2010年6月12日 星期六

電療開始啦!(第十三至廿二次)

29052010 ~ 04062010 (第十三至十七次電療)

今日完成咗第17次嘅治療嘞!皮膚開始有啲燶燶哋,而且非常之痕,但係又唔拗得,真係好鬼難頂啊!

由於已經渡過咗三個星期嘅療程,噚日被安排見醫生,醫生檢查咗傷口之後就開咗啲潤膚膏,希望幫到傷口痕嘅問題,另外亦都開咗控制荷爾蒙藥,因為我嘅情況除咗要化療、電療外,係重要食五年嘅控制荷爾蒙藥,我原以為係完咗電療後先開始食,但醫生話而家已經可以開始食喎!



哩隻Tamoxifen藥都有幾多副作用咖!下面嘅資料係來自醫院嘅章程

常見嘅副作用 (醫生話10 個人通常5個都會有哩啲反應命中率都好高)

1. 疲倦

2. 潮熱

3. 心悸

4. 出汗

陰道分泌增加

 

罕見嘅副作用 (醫生話哩啲反應就100個人有1個會係咁)

1. 過敏反應

2. 子宮內膜增生

3. 抑鬱

4. 視覺衰退

5. 子宮惡性腫瘤

6. 血管栓塞、包括靜脈栓塞、肺栓塞、腦中風

*以上第56項有機會引致死亡

睇落都好似幾驚,常見嘅副作用我諗都走唔甩啦!因為六合彩冇我份,哩啲咁嘅嘢就中緊,但罕見嘅就真係唔想中啊!不過醫生都係嗰句,食好過唔食,對減底復發有一定幫助,淨係聽到「減底復發」就唔擔心得咁多,咩都食啊!

 


05062010 ~ 11062010 (第十八次至廿二次電療)

距離終點越嚟越近啦!而皮膚亦越嚟越傷,之前講過電過嘅範圍出現一個好似A4紙大嘅啡色哄,而家已經由啡色變到又紅又黑,少部份紅色地方有啲瘇,而大部地方因為啲毛孔燶咗所以變黑,同啲乳豬皮嘅表面冇咩分別。而腋下皮膚比較薄,嗰到個傷口到第十九次嘅治療亦都電都甩皮損咗!

電嘅次數越多,個人亦越覺得攰,而且每朝起身都會頭暈、頭痛,見過醫生,佢話哩啲都係副作用之一,如果真係好痛就食止痛藥喎!不過我自己又唔想食咁多止痛藥,所以唯有忍耐吓啦!

重有九次啫!目標在望啊!

 

33 則留言:

  1. 不要畏懼 , 妳一定能平安.順利康復的
    [版主回覆06/05/2010 18:06:00]多謝你支持啊! 我都希望一切可以順利渡過啊!

    回覆刪除
  2. Shirley :          諗番D樂觀野會好D架 ,     應該諗 : 一件副作用都唔會發生. 
    Bye Bye !
    [版主回覆06/05/2010 18:10:00]我都好想好以你咁講啊! 但人始終都要面對現實, 所以都遇咗要接受某程度嘅副作用, 而家只希望最差嗰幾樣唔好出現囉!

    回覆刪除
  3. 我潮熱咗一年,而家無啦,
    但D靜脈曲張嚴重咗,M一係唔嚟,一嚟就勁多.....
    [版主回覆06/05/2010 18:12:00]要持續成年咁耐呀! 靜脈曲張嚴重咗....咁會有咩影響咖?? M時多時冇, 咁使唔同醫生講咖?? 唔好意思咁多嘢問, 因為點都有啲擔心啊!

