希望你嘅療程順利啊! 好快我都可以同你講聲"我戥你高興啊"

    回覆刪除
  14. 大塚家的小灰灰2010年6月25日 下午1:33

    係、小灰灰都覚得要Thanks God(s) 、世間依然有好多好人、多得好人們互相支持、難関先可以渡過得容易一点、、、祝你快D 好返晒
    PS:  小灰灰其實係無宗教、但尊重各位所信0既神。 
    [版主回覆06/25/2010 16:41:00]Thank you!!

    回覆刪除
  15. 希望D皮膚損傷快D好返,快D重投以前的生活,快D去旅行。yeah!
    [版主回覆06/25/2010 18:36:00]承你貴言呀! 八月一切就回復正常啦!

    回覆刪除
  16. 恭喜您~ 您畢業啦~ 以後唔會再來了~
     
    [版主回覆06/25/2010 18:37:00]多謝晒! 啲衰嘢都遠離大家啊!

    回覆刪除
  17. 真的極度替你高興! 終於完成艱辛的治療! 我有D眼濕濕呀!
    以後一定要好好take care自己!
    主必看顧!
    [版主回覆06/27/2010 20:58:00]多謝...多謝!! 你都要繼續努力啊!

    回覆刪除
  18. 恭喜晒!!是時候重新變為「遊記」BLOG喇....!!
    [版主回覆06/27/2010 20:59:00]! 多謝....多謝! 希望年尾可以飛返轉啦!

    回覆刪除
  19. 哈哈,原來你又係QE既客仔,回想當日我做埋最後一次電療,心/身都鬆晒,不過就沒有同張電療咭影相.咁就可以計劃去旅行目的地.
    [版主回覆06/27/2010 21:01:00]因為知最後一日電療就會收返張咭, 所以影底啲戰績啫!

    回覆刪除
  20. 噢,上岸喇,恭喜晒呀,不要怪小子遲來,接不到妳上岸添。
    記得來日多點接觸陽光、海灘與郊野公園,正能量0黎0架,對身體一定有好處。
    [版主回覆06/27/2010 21:03:00]我當然唔怪小子啦! 重要多謝你一直以嚟嘅鼓勵呀!
    我以後會好似小子咁講接觸多啲戶外活動咖啦! 以前太過懶惰啦!

    回覆刪除
  21. 希望可以澈底根治呀!!!
    [版主回覆06/27/2010 21:03:00]我都希望啦! 多謝你啊!

    回覆刪除
  22. Shirley, 知道你順利完成整個路程, 實在為你高興, 為何不好好的休息多點才上班呢? 你的毛髮還未長出, 倒不如年底當身體強壯點才考慮上班啦!  你要吃控制荷爾蒙藥, 有什麼副作用呢? 我完成電療後也要吃, 幾時開始吃呢?
    [版主回覆06/27/2010 21:08:00]醫生評估過話抖多個月都可以正常生活, 所以咪決定返工囉! 其實我都重有假, 如果到時真係未得先再攞假休息啦! 因為我真係好想回覆返一啲正常嘅生活啊!
    我今晚先開始食控制荷爾蒙藥, 醫生喺電療後第三個星期就開比我食, 但因為之前有病友睇私家醫生話唔好電療同食藥一齊做, 咁會有15%機會令乳房組織變質, 所以我咪今晚先開始食囉!

    回覆刪除
  23. 我送上誠心的祝福
    希望你早日康復,告別這些日子
    然後繼續開開心心去旅行
    加油啊!
     
    [版主回覆06/27/2010 21:09:00]多謝晒你啊!

    回覆刪除
  24. 終於捱完啦恭喜晒~ 返工前呢個月要玩盡佢~~
    [版主回覆06/27/2010 21:10:00]多謝晒, 不過哩個月都主要係休息, 所以都唔會點去玩, 玩到盡就更加冇可能啦!  要盡就再要遲啲啦!

    回覆刪除
  25. AQ cream隔離的一包包黃色液體是什麼??
    [版主回覆06/27/2010 21:13:00]黃色液體係洗傷口嘅消毒藥水嚟咖! 因為電完嘅位置尤其腋下都損晒, 醫生擔心會細菌感染, 而且損咗位置亦唔適合搽藥膏住, 所以比哩啲消毒藥水我洗傷口囉! 洗咗啲死皮, 個傷口又真係埋得快啲啊!

