2010年11月3日 星期三

台中輕鬆四天團 ~ 26/10/2010 (Day 2 - Part 3/3)

四點幾已經返到今晚住嘅酒店 ~ 雲品酒店

點解咁早返酒店?因為哩間係一間溫泉酒店,裡面有好多設施比住客享用,所以我哋亦被安排早啲返酒店享用酒店設施。



一入門口就會見到哩個雕像,喺人哋個blog睇過好多次,而家終於由自己影出嚟啊!
日頭影佢因為背光,所以黑蚊蚊。


夜晚開咗燈就可以見到佢嘅真面目嘞!


大堂側放咗一排陶瓷,其實喺玻璃後面擺放咗五部電腦比住客用啊!





好嗱!急不及待返房睇吓咩環境先!

一出電梯,無敵大湖境。


好大間房呀!不過露台唔係向住日月潭就有啲失望啊!






每間房都有自己嘅風呂,流出嚟嘅都係溫泉水。




坐廁都係同日本用嘅一樣啊!


枱上放咗生果同典奇餅,重有雪櫃裡面嘅所有飲品都係任食、任飲,唔需要額外比錢咖!


表弟間房比我哋後幾間,所以佢哋可以見到日月潭嘅湖景,對面山頭就係聽日會去嘅文武廟。



見重有時間,我哋先去酒店旁嘅棧道行到日月潭嘅湖邊影吓相先!









環境好舒服,感覺真係好休閒啊!行咗一圈都五點幾開始日落嗱!





睇完日落就返房換衫去游水,溫泉區有分要著泳衣戴泳帽嘅溫泉,哩面有好多個按摩池同25米游泳池,重有個兒童戲水池;另一區就好似日本傳統溫泉咁咩都唔使著就係咁浸。 我本來諗住玩完按摩池先去浸傳統溫泉,但游完水按摩完,沖埋涼過去時,工作人員話溫泉內只限二十人同時用湯,因當時已經滿額,要我哋起碼等半個鐘以上,所以我哋最後決定返上房浸。


浸完成個人都鬆晒,重有啲肚餓,係時候食飯嗱!

臨去食飯前,出酒店門口影吓相先,之前我見人哋個blog影酒店門口個水池好靚咖!不過我個傻瓜機影得嘛嘛哋。


哩餐係食buffet,係成個行程最豐富嘅一餐,好多嘢食,啤酒、汽水任飲。










大家都食到好飽,八點半廣場開始有民族表演,B女同肥家姐有去睇,我就無去啊!我襯啲人去晒睇表演,我就緊係去浸返個溫泉啦!


浸完溫泉後,就喺酒店內打咗個圈,哩到真係好多嘢比住客玩啊!





得閒玩返盤先!



行完返上房食埋今日晏就買嗰條腸,其實真係好飽,不過買咗唔可以唔食咁嘥嘢嘛,啲味道都唔錯,啲腸味好香啊!



食飽飽,又係瞓覺嘅時候嗱!

                                                                                                .....續 (Day 3 - Part 1/2 )


7 則留言:

  1. 呢日住嘅食嘅用嘅確係得喎...
    [版主回覆11/03/2010 16:54:00]係呀! 如果自己訂要港幣2,800蚊呀!

    回覆刪除
  2. 呢間酒店環境,設備和食物唔錯喎!
    [版主回覆11/04/2010 08:45:00]哩間酒店真係一流呀!

    回覆刪除
  3. 噢,呢間商號係小子一向最信任的。
    [版主回覆11/05/2010 09:38:00]係呀! 我以前去邊到都係幫襯佢咖! 但幾年前去個京都團遇著個好冇操守嘅導遊, 搞到我唔敢再跟佢哋嘅日本團,開始咗自由行。今次上旅行社報團竟然哩個無良導遊重喺到做,所以除咗日本,其他地方我好樂意選用哩間旅行社啊!

    回覆刪除
  4. 妳應該為妳景仰的公司和自己及其他顧客著想,向公司反映,篤他出來,功德無量了。
    [版主回覆11/07/2010 07:49:00]我知其他團友有投訴佢, 所以行程完咗佢哋有工作人員打比我跟進, 但佢而家仍然喺到做囉! 可能佢已經痛改前非, 但對於我自己嚟講就好大陰影囉! 希望唔會影响咗到你啦!

    回覆刪除
  5. Shirley :            呢間酒店真係超正呀 ,    大堂個雕像令我諗起 "新蜀山" 裡面既 "張柏芝" . 
    Bye Bye !
    [版主回覆11/07/2010 07:52:00]哩間酒店係正、正、正,所以哩團比其他公司貴少少我都幫襯佢,因為佢保證係入住哩間酒店吖嘛! 我無睇過新蜀山,但我知你想講嗰種feel呀!

    回覆刪除
  6. 其實他被調回門市工作,已是你們勝利了,公司認為他罪不至死,只是一時貪念害事,所以把他調到冇油水撈的崗位,小懲大戒也,公司仁慈。
    [版主回覆11/07/2010 20:38:00]其實哩間公司有一向有規定唔使出團嘅導遊都要坐counter,因為佢哋可以更深入介紹行程,所以我唔覺得對佢嘅懲戒囉!不過我都唔理咁多洛,反正而家我去日本都一定自遊行呀!諗真我要多謝佢先真啊!

    回覆刪除
  7. 悠悠閒閒咁又過左一日喇!
    [版主回覆05/13/2013 12:47:11]係呀! 因為哩次行程有幾個老人家一齊, 所以尊登揀哩團唔趕, 唔辛苦嘅團, 所以每一日都好悠閒咁過呀!

    回覆刪除