    回覆刪除
  4. Shirley, 我係娜娜,已經接受第5次電療,暫時只有輕微體熱但沒有汗水,感到手腳冰凍,晚上有點寒,日日也有飲竹蔗水希望減少熱氣,而且開始在上環東華醫院香港大學中醫部吃中藥,望減少生飛滋,喉嚨發炎吧了!多謝你的作品,我很留意,因為我們是同路人嘛!努力!
    [版主回覆06/05/2010 18:19:00]我而家都有生幾粒痱滋啊! 不過佢唔生喺利底我就係好驚, 我媽咪而家日日都會煲啲清潤嘅湯水比我飲囉! 我都日日飲緊中藥啊!  咁多種湯我最鐘意飲哩個六種材料嘅菜湯, 中醫都話哩個湯好好, 因為每種材料都對我哋有幫助, 冇病嘅人食都有益啊!
    紅蘿蔔、蕃茄、薯仔、洋蔥、紅棗、波菜, 如果想食啲肉可以加瘦肉, 不過我哋就冇放肉, 波菜就最後先放, 因為佢好快熟啊! 好好味咖! 你都可以試吓啊!
    你都要加油呀! 我哋大家一齊努力啊!

    回覆刪除
  5. 嘿, 我就話時上時落就最正常,   我都系呢個禮拜病咗4日 ,食緊藥, 又訓得唔好, 公司仍然趕緊 Audit, 有病假都回公司開工 . . . .  總唔可以相信自已一直好運  所以, 你絕對唔會系一直唔好運呢  
    [版主回覆06/05/2010 18:20:00]你都要小心身體呀! 雖然怕但都要有充分嘅休息, 副"計"壞咗就好難搞返好咖啦! 大家保重..保重啊!

    回覆刪除
  6. 紅蘿蔔汁含有豐富維他命B2,醫痱滋好有效(未穿破前更好)不妨一試。小子習慣在大陸買B2丸代替,人民幣元半一瓶(100粒)很是方便。
    [版主回覆06/06/2010 14:03:00]我而家日日都有食紅蘿蔔咖! 我由細到大都成日生痱滋, 而且啲位置重越生越雕轉, 所以家陣除非生喺利面或利底, 否則我都唔係好怕, 生幾日就會謝, 我都冇咩點理佢啊!

    回覆刪除
  7. 嘩,D荷爾蒙藥好多副作用啊!
    電療期間可否做運動啊?出汗會否好辛苦?
    六種材料嘅菜湯要煲多久?一個鐘?
    好快做完療程啦,加油..... 加油!!!
    [版主回覆06/06/2010 14:20:00]
    係呀! 啲副作用真係唔少, 醫生話我有權選擇唔食, 但佢嘅立場都係見意我食。 而家咁嘅情況都冇咩理由唔食囉! 副作用嘅嘢都唔諗得咁多, 為有見步行步啦!
    我而家唔敢做太大嘅運動啊! 因為出汗會令電療嘅位置好痕同唔舒服咖! 上星期日天氣好悶熱, 搞到出咗汗冇即時換衫, 嗰晚當堂有痕有痛呀! 所以暫時我都停咗冇做運動住囉!
    個菜湯煲一個鐘到就得咖啦! 幾好味咖!
    我而家日日喺到倒數, 好似跳跨欗咁, 一個一個咁跨, 就嚟見到終點咁呀! 真係好期待啊!
    你都努力呀! 希望你嚟緊哩個星期順利打到第四針啊!

    回覆刪除
  8. 唔使驚,我打完化療針,未開始電就開結食啦,
    喂喂,唔好着爸爸喎,cool 住,皮都好易甩.
    嗰d副作用.....我有 疲倦, 潮熱, 陰道分泌增加,呢幾樣丫,搞到好似更年期咁.


    [版主回覆06/06/2010 19:27:00]其實都冇得驚咖啦! 食就食緊咖啦! 而且你講嗰啲我自己亦預咗會有, 因為聽幾多人都有, 但只希望嚴重嗰啲冇我份囉!
    夏天出街唔著爸爸...有啲難度喎! 我而家著啲學生著嗰啲囉! 暫時都ok啦! 多謝晒你嘅提點啊!

