巴黎、瑞士之夢想自遊行(第八天)

04/07/2008(星期五)　雨天/晴天   策馬特(Zermatt) →西昂(Sion)→ 策馬特(Zermatt)

今朝一早起身第一件事就係去窗口望吓咩天氣先！噢…地下濕晒，個天都係濛查查，唉！好失望啊！

懷住失望嘅心情去食一個豐富嘅早餐，啲乳酪好好味呀！跟手靜靜雞包多份三文治做晏就，咁又慳返餐。然後我哋返上房都煲咗6隻蛋做後備。

由於天色重未好轉，我哋諗住下就先上山，今朝就出返去附近啲地方行吓先，本來想去薩斯菲(Saas Fee)，因為有blog友介紹過嗰到好靚，但睇過地圖又好似略為遠咗啲，一來一回都幾費時，所以最後決定近近哋去西昂(Sion)。

位於瓦萊州的西昂(Sion)， 是瑞士境內歷史相當悠久的一個古城，舊城區裡的石板路以及古老的房舍，是來到西昂古城一定要去體驗的地方。山丘上的兩個古城是一大焦點，而陶魯比永城(Tourbillon)雖然沒能保有當年最佳的狀況，但經整修後如今被瓦萊(Valere)城用作歷史博物館。
古城之外， 西昂同時也是瑞士最大的葡萄酒生產地，近郊的山區以呈梯田般的景觀、種滿美麗的葡萄樹，每一個季節、都有截然不同但卻一樣迷人的風情。

一個鐘頭車程就到咗西昂啦！哩到勁好天呀！我哋出咗車站就向住城堡個方向前進。其實我哋並唔係想上城堡，只係想比較近距離影吓佢姐！

行咗都成七八個字先入個舊城區

然後再上好多樓梯同一條長長嘅斜路先見到佢個背影呀！

如果要上到去有一條漫長嘅斜路呀！都唔好搞啦！哩到啲風景都好靚吖！

影咗一輪相又抖咗輪後就落山啦！咁好天係時候返去搵阿馬特洪峰啦！

肚仔餓食啲嘢先！

返到策馬特一點幾即刻搭Gornergrat Bahn(康娜葛德登山鐵道)上山啦！有Swiss pass半價，當纜車開咗五六分鐘到已經見到馬特洪峰啦！雖然重有啲雲遮住但總好過咩都睇唔吖！

大槪九個字到就去到終點站 - Gornergrat，上到嚟個馬特洪峰已經被雲遮晒，但四周圍啲風景真係好靚呀！

喺觀景台可以好近距離見到Gornergletscher冰河。

哩到有間小聖堂，B女入去祈吓禱，希望我哋今次旅程順利同可以比我哋見多啲馬特洪峰。

重可以同好得意嘅聖伯納狗影相呀！但係要比錢嫁！

啲日本人見個負責人行咗就個個都係咁走埋去同佢影，到嗰個人返嚟佢哋都叫唔聽，所以最後個人用把好大嘅太陽傘蓋住佢哋啊！真係慘！如果唔係嚿雲遮住馬特洪峰我都會比錢同啲狗狗影相。(雖然我係好驚狗)

山頭上突然走咗兩隻羊出嚟！見到啲人提起相機其中一隻重擺Pose比我哋影啊！

逛咗輪我哋就搭返纜車但並唔係返落山喎！我哋只係搭一個站喺Rotenboden落車然後就行山呀！因為好多旅遊書都介紹由Rotenboden行去Riffelberg哩段山路唔難行但啲風景好靚。

果然冇介紹錯真係好靚，我咁懶就運動嘅人都唔覺行得好辛苦，好快行到去利菲爾湖(Riffelsee)，但因為啲雲硬係唔肯遠離馬特洪峰同埋當時有啲天陰，所以影出嚟啲相冇旅遊書嗰啲咁靚啊！

過咗利菲爾湖後都四點幾啦！我哋就抖一陣食個晏仔先！喺今朝喺hostel包定嗰份芝腿治呀！

開完餐又繼續行啦！話咁快就到咗Riffelberg個車站，但由於啲風景實在太靚啦同埋個馬特洪峰亦越嚟越清楚，問過B女佢又話唔倦所以我哋決定行多個站去Riffelalp。

哩段路都一樣唔難行一樣咁正唔難行。

好似行多大半個鐘就到咗Riffelberg站，原來哩到會係明日馬拉松個終點站嚟嫁！

我哋就喺哩到上返纜車返落去策馬特，跟住行陣街買吓心頭好就返Hostel食晚飯。

今晚啲甜品嘛嘛哋！好鬼甜呀！

食飽飽返到房一開窗就見到好迷人嘅馬特洪峰啦！我成晚都好滿足咁對住佢呀！

 黃昏吓嘅馬特洪峰(重一啲雲都冇啊！)

嘩！一模一樣呀！

入夜嘅三角朱古力呀！(已經十點幾啦！)

今日真係好開心啊！我見啲旅遊書景哩個馬特洪峰嘅日出好靚，睇吓明朝知唔知醒先！

食: 香蕉3隻: CHF2.60

行: ZermattàGornergrat來回: CHF114.00 (CHF38.00 x 3)

手信: CHF30.00

住: CHF213.30 (CHF71.10 x 3包晚餐及早餐)