2015年4月5日 星期日

Day 2.2 @吉祥寺

2015年3月15日 / 星期日 (第二天)
08:39~08:52 |  (快速) 中央線中央特快  | 新宿 → 三鷹  220円
09:00~09:05 |  コミュニティバス   | 三鷹 → 三鷹の森ジブリ美術館 210円
17:21~17:34 | (快速) 中央線快速 | 吉祥寺 → 新宿  220円

(交通收費及詳細資料請往實際交通篇)
酒店:ホテルサンルートプラザ新宿

離開三鷹の森ジブリ美術館之後,就通過井の頭恩賜公園行去吉祥寺,沿途都有少少微風,吹到面同對手都好痛。

行到吉祥寺,一心要去松阪牛専賣店-サトウ(SATOU)食晏,但當時都唔係好肯定自己位置,所以就同大笨蛋企埋路邊用手機查一下位置同前往方向,點知有一位日本少男走埋嚟問我哋想去邊,於是我哋比咗我店名佢,佢就叫我哋跟住佢行,佢帶我哋喺商場同街市之間穿插,好快就帶我哋到咗舖頭,其間佢不斷問我對佔中有咩睇法,哩個活動對香港有咩影響,估唔到原來佢哋都咁關注我哋香港嘅情況。

嚟到SATOU店前,已經有好多人排隊買牛肉丸,不過我無打算買牛肉丸,因為大笨蛋唔食洋蔥,所以哩個牛肉丸佢唔啱食,而且我哋係想到二樓餐廳食松阪牛。

當時已經係食飯時間,所以窄窄嘅樓梯已經企滿長長嘅龍,我哋要排到去門口位置,大槪排咗八九個字就可以入座。

樓面好細,開放式厨房有三個厨師


客人座位大槪只得十六個。


我哋分別叫咗兩款唔同嘅松阪牛套餐。 先上飲品同沙律。

牛牛到啦!


又嫩又滑,真係好好食啊!

食飽落到街,牛肉丸條龍比之前排得長咗好多啊!

SATOU店旁邊亦有一條人龍,哩間小ざさ/おざさ係賣羊羹同和菓子好出名嘅老店。佢哋哩到嘅羊羹係即日鮮製,數量有限,售完即止,據說店舖未開,當地人就已經一早嚟排隊買羊羹啊!不過我對羊羹不大興趣,所以只係睇睇佢嘅人氣,並無幫襯啊!

當日係星期日,廣場有啲親子活動,所以超多人呀!

跟住我哋向商店街進發。


由於之前搵過資料同同事格過價,吉祥寺藥房貨品價格的確比其他地區平,所以一早已鎖定喺哩到入貨。好似近期超熱賣嘅SuiSai洗面粉,新宿要1800円一盒,上野都要1600円一盒,大阪心齋橋都要1500円一盒,吉祥寺只須要1200円一盒,真係相差好多啊!不過可能因為價錢相宜,所以好多免稅藥房對於一啲熱賣貨品都會每人限量發售。就以哩個洗面粉為例,每人只可以買四盒,目的係唔想一啲人一次過買晒人哋啲貨。

行咗兩個幾鐘,自己同幫人買咗好多藥貼、感冒藥、護膚品等,對腳同對手都好攰,已經無能力再行,購物確實唔係我強項。

最後我哋係咁意行吓激安之後就到車駅旁百貨公司內嘅超市買埋晚餐就返新宿。


返到酒店成個人散晒,雖然只係六點幾但邊到都唔想去了,而且聽日亦要離開新宿早車前往河口湖,所以執好行李,食個晚餐就早早休息了。


3 則留言:

  1. 我都諗住咁去法,三鷹後到吉祥寺。咁排法,牛肉球食唔食好呢?

    回覆刪除
    回覆
    1. 對比神戶食既其實呢間鐵板燒麻麻地
      牛肉球好食

      刪除
    2. 輝哥, Conysan講得無錯! 哩間做法無神戶咁正, 不過都叫做抵食,我喺上野大間叫太昌園燒肉, 佢啲牛比哩間好似更好食呀! 牛肉球好多人都話好食, 而且佢炸好嘢! 一埋去比錢就比貨, 所以條龍雖然長但都好快可以買到, 反而上樓上舖食就真係要等囉! 我覺得去到一定要試吓囉! 我因為團友唔食, 我又食唔晒先無買咋!

      刪除