    回覆刪除
  9. Hi,
    Knowing that it's a hard and long road.  If doctor recommended to take it, just ignore those side effectsssssssssssss.  BTW, have you checked with doctors if other choices.
    Keep going, be happy  waiting to see you.
    [版主回覆06/07/2010 20:56:00]醫生話如果過咗更年期嘅人就可以選擇一啲副作用冇咁大嘅藥, 反而我嘅年紀就冇得簡, 只有哩隻藥啱食, 但要冒上面嘅風險, 不過佢話目前擔心嘅係復發, 而唔係未必一定有嘅副作用, 我都有問過一啲喺私家醫院睇過嘅人, 佢哋話私家醫生都係話食哩隻藥, 所以都唯有接受啦!
     我都期待七月可以一切回復正常, 多謝你一直以嚟嘅鼓勵、支持啊!

    回覆刪除
  10. 我都要食荷爾蒙藥,醫生話永遠都要食,但係我冇乜反應,只係肥咗d.
    為咗身體好,最好都係要聽醫生話,你都係呀!加油!
    [版主回覆06/07/2010 20:59:00]永遠都要食...???? 嘜唔係五年咩? 你冇咩反應咪好囉! 你即係有事嗰5 個同99個囉!
    我會聽醫生講照食咖啦! 大家一齊努力啦!

    回覆刪除
  11. 西藥一般都有副作用,但為了減少復發的可能,頂硬上喇,妳用跨欄作比喻十分恰當,好快到終點,完成所有療程,努力!
    [版主回覆06/07/2010 21:02:00]我知憑藥都係有副作用, 但始終都心存一繼希望同自己講唔關我事, 但想還想, 現實又歸於現實要接受啊!
    ! 其實我都係亂"up"咖咋!  多謝你嘅鼓勵啊!

    回覆刪除
  12. 我試過冇食一段時間,因為越食越肥,覆診時醫生問我係咪冇食藥,我死都話有,佢話覺得我冇食,都唔知佢點發現,可能係驗血發現,因為我三個月驗一次血,嚇到我以後都唔敢唔食,因為醫生話唔食藥後果自負.
    [版主回覆06/08/2010 11:05:00]唔食....你唔好啊! 你真係要聽話啊! 不過我而家未開始食, 因為有啲病友同時係有睇私家醫生, 有啲重係研究乳癌嘅專家, 佢哋都話應該係完咗電療先開始食, 原因係嗰啲藥係影响荷爾蒙, 但同時又做電療就令個乳房組織起唔好嘅變化, 唔係每個人都會發生, 機會率係15%, 我都有問過自己個中醫, 佢都唔讚誠兩樣一齊進行,  咁既然都只係遲十幾日, 所以我自己諗住完晒電療療程先開始食囉!

    回覆刪除
  13. 祝早日康復!
    [版主回覆06/08/2010 11:05:00]Thank you!!

    回覆刪除
  14. 漱口水也許可快些使傷口癒合。
    「雕轉」應為「刁鑽」
    [版主回覆06/08/2010 11:13:00]因為我唔鐘意漱口水啲味, 所以醫生開咗比我都冇用, 我用鹽水囉! 都ok啊! 多謝小子幫我更正呀! 我打嗰陣都知錯, 但就冇辦法諗起點寫, 連少少印象都冇呀! 真係唔該晒你啊!

    回覆刪除
  15. 係呀!要持續成年咁耐呀! 靜脈曲張嚴重咗....咁會有咩影響.....咪易攰D &有時企得耐會痛 lor。試過M無來半年,之後又來返就勁多,同過 e生講佢話係正常副作用,無treatment。唯有自己食牛肉補血,我睇私家e生就開咗止血药 (其實流量都係咁多),佢叫我M來就停食tamoxifen。唔使擔心 ge,因為都唔會個個月有M。
    我見你有張相出咗頭髮,恭喜晒 wor!
    [版主回覆06/08/2010 12:29:00]啊..! 原來係咁, 我而家對腳都係好攰同冇咩力咖! 唔怪得我個中醫同我講都起碼要捱一年先, 因為好多問題唔係一吓止可以解決得到啊!
    好多謝你嘅寶貴經驗呀! 真係對我好有用啊!
    其實所謂嘅頭髮都係係啲好幼好幼嘅毛毛嚟咋! BB你啲頭髮都重多個我呀! 希望佢哋可以長快啲, 咁我就可以唔使喺咁熱嘅天氣下戴帽或假髮啦!