    回覆刪除
  26. 恭喜晒妳呢! 盡在不言中
    [版主回覆06/27/2010 21:13:00]多謝你呀!

    回覆刪除
  27. 學小子?會曬到妳黑黝黝的,唔靚0架,想清楚呀,哈哈!
    [版主回覆06/28/2010 19:29:00]哈...哈!  我一向都唔係靚女, 所以黑就黑啦! 而家最緊要係健康啊!

    回覆刪除
  28. Yeah! 太好了,恭喜哂!
    中醫話南方人一定要吃飯,身體才會好
    記住唔好亂吃補品
    唔好食生冷野,E d 係女人大忌
    唔好怪我老人家多嘴 ,我 18-22 時都唔聽及唔信
    現在唔到我唔聽話
     
    [版主回覆06/28/2010 19:33:00]多謝你啊!
    我而家都戒緊口, 好多嘢都話唔食得, 不過無計啦! 為食對自己都冇好處啊! 咁就唯有聽話啦!
     

    回覆刪除
  29. 這個大 project 終於完成啦,真替你高興呀!
    [版主回覆06/28/2010 19:33:00]係呀! 終於完成啦! 多謝晒你啊!

    回覆刪除
  30. 高興妳得「悟」了!
    [版主回覆07/01/2010 11:04:00]!!

    回覆刪除
  31. 恭喜!恭喜!
    [版主回覆07/01/2010 11:03:00]Thank you!!

    回覆刪除
  32. Yeah~大功告成!  Congratulations!!
    [版主回覆07/01/2010 11:04:00]Thank you!!

    回覆刪除
  33. 抗戰勝利!
    [版主回覆07/01/2010 11:04:00]Yeah!! Thank you !!

    回覆刪除
  34. 好番要食得健康d(牛雞都唔好食...hahaha 最好食齋), 唔好涯咁多夜....重有, 做運動!!!
    [版主回覆07/02/2010 15:07:00]多謝你呀! 而家雞、鵝、鴨、牛都戒晒啦! 就算齋裡面都有好多嘢唔食得, 豆同菇都係其中之一呀! 所以而家食嘢都幾煩呀!
    等電療嘅傷口好晒我會開始去游水,咁多種運動我最鐘意就係游水嘞!

    回覆刪除
  35. 嗨, 你咁叻ge, 可以嚮部機門口影相ge, 我影咗一張唔清唔楚, 仲俾個放射師大叫"有人影相呀! 捉住佢~"
    嚇到我張部相機掉咗落隔離個袋, 仲立即攞部電話扮打電話, 後尾個workman走埋嚟叫我 "No, No, No," 我望住佢, 佢就走咗! 乜我個樣似菲傭咩? 同我講英文? 總言之, 得啖笑, 遲d俾張相你睇!
    [版主回覆07/04/2010 11:10:00]叻咩鬼吖! 其實last day嗰日好早做治療, 咁啱嗰兩個治療師入咗去治療室, 門口個姐姐又行開咗, 出面又冇咩人, 所以咪快手快腳影咗幅囉! 
    不過你話佢哋同你講英文又幾搞笑喎!

    回覆刪除
  36. 恭喜晒~ 捱過o左啦, 以後要小心注意飲食~  保重呀~
    [版主回覆07/05/2010 10:44:00]多謝晒你啊!

    回覆刪除
  37. 畢業啦,恭喜哂!

    回覆刪除
  38. 想問一下你電療時...會不會因電的次數增加會感到好口乾..
    因我快要做電療啦...好擔心...
    [版主回覆07/23/2010 17:37:00]Hmm....其實我每次電完都會感到口乾, 但我又唔覺隨住次數增加而感覺增加啊! 我有帶定一樽水, 每次電完都會立刻飲, 返到屋企就更加要盡量飲多啲水囉! 我媽咪亦煲啲竹庶矛根馬蹄水同埋一啲家常湯水。
    你唔好太擔心啦! 電療比起化療真係濕濕碎咖咋! 我雖然腋下位都有電到損咗, 但只要完晒療程個幾兩個星期就可復原咖啦! 我而家都冇嘢啦! 每朝重可以去游水添呀!
    醫院通知咗你幾時開始電未呀? 盡量放鬆心情啦! 你咁緊張對你嘅身體都唔好啊! relax ~ 你唔放心我借埋個膽比你用住先嘞! 好快個多月後你就會冇晒事咖啦!
     

    回覆刪除