2016年5月2日 星期一

Day 3 @ 景福宮、三清洞 、馬場

2014年4月10日

地鉄 2號線(綠色) 換 3號線 (橙色) | 梨大 (241) → 乙支路三街 (203/330) → 景福宮 (327)
地鉄 3號線 (橙色) 換 2號線(綠色) 換 5號線(紫色)  | 安國 (328) → 乙支路三街 (330/203) → 往十里 (208/540) → 馬場 (541)
地鉄 5號線 (紫色) 換 2號線 (綠色) | 馬場 (541) → 往十里 (540/208) → 梨大 (241)
哩朝早餐大家都食粥呀!

哩日好好天,個天好清呀 !可以望到首爾塔呀!

今日嘅目標係景福宮,哩個係跟團必到景點,所以我都嚟過三次,但美領隊同大笨蛋都未嚟過,又適逢櫻花季節,就過嚟一遊啦!

景福宮車站內設計都有啲特別擺設。

行出車站,重未到入口就已經見到好靚嘅花啦!

好多人排隊入場呀!


我哋都買好票可以入場嘞!


好多旅行團呀!

官員排位,九品企得最遠,我同大笨蛋講我企九品位最啱,平時有咩嘢都唔好搵我,企到遠遠老細都搵我唔到。大事理唔到、小事唔使理,哩個post啱我呀!

但係大笨蛋話我無大志,點都要去正一品到影返幅。

好多人迫喺主殿外,就係為咗影個皇位,但比起紫禁城內嘅皇位,哩個真係差得遠。


哩日天氣真係好到不得了呀!


跟住我哋就係殿後嘅花園賞櫻嘞!影花有個藍天效果真係差好遠,亂竹影都係靚咖!

















哩到係接見外國大使嘅慶會樓,入內參觀要比錢及預約。

我哋就只係喺外面影張合影就算嘞!哩個位亦係旅行團嚟到此一遊必影嘅位置

 我哋都行咗兩個幾鐘,差不多食飯時間,我哋從光化門離開步往北村路嘅大瓦房食醬油蟹。

喺大街見到一隊電馬隊伍,好有型,所以即刻攞起相機影相,影完先諗會唔會佢哋即刻停車埋嚟叫我delete返啲相,都係唔好咁張揚,拿拿臨收返埋個相機走人。
 

準備過馬路時又見到一批又一批嘅警察喺到巡邏,香港通常兩個、兩個,哩到吓吓都一隊一隊。覺得幾得意又影吓先,今次隔條大馬路Zoom埋去,應該唔會被發覺。

北村嘅建築物好韓式


哩到就係我哋行程嘅重點美食呀!我期待咗好耐啦!一直都有人話醬蟹唔衛生,食咗會生蟲,所以喺香港好想試但最終都無食過,不過嚟到韓國點都要試吓!始終人哋國內做咗咁多年生意,仍然有咁多人食緊,應該有啲保証!而且我哋今次揀哩間係已經有四十年歷史嘅老子號嚟咖!

睇吓餐牌先,醬蟹W50,000一隻,我哋六個人叫咗兩隻。

哩個蟹醬拌飯超推,如果一個人嚟食唔到咁多嘢,叫哩個已經有晒醬蟹嘅精華,超超好味呀!

另外再叫個燉牛骨同豬肉,點完餸就好快上一碟碟嘅前菜。

 

一下子就擺到成張枱滿晒

店內無大枱比我哋,所以六個人兩張枱,同樣放滿晒。
 

我哋嘅主角,醬油蟹,而家睇相都流口水呀!


 每隻蟹都會跟個湯同一碗白飯。

另外叫咗個牛肋骨

重有燻豬肉

另外哩個醬蟹拌飯,有碗蟹肉同蟹膏。

將一碗白飯倒入哩個裝有配料嘅碗,然後再加入上面嘅蟹肉、蟹膏。

 撈暈就係一碗超好味嘅醬蟹拌飯呀!

 成餐飯都食得好滿足,好開心呀!食飽就去隔離三清洞行街呀!



三清洞被譽為時尚悠閒吨地方,哩區有好多特色小店同Cafe。










但行街確實唔係我強項,我同B女媽咪宣佈投降,行完三清洞,美領隊同團友繼續向仁寺洞進發,我就同B女媽咪喺安國站附近嘅咖啡店坐坐休息。

店裡有閣樓
 

我哋揀一個近窗邊位置
 

叫咗個木瓜茶同紅棗茶,甜甜咁幾得意。 

休息咗個幾鐘,團友返嚟搵我哋集合去馬場食飯。馬場 .... 無馬跑咖!只係一個食牛出名嘅地方。

一出車站就見到哩到有間燒肉店,重以為哩間就係,點知係啊!

經過運動場後再經過長長嘅街市

 

不過已經係八點幾,所以好多檔口都收咗工啦!



行咗半個鐘終於到啦!哩晚嘅目標 - 龍門家 


當晚本店滿座,我哋被帶到距離本店幾分店嘅大廈內二樓。

一坐低,亞朱媽就幫我哋擺到一枱前菜。


我哋六個人叫咗兩盤牛,分量有啲多。






夾埋啲蔬菜食無咁滯

個餐重包兩碟牛刺身

因為啖啖肉,所以食得好飽,走嘅時候已經十點,原本計劃之後一日要五點幾出發去南怡島,但整個人真係好攰,而且B女媽咪哩幾日行咗好多路,佢好似已經頂唔到再行太多路,所以飯後同其他團友商量後就決定唔去南怡島,美領隊再度吓明日行程。咁我哋十一點幾返到酒店後就各自回房休息吧!






沒有留言:

張貼留言