酒店機場巴士 | 梨大Ever 8 → 首爾仁川機場
韓亞 OZ745 | 首爾仁川機場 →香港
嚟到行程最後一日嘞！今日美領隊安排咗嘅行程係自由活動到下午四點返酒店集合出發去機場。最初係計劃喺酒店附近坐返6002號巴士出機場，但我哋入住酒店時發覺酒店係有機場巴士出機場，就喺酒店門口上車，而且車資只係W8,000，比巴士平W2,000添呀！
為咗哩日自由活動，我都頭痛咗一陣，諗去邊呢！又行街，但我真係無咩買喎！突然我諗起成日睇韓劇見到啲主角去汗蒸幕，而且我、大笨蛋同B女媽咪都一向鐘意浸溫泉，加上韓國嘅汗蒸幕有得浸、有得食、有得中瞓，要玩幾個鐘一啲都唔係問題，所以我哋今日嘅重頭節目就係汗蒸幕嘞！
新村汗蒸幕就係酒店步行十多分鐘就到，我哋先喺酒店食早餐，然後帶啲輕便必須品步行過去新棧汗蒸幕嘞！
新村汗蒸幕 (Shinchon Rest)
名稱：신촌레스트
地址：서울특별시 서대문구 창천동 13-52 (서울특별시 서대문구 연세로4길 22)
電話：02-3147-252502-3147-2525
有中文解釋浴場位置。鐘意重可以另加錢搵工朱媽搓操，我多年前跟團導遊介紹試過一次，但我唔係好接受得到，而且啲亞朱媽好粗暴咁刷到我啲皮膚好痛，所以我無興趣搓操。
浴場入面無皂液同洗頭水，所以如果自己無帶可以喺到買，都係W500一包。
比咗錢後，亞朱媽會比一套衫褲加兩條毛巾，然後除咗鞋，唔係放門口，要攞埋入去放喺裡面嘅 Locker。
自己隨便揀個 Locker，喺 Locker前除晒所有衫褲，攞條毛巾同埋沖身嘅用品。
先落去下一層嘅大浴場，裡面唔方便影相，入面有成二十多個沖涼位，一個溫水池，水溫普通暖，一個熱水池，應該四十度以上，好熱不過好舒服，一個冷水池，一個桑拿室同一個蒸氣室。 我哋一向鐘意三熱三凍，再玩埋蒸氣室，玩足個幾鐘先返上嚟換衫。
化裝間有梳、同簡單護膚品提供 ，不過我都係見意用返自己帶嘅會好啲。
風筒要入錢，好似W100兩分鐘，因為我用風扇都可以吹乾頭髮，所以無用。
換好衫就可以上二樓
哩到好多一個一個洞
裡面有啲啲溫暖，唔係我想像中嘅熱。每個洞都有人喺到瞓緊覺呀！
入到大廳有按摩椅同擺放咗一啲枕頭同蓆比人用，不過有人喺到瞓覺，唔好意思影相。
哩到緊係要飲甜米露同食雞蛋啦！
重整埋個羊咩頭，終於一嘗心願，做晒我想做嘅嘢！
原本諗住可以喺到玩幾個鐘，但後來改變計劃，喺到留到十一點多再返酒店十二點Check Out，所以飲埋個甜米露就要走啦！玩得唔係好夠喉添！如果某年某月再有機會嚟首爾，一定要留返大半日嚟汗蒸幕玩返夠本。
酒店Check Out後就喺酒店附近嘅梨大購物區行吓！意外地大家都買到嘢喎！
差不多兩點就隨意搵間食店入去幫襯，哩間舖頭無人我哋包場呀！
叫咗個牛筋鍋
辣豆腐海鮮鍋
人參雞
無太大驚喜，味道普普通通，食飽後就慢步返酒店，喺酒店大堂執吓行李，等團友歸隊後就上酒店嘅機場巴士出機場，旅遊巴Size嘅Shuttle Bus只坐二十人，所以座位相當寬敞，一坐上去就瞓著咗，去到機場都唔知呀！
去到機場排隊Check In再搞退稅，搞咗成個鐘先過移民局。
五日行程就係咁無驚無險就完成咗，總括哩個行程雖然無咩驚喜，而且對首爾人嘅禮貌同服務態度都有少少不滿，但總叫做係一個開心旅程，而且同幾個啱Key嘅朋友一齊玩完仍然係朋友真係好難得，睇過好多好朋友去完旅行返嚟連朋友都無得做，我哩幾朋友真係好難得，B女媽咪因為今次整親隻腳跟我哋出發，好驚會阻礙大家嘅行程進度，好彩佢哋都好體諒，盡量遷就B女媽咪，令佢都玩得好開心，真係好感激佢哋啊！
但如果要我自己再計劃嚟首爾的話，應該唔會係近年嘅事啊！先諗吓我十月嘅四國之旅先啦！
~ 完 ~
沒有留言:
張貼留言