    回覆刪除
  16. Shirley: 做咗17次電療,即係完成過咗一半,繼續加油!放心照醫生開嘅藥食,未必有那些副作用的,起碼對減低復發有幫助。祝早日康復!
    [版主回覆06/09/2010 16:53:00]今日第20次添啦! 不過就真係已經"皮開肉爛"啦!  
    多謝你嘅關心啊! 我會照醫生指示食藥咖啦! 其他嘢我唔諗咁多啦!

    回覆刪除
  17. 要樂觀及勇敢面對呀﹐支持妳。
    [版主回覆06/09/2010 16:48:00]多謝晒你嘅支持啊!

    回覆刪除
  18. 呢一個真係長期意志的考驗!加油!願您跨越一欄又一欄!
    勁過劉翔、強過羅倫斯!記念您!
    記得...唔好吹風啊,快完了!
    [版主回覆06/11/2010 17:29:00]多謝你嘅鼓勵啊!

    回覆刪除
  19. 勝利在望!加油!
    [版主回覆06/12/2010 12:42:00]Thank you !!

    回覆刪除
  20. Shirley, 真替你開心..., 看過你放射後的"皮開肉爛"經驗, 的確...有點震撼~  你有沒有看中醫啊? 我在東華醫院看了兩次, 醫師說我皮膚情況比很多病人好, 有中藥調理著是最大的因素吧! 皮膚只是開始有微紅巢皮乾燥等等, 我用好濕的綿塊抺去脫皮, 情況好少少, 再搽gel, 暫時未有太大反應。
    我搽gel的情況告訴了放射師, 他說我搽得太厚.. , 另外, 星期一是第十一次了, 要見醫生啊! 有咩要問醫生呢? 你給我建議吧!
    [版主回覆06/12/2010 12:53:00]我開頭十五次都幾好咖! 第一次見醫生時佢重話唔錯添! 但次數越多, 做反應就越大囉! 我有睇開中醫食緊中醫, 但我啲皮膚平時都係比較敏感, 做手術後貼咗膠布嘅位置都起晒粒粒, 成個月先好, 更何況而家呢!!
    見醫生時我通常話比佢知有咩舒服, 點解會咁, 要點處理傷口, 同埋如果你要食荷爾蒙藥的話, 你問吓佢食邊隻, 有冇得簡啲冇咁大副作嘅食, 我就冇得簡啊! 大致都係哩啲問題啦!
    你都好快到達終點啦! 大家都再忍耐吓啦! 努力...加油!!

    回覆刪除
  21. 我有屋企人都試過電療後要長期食荷爾蒙藥,初初我地都唔知原來真係好易有抑鬱,呢段時間盡量搵多d人倍你啦,或者你可以開始plan定去旅行啦~
    [版主回覆06/12/2010 12:55:00]吓.....會好易抑鬱! 唉! 咁真係好大嘅籍口搵人請我去旅行先得喎!  講笑咋!
    好多謝你嘅提點啊! 我會多加留意同埋諗多啲正面嘅嘢, 我諗會減低會發生嘅機會率卦!
     

    回覆刪除
  22. 不要擔心,你的樂觀性格一定能幫你渡過難關。而且尚有眾多病友的互相支持,這是一場必勝的仗。加油!!!
    [版主回覆06/13/2010 17:00:00]多謝你嘅鼓勵, 我會努力打哩場持久戰啊!

