巴黎、瑞士之夢想自遊行 (第二天)

28/06/2008(星期六)　雷雨    香港 → 巴黎

今朝一早就落Lobby集合等法航職員同我哋入閘，點知去到機場嗰位職員叫我哋去排隊搞個登機證，吓！我哋同佢講我哋已經有登機證啦喎！佢先矇矇吓咁話唔係呀話！然後佢打返公司再問情況，其實佢哋自己都好混亂，根本我哋有晒登機證就唔須要咁早就出嚟！

我哋同另外一組嘅香港人聽到個職員講話其實班機重未到，跟本唔係好肯定係咪7:25飛到。嘩！我哋聽到都呆咗！重要delay唔好玩啦！但佢對住我哋就死到話得囉！然後有人嘈住未食早餐咁佢又refer完上頭就每人派咗張60蚊早餐券同比換返張啱嘅Certificate，咁我哋就入閘。

唔知係咪真係咁黑仔，入到海關到竟然打晒蛇餅，原來太早海關未開晒工，得兩個counter開但又有幾團旅行團一齊入嚟搞到人山人海。

又搞一輪終於去到登機閘口，亦都見到隻飛機喺到，但都重好似唔放心都唔知係咪真係可以如常起飛。

唉！有廣播話有雷雨同閃電，可能有啲航班須要延遲，唔好再玩我啦！

話7:25起飛但最終7:35先比我哋上機，最後成九點幾終於可以起飛啦！

坐咗個幾鐘就派餐啦！味道OK啦！

食飽飽就瞓吓覺打吓機啦！因為法航無咩戲好睇，大部份都係講法文嘅戲，好彩有個上海麻雀我識玩姐！

法航派完餐後會到臨落機前嗰個幾鐘先會再派餐，如中段你想食嘢同飲嘢就自己行去機中間或機尾自己攞，佢哋會不段咁放啲水呀、三文治呀、雪糕呀、杯麵呀咁囉！

好嘞！終於等到食第二餐啦！食飽就快落機啦！

載高樂機場都幾大吓！我哋都行咗好耐先去到入境嘅海關，不過過關就好快，攞埋行李後就去搵火車站市區嘞！

我哋跟住RER個指示板去到火車站售票處，好多人排緊隊，我哋買咗張車票去Luxembourg同10張carnet，但個售票員並冇同我哋講啲咩！

咁跟住咪落月台囉！但水牌顯示並冇我哋要去個站，終點站只係去到我哋目的地前三個站Gare Du Nord，月台又無人問，車廂裡面得一個人想問吓啦！原來佢係乞丐嚟，未問都已經嚇鬼死呀！跟住有啲黑人上車講一大輪又唔知佢哋講咩！最後有個女人話我哋個站今日唔會開去嫁啦！叫我哋喺Gare Du Nord轉車啦！

唉！咩地方嚟嫁！又冇指示又有廣播，頭先買票嗰又唔講，之前啲人已經話唔好懷住浪漫之都嘅諗法去巴黎嫁啦！但真係對哩個國際大城市扣咗好多分，而且一落去個火車站月台真係好臭呀！如果合埋眼我以為自己喺洗手間呀！但香港啲洗手間好似都冇咁大陣味呀！再一次…唉！

好快就去到Gare Du Nord，我哋就去票務處問吓我哋點先可以去到Luxemburg或者Cluny La Sorbonne，嗰個人淨係講法文，都唔知佢up咩！總知話去唔到，叫我哋去St. Michel然後行過去定再轉車？真係聽唔到！我咪失張紙比佢，佢寫住Bd St.Michel，咁我哋就出咗RER個閘口然後入去METRO個閘，即係好似九龍塘咁先九鐵再入返地鐵。

咁上咗車我哋不繼咁研究張地圖，但都唔係好明，見到有個亞洲人咪問吓佢囉！佢睇咗輪都唔肯定，跟住有兩個本地人又同我哋睇，重話要轉車叫我哋即刻落車佢帶我哋去轉，我哋拖晒啲喼落車，佢又話唔係叫我哋上返車，吓！到門姍啦！我入得半個喼比到車門夾住，好彩車裡面啲人幫我拉個喼同頂道門，咁B女同LH都可以上返車，真係比嗰兩人玩死，之後有個好心人再問我哋去邊，我索性比我哋酒店地址佢睇，佢好肯定咁話St.Michel個站落車行過去就得嫁嘞！今次之後我哋決定自己睇地圖唔再問人啦！

一出站個感覺好似巴黎戀人個ending阿姜泰瑛啱啱到巴黎出地鐵站嘅興奮心情嗰一幕，但我一啲都興奮，一出站地面成地垃圾，條街亂七八糟，啲車同人又唔跟交通燈指示行，好亂呀！不過前後先知原來今日係同性戀日，頭先好多人喺到慶祝同狂歡，我哋到埗時先啱啱完結。

好彩一條直路行咗十多分鐘經過萬神殿就去到酒店，我哋被安排住三樓，座酒店都幾舊，不過算啦！EUR110一晚又近車站我諗係咁上吓嫁啦！

http://hk.myblog.yahoo.com/jw!xKRw0VmBGB4ShQv8ezyHYho1NuoRnw--/article?mid=2794

休息一陣就去問Reception邊到有Supermarket，原來頭先出站附近就有嫁啦！睇個門口都唔似！

喺裡面第一次感受到巴黎物價，每一樣嘢都好貴，我哋買咗啲生果呀、水呀就返去放底！

搞掂晒都成八點啦！諗住食咗嘢就去鐵塔呀、凱旋門影夜影！但我真係好倦好倦，咁唯有好求奇咁搵咗間日本店食拉麵，哩間啲麵好唔掂呀！又貴又唔好食。

九點幾返到酒店就嗱嗱淋沖涼瞓覺啦！真係好倦，搞咗兩日都冇好好咁瞓過呀！嘩！哩到十點先收太陽，太陽收咗就好似秋天咁涼爽，雖然間房冇冷氣但啲風吹入嚟重涼過冷氣呀！今晚好好瞓啊！

食: Supermarket:€7.46

    (牛奶50cl: €0.82

           乳酪2杯: €1.39

           橙3個2.79kgs: €2.64

           麵包6個: €1.31

           Evian水(5L)2枝: €1.30)

     Dinner (烏東): €8.25 (€7.50 x 3 再加一)

行: CDG à 巴黎市區 (RER B):€8.20x3

    10 Carnet: €11.10

住: €110.00 (三人房)