Day 7.4 @ なばなの里(長島名花之里) Part 1

2013年4月28日 天晴
07:58~08:32 | 名鉄犬山線鵜沼方面 | 名鉄名古屋 → 犬山遊園
12:07~12:32 | 名鉄犬山線名古屋方面|犬山→ 名鉄名古屋
14:00~14:31 | 名鉄高速巴士 |名鉄巴士中心→ なばなの里(名花之里)18:15~18:46 | 名鉄高速巴士 |なばなの里(名花之里)→ 名鉄巴士中心

(交通收費及詳細資料請往交通篇)酒店：名鉄グランドホテル
返到名古屋已經十二點半，由於都行咗成朝，我先安排B女返上酒店休息一陣，我同大笨蛋就去名鉄百貨嘅超市買定哩晚嘅晚餐，因我哋相信我哋去完名花之里返嚟已經唔會再有能力落街搵嘢食，但又驚大晏超市會收工，所以都係買咗先，而且酒店只係喺樓上都好方便。抖咗陣就落去三樓名鉄巴士中心買車票前往なばなの里(名花之里)。

就喺巴士中心內嘅長島溫泉Counter買就可以啊！套票詳情可以參考交通篇。

套票包來回車票、なばなの里入場費及秋海堂溫室入場費。

巴士班次都開得幾密，15分鐘一班車。我哋坐下就2:00開出嗰班。

由於時間關係我哋只係喺巴士中心旁嘅Family Mart買咗啲飯團同三文治喺巴士上面食，哩個巴士中心好多高速巴士去日本多個地方，好似新宿、京都、松本等，所以哩間Family Mart好多人都會喺到買哩食坐長途車，不過唔知係咪我哋咁啱唔係上貨架時候，便利店裡面可以選擇食嘅嘢已經所剩無幾囉！

準時2:00上車

全車得十多人，所以坐得好鬆動呀！話咁快兩點半就到啦！

巴士去到公園門口落車。

因為已經買咗套票，所以唔使喺門口排隊買票，可以直接入場，哩日係星期日都幾多人啊！

公園面積係非常之大，分咗好多區。

園內各種花草，有見過、有未見過，花痴B女入咗園就已經唔理我哋，自己行咗去啊！

哩個花我之前未見過。

紫色都好靚啊！

公園中間有個湖，湖邊嘅教堂係公園嘅標誌，頂樓嘅鐘會不時響起鐘聲咖！

 

哩到有個旋轉展望台，可以喺上面睇晒公園同埋附近嘅全景咖！當然要額外比錢啦！

行咗10個字就入去前面嘅溫室(玻璃屋位置)啦！ 下面嘅相全部都係花、花同埋花，如果唔鐘意花的話可以跳走啊！

雖然我已經上網睇過溫室內嘅情況，但門一打開都係忍唔住要嘩返幾聲，因為真係好震撼。

 啲秋海堂又大朵、顏色又多，數量又多。

攞住個相機都唔知點影好呀！

 

有啲好似塊面咁大呀！

 

除咗地下一盆盆外，天花都吊滿晒啊！

 

除咗秋海堂，哩到啲吊鐘花都好靚啊！

過咗吊鐘花區就會見到牽牛花

 

 啲顏色真係好靚。

黑色牽牛花都幾特別啊！

 

過咗秋海堂溫室就會去到室外嘅玫瑰園，不過我哋去嘅時候係四月，啲玫瑰花未開，要等到六月先有花睇，哩到都係溫室範圍內，所以如果要睇玫瑰花都係要買溫室嘅票先可以入場。 我哋雖然睇唔到花開，但B女話見到好多品種嘅花冧喎！

無玫瑰花都影吓啲花仔啦！

唔好以為就咁就完，過咗玫瑰園又經過另一通道入去另一個溫室。門一打開，又係大堆頭嘅秋海堂。

唔好以為不外如事都係咁，向行前啲。

嘩！哩個水池真係好靚，天花吊滿晒花，水池反影返啲倒影，真係好靚。

謝咗嘅花就放喺水池比遊人影相同攞嚟玩。池水係流動，啲花會跟住水流郁動，所以個畫面真係好靚。

啲花真係好大朵咖！

溫室內重有好多花。

好似條毛毛虫呀！

唔知佢點搞到啲花可以咁有舖排咁出啲顏色啊！