♡♡ 我的遊記♡♡: Day 4.1 @三宮 (2012京、阪、神發花癲之行)

哩日要搭好多交通工具呀！

第一個行程係去難波東方酒店放底三個喼先再出發去有馬。

原本係計劃好坐JR去到大阪/梅田就轉市営地鉄到難波，但據聞梅田係一個非常複雜同混亂嘅車駅，而我哋又攞住幾個喼唔想到時抬住個喼四周圍搵路，所以決定用返上一次嘅方法搭JR由京都去到新今宮，再由新今宮轉南海電鉄到難波，全程都有電梯同埋轉車時唔會行好遠。

由於臨時改變路線，所以要上網查吓時間表同轉車位置先安心啲。

照舊到酒店頂樓浸完風呂，食個早餐後，拾齊行李8:30離開酒店。
完全睇唔出前一日灰暗暗落足一日雨啊！真係想再留喺京都繼續追櫻呀！

京都塔後會有期嗱！

京都至新金宮車費890円

喺京都車駅入咗閘後，好似睇唔到我哋要搭車嘅月台，於是乎我本隨手冊又發揮佢嘅功效，我只比工作人員睇我要去嘅地方、搭車嘅時間同車種，咩都唔使講，佢已經可以比到我哋清澈指示啊！

千其唔好搭普通列車，要成個鐘先到，搭快速都要八個字，搭新快速就最正嘞！半個鐘就到嗱！

好順利搭上9:00開出嘅新快速去到大阪，喺大阪轉大阪環狀線內回前往新今宮，到達咗新今宮之後需要先出閘，

然後行去對面嘅南海電鉄兩個駅就到難波嘞！

記得上次無做好準備功夫，到駅後亂衝亂撞咁，搞到自己一頭汗行咗大半個鐘都唔到，今次無咁蠢嗱！睇清楚先！首先喺車駅北出口，哩到係接駁住高島屋百貨公司，利用百貨公司嘅升降機落到地面後正門出，就會見到南海道商店街，入到商店街直行直至見到分义口時轉左，其實哩嗰時候應該已經見到酒店嘅牌啊！見唔到就認住麥叔叔，因為佢就喺酒店隔離。

由高島屋百貨公司一出就會望到南海通

好順利去到難波東方酒店(Oriental Hotel)，大堂要上三樓，搞掂晒之後就正式出發去神戶食牛呀！

今次沿住千日前商店街店嘅BIC Camera方向行，然後沿扶手電梯落地下商店街，地下商店街盡頭就係市営地下鉄難波前往梅田。

到達梅田，跟住指「阪急電車 1、2」嘅指示牌行。

到達阪急車駅要上2樓入閘

入閘口旁亦有Information，如之前無買pass，都可以喺哩到買然後即時用。

插張pass入去入閘機，pass即時啟動，票後亦會即時寫上第一次入閘嘅時間同車駅。

我哋哩程都係要選搭無料特急列車，可以快幾個字啊！

我哋用三宮駅西口北出

出咗駅轉左沿鉄路行幾分鐘

就會見到好大嘅「モーリヤ」招牌啊！同一條街分別有本店同三宮店。

我哋都係揀返上次嚟過嘅三宮店

嚟之前兩日我已經上網訂咗位，當日所見係全場Fully Booked，有兩位日本人同我哋同一時間到步，但佢哋無訂位所以不能入座。所以有興趣嘅朋友不防先上網訂定位。網頁有中、英、日文版，但我自己只可以喺日本版裡面搵到訂位，不過內容可以照填英文就得啊！
訂位:http://www.mouriya.co.jp/sannomiya/reserve/index.html