2014年9月21日 星期日

Day 3.2 @ 和歌山城

2014年5月20日 晴天/雨天
09:50~10:10 | [白浜温泉無料シャトルバス] 南浜千鳥の湯 海舟 → 白浜駅
10:28~11:48 | [特急]くろしお14号 白浜 → 和歌山
12:06~12:16 | [和歌山市内バス] 新內→ 公園前
15:30~15:40 | [和歌山市内バス] 公園前 → 新內
(交通收費及詳細資料請往交通篇)
酒店:天然温泉 紀州の湯 ドーミーインPREMIUM和歌山

個幾鐘頭車程,好順利就到咗和歌山啦!

車駅旁分別喺左邊同右邊都有存物櫃。不過想放大喼嘅櫃只有幾個。當日中午到達時就只淨返一個嘅位置,所以如果打算要喺哩到放置大件行李就要考慮考慮啊!



前兩年京、阪行已經有諗過嚟和歌山,不過時間安排問題最後放棄咗,所以今次再排行程時,就諗住將之前想去嘅地方排返落去就可以,黑潮市場係和歌山熱點之一,當然立刻排上,但因為前兩日我哋已經到訪過白浜嘅とれとれ市場,黑潮市場同とれとれ市場無大分别,而且黑潮市場規模亦不及とれとれ市場,重有由和歌山車駅坐巴士過去嘅車程也不少,基於以上咁多因數我就唔嘥時間過去啦!

我哋先到車駅附近嘅酒店放底行李後,就喺酒店門口嘅巴士駅 (新內) 坐巴士前往和歌山城,喺公園前落車。

(文章來自:和歌山市觀光協會)
和歌山城是天正13年(1585)豐臣秀吉平定紀州後令其弟秀長所建,負責建造的是築城名人藤堂高虎,他建了本丸及一之丸殿。該城首先由秀長的「城代」(守城者)桑山重晴統理,到了慶長5年(1600),在關之原戰役立下戰功的淺野幸長入城。元和5年(1619),德川家康第10子賴宣入城,成為紀州55萬5千石之城,與水戶、尾張並列為德川御三家之一,見證悠久的歷史。

車駅就喺和歌山城入口,好方便呀!

和歌山城比起我之前去過嘅城堡算係比較細,但對於三寶嚟講要上到去天守閣都幾遠啊!

不過我哋唔趕時間,一於就慢步上天守閣

先過橋

同一般城一樣,有條護城河。河裡有好多大魚。

上天守閣有幾條路上,我揀一條梯級比較少嘅行。

公園內有個雀鳥園

見到有天鵝呀!

最後哩段路一定要上斜加石級,三寶努力呀!

終於嚟到天守閣啦!


三寶咁辛苦上到嚟,緊係要同佢哋影返啲大合影,影咗一輪相之後,因為之前去過嘅天守閣知道裡面嘅樓梯又窄又直,姨媽對腳真係不適合再入去爬樓梯,所以B女就陪佢喺小賣店坐坐休息等我哋入內參觀。

買票先!

天守閣內係全面禁止拍照,其實哩個天守閣都係重建,裡面同之前去過嘅有啲唔同,所有梯級都係現代嘅樓梯,完全無一條嗰啲傳統嘅日本好窄嘅樓梯,而且裡面嘅展品亦不算太吸引,所以如果無入嚟參觀亦唔會有太大損失。 不過亞姨同表妹未嚟過哩啲地方就算係見識見識吧!

嚟到最高嘅地方啦!從高高位置欣賞一下哩個和歌山市吧!
   


對面中間高高嗰座係和歌山市公所,一陣會去佢後面嘅內街食晏。

下面哩個就係御橋走廊,走嘅時候會經過啊!

行咗一圈後落返去同B女佢哋會合離開啦!落返山後就會嚟到御橋走廊。

(文章來自:和歌山市觀光協會)
御橋走廊在江戶時代只有藩主及其隨從可以通行,連結作為藩之政廳及藩主生活場所的二之丸,以及紅葉溪庭園所在的西之丸。通道上方設有屋頂,構造上不易從外面看到內部。斜向架起的橋在日本各地相當罕見,由於大約有11度角的傾斜度,為了防止滑落而有高低差的設計。

公園出口有個大大嘅鳥居啊!

跟住我哋就向和歌山公所方向前往搵食,我嘅目標係丸一拉麵 (ラーメン○イ 十二番丁店)。

哩間拉麵店特色係一碗佈滿蔥蔥嘅拉麵。

如果唔鐘意蔥嘅人都唔使驚,蔥嘅分量有得揀,當然如果要特多的話就要加錢啊!

我哋三種都有落單呀!

大笨蛋要「走青」。

亞姨要少蔥。

其餘要普通。

見到佈滿滿滿嘅蔥花真係好開心啊!其實浸濕咗都唔係好多咋!不過啲蔥好香。

唔夠重可以加隻蛋或壽司,哩個壽司喺和歌山都好出名咖!

我哋再加咗個牛肉同餃子

牛肉都還可以

但餃子就.....師傅,係咪燶咗啲呢?

哩餐嘅結論係不過不失啦!咁啱間麵店距離景點好近,喺附近,個人意見係如果係專登搵嚟的話就好似有少少不值囉!

食飽飽後三寶已經攰啦!所以諗住先安排佢哋返酒店休息,我同大笨蛋再作打算,而表妹係一個貓痴,所以嚟到和歌山的話不得不去會一會小玉站長,原本第二日去貴志川摘士多啤利嘅時候可以順道探埋小玉站長,但又咁啱聽日嘅小玉列車停開,同埋貴志駅嘅小玉咖啡館亦係逢星期三休息,既然而家已經無咩行程,我就建議表妹自己先走一趟,而且喺無三寶同行下自由度大好多,想睇咩、影咩、做咩都得。

就係咁大家食飽後就分道揚鑣。約定時間酒店大堂等。

.....續  Day 3.3 @小玉列車 (by Elise Hon)

沒有留言:

張貼留言