    回覆刪除
  23. 一口氣看了你多個的網誌, 了解到是什麼事了......
    努力努力~十萬個支持~
    一定要繼續開心地旅行
    [版主回覆06/13/2010 17:04:00]多謝你嘅到訪同鼓勵, 旅行係我嘅目標啊! 我一定會努力啊! 你啲旅遊相影得好靚啊! 

    回覆刪除
  24. 九次!!! 捱埋佢 呀!!! 加油!!!
    [版主回覆06/13/2010 17:05:00]多謝你嘅鼓勵, 我會努力捱埋去啊!

    回覆刪除
  25. 請加油!
    [版主回覆06/14/2010 17:04:00]知道! 多謝晒你啊!

    回覆刪除
  26. 您的情況是正常的,所以,說最後十多次要找人與您一起去電電,
    一出街,一陣風吹來,都會使您好不自在,好唔知點!
    您好棒啊!好快就完成了!最後這階段很重要,
    現在天氣熱,有好有唔好,唔好的因為經常出汗,令皮膚容易痕痕,
    好的,就是您可以用冰毛巾輕輕抺身,當做沖涼,
    切忌浸浴,也盡量要保持乾爽,別用爽身粉啊,
    那些醫院建議的CREAM / GEL,初初都可以塗的,
    但當您現在的皮膚開始"損損",就唔好搽住羅,
    因為D 膏膏黏住係皮膚度,仲難清潔,天氣一熱,您一出汗,
    就會覺得好似有層野封住咁,又容易有味,
    所以,可能用凍毛巾敷敷、飲多D清涼的東西,
    家居要保持好涼快!心境要保持好暢快!
    電電的位置要保持好乾爽!咁您就會好快完成羅!
    加油!倒數倒數!Pray for you and your victory!!!!!!
    [版主回覆06/14/2010 17:16:00]好彩而家間中會落吓雨, 咁就唔覺得太熱囉! 痛嘅程度我都重可以接受, 係痕就真係好難忍呀! 如果喺屋企我會用冰袋敷吓! 真係舒服好多又止痕, 我冇搽gel呀! 淨係搽醫生開嘅潤膚膏同止痕膏, 隻潤膚膏都ok咖! 搽咗好吸收又唔泣, 所以暫時我嘅情況都可以接受, 再者比起化療, 哩啲都係比較濕碎啊!
    好快啦! 重有8次就大功告成, 我而家日日喺到倒數呀!
    好多謝你嘅祝福啊! 有你嘅祝福就一定順順利利啊!

    回覆刪除
  27. 重有8次咋, 努力, 終點在望啦!!
    [版主回覆06/14/2010 19:41:00]多謝晒你呀! 你都好好休息準備七月正常運作啦! 希望你以後一切順順利利, 開開心心啊!

    回覆刪除
  28. 不用太注重每個醫療過程細節,應該望過遠處岸邊,碼頭愛哪?
    噢!就到了,預備上岸啦,傻女 Shirley
    [版主回覆06/14/2010 19:45:00]我望到小子企喺岸邊歡迎我呀! 所以我而家好努力游緊啦! 重有個幾星期就可以上岸啦!

    回覆刪除
  29. 成功在望啦!
    [版主回覆06/16/2010 10:03:00]係呀! 真係多謝晒呀! 你都要努力呀!

    回覆刪除
  30. 倒數啦!!!完晒療程後,也要好好調養身體啊!繼續加油加油啊~端午節快樂~
    [版主回覆06/16/2010 12:31:00]咁啱! 我啱啱都去咗你個blog到呀! 你聽日打針都要努力啊! Happy 端午節!!

    回覆刪除
  31. 加油啊~~~
    [版主回覆06/18/2010 16:07:00]Thank you 呀! 重有四次咋!! 好期待呀!

    回覆刪除
  32. 咚咚:媽咪你要開心快樂啊!2010年7月4日 清晨7:55

    hi !給你打打氣~_~
    [版主回覆07/04/2010 10:58:00]療程已經完成晒啦! 多謝晒你啊!

    回覆刪除