2010年11月2日 星期二

台中輕鬆四天團 ~ 25/10/2010 (Day 1 - Part 1/2)

以前去台灣首先要做嘅嘢係去簽台證,手續雖然唔算太麻煩,但申請嘅時間都幾長,首次申請要成三個星期,我自己唔係第一次都要成個星期先出到個台證。不過而家實施咗網上簽證就真係方便好多啊!唔知係咪咁,近排身邊亦都多咗好多人去台灣,不過大部份都係去台北或高雄、墾丁,台中就好似少啲。


選台中係因為行程中有一個清境農場同埋去日月潭浸溫泉,成個行程都好休閒,亦唔須要行太多路,好啱同屋企人去,所以由最初報名係六個人到最後一行十人,真係好難得啊!


因為係跟團,所以雖然十二點幾機,但九點幾要去到機場集合,今次集合嘅地點喺機場二號大廈,原來機場巴士亦可以喺二號大廈落車。



巴士站喺正大堂門口,真係幾方便啊!



哩四日嘅領隊兼導遊,報到先!



其實話就話喺二號大廈過關,但最終都係搭無人駕駛列車同巴士去返一號大廈嘅閘口上機。


行咗一大段路坐埋無人駕駛列車先嚟到哩個坪台等巴士去上機嘅閘口‧



都等咗成兩個字先有一班巴士。



香港機場真係好繁忙,哩啲裝行李嘅車同巴士不斷咁穿來插往。




搞咗大半個鐘終於去到上機嘅閘口啦!



好細隻嘅飛機仔呀!



每邊三個座位



飛機起飛無耐,就開始派發飛機餐,成個餐最好食係個cookie呀!


剛剛派完餐嘅空姐,即馬不停蹄開始收返啲餐具,成個過程都係半個鐘內搞掂呀!



話咁快,個半鐘頭機就到咗台中機場嗱!


過關都好快,工作人員喺我哋自已印出嘅入/出境A4紙上打個印就得嘞!感覺有啲兒戲呀!




台中機場以前只不過係一個軍用機場,所以面積相當細,一眼就見晒,而且設備一般。



機場有一間找換店,據知以前係由私營機構運作,唔係成日開工,或者啲台幣換晒就收工,所以以前旅行社通常會見議喺香港換晒錢先過嚟,不過而家由台灣銀行接管,基本上唔會再有哩啲情況出現,而且個匯率都唔錯,1蚊港幣對3.92台幣,不過要收返100蚊台幣嘅手續費;如果對返港幣就要收港幣30蚊。


我哋喺香港換晒錢,所以過到嚟只係等啲團友換,又遇啱有班長春團,佢哋人人都要換,所以搞到大排長龍,搞咗成個鐘先走得啊!



差唔多三點先離開台中機場,旅遊巴行咗無耐就見到哩座金頂嘅建築物,覺得幾靚所以影咗佢,但原來佢就係中台襌寺,聽日嘅行程都會去啊!



個半鐘車程就嚟到霧社風景區,屬於南投縣。



哩個係停車場,我哋旅遊巴係上唔到去住宿所在嘅山路,所以要喺哩到落車再等民宿安排van仔分批接我哋。


我哋係用哩隻雙層旅遊巴。




全台灣海拔最高嘅Starbucks




導遊話台灣有三多,7 eleven係其中一多,哩間係台灣海拔第二高嘅7 eleven。



由於位處高山,所以啲包裝食物全部都漲卜卜呀!



佢哋便利店賣嘅飲品種類真係好多,同日本真係好似啊!



真係多到樣樣都想買啊!



哩啲手信嘅價錢都唔平啊!



個商場好有富良野feel呀!真係人在台中,心在日本呀!



四處都放有bear bear 熊。哩啲舖頭主要係賣薰衣草嘅產品。





                                                                                                     .....續 (Day 1 - Part 2/2)


3 則留言:

  1. Shirley :           咦 ~ 台灣都幾唔錯喎 , 有D日本Feel ~ 
    "清境" 果度電視都有介紹過 , 正 ~ 
    Bye Bye !
    [版主回覆11/04/2010 08:52:00]可能台灣比日本統治得耐, 其實好多地方同日本都好似, 尤其佢哋啲便利店, 之後我住間溫泉酒泉, 入咗去你真係以為自己喺日本呀! 所以去唔到日本住, 而家喺哩到頂住引先啦!

    回覆刪除
  2. ~~ DoNaLd & IrIs 愛閒遊 ~~2010年11月8日 晚上11:48

    咦?妳去左旅行玩呀,真好啦
    [版主回覆11/09/2010 07:23:00]He ~ He!!  係呀! 好耐無出動嘞! 去玩幾日做個熱身先囉!

    回覆刪除
  3. 呢個商場賣D野係有D貴架。

    回覆刪除