京都、大阪八天遊 (第五天 上)

28/11/2007　陰天 (上)    京都 → 姬路城 → 有馬

 

今日因為要去姬路同有馬，所以一早就Check out離開京都啦！

我哋首先會去難波Oriental Hotel放底啲大件行李，所以我哋坐JR快速去大阪然後喺轉大阪環狀線去新今宮駅，再由新今宮駅行過對面轉南海電鉄去難波，聽落好似好複雜，但其實都唔難，我哋係唯一搞唔清嗰個環狀線內回同外回姐！

去到酒店搞掂好晒，我哋就照返頭先路線返到去大阪站搭新快速去姬路，由於電子牌上寫住班車係去播州赤穗，唔係好肯定究竟啱唔啱，所以車到站時我哋就吓車尾嗰個車長，佢話班車係去姬路咁我哋就安心上車啦！

依照網上面嘅JR時刻表，我哋係坐九個站六十一分鐘就可到姬路，頭半段好順利，只係用咗四五個字去到車程嘅一半神戶(第五個站) ，但喺神戶哩個站架車停咗好耐同埋不斷有擴播，我哋唔知佢講咩，只見有啲人即刻起身走，但又好多人都坐返喺到，因我上次喺橫濱亦同樣都有類似嘅經驗，但最後都可安然去到目的地。所以今次我都選擇繼續坐落，隔咗大概七八分鐘就架車開嘞！但去到下兩個站 – 明石同西明石時同樣地不斷有擴播亦同樣有好多人落車，最後得返我同同伴B重有一個鬼佬喺車廂，但我諗住因為哩兩個都係大站又係返工時間，佢哋當地人落車都好正常姐！我哋都係重有兩個站都到啦！好安落咁重話大把位坐可以瞓返陣！隔咗一陣架車又開啦但行得好慢好慢，行咗陣就埋站，我有啲奇怪因為我哋原哋下一個站應該係加古川而且要經五個站先到，但喺月台又唔見有站名，停咗成十分鐘，個鬼佬就問我哋係咪都係去姬路同哩架間車啱唔啱，我話問過車長哩架車係肯定去姬路嫁！咁唯有繼續坐。

突然見個司機由車頭跑去車尾，佢見到我哋幾個坐咗喺車廂內但無理到，與此同時對面月台有架去姬路嘅新快速埋站，我哋拿拿聲跑過去諗住轉車啦！點知當我哋一離開車廂，原先哩架車竟然倒頭開走喎！嘩！如果我哋唔落車都唔知會去邊呀！

咁對面月台哩間車停底咗，個鬼佬即禁門下面個緊急開門制，但到門無開到，車尾個姐姐仔(服務員)伸個頭問我哋做咩！鬼佬同我哋一輪咀咁講咗我哋嘅情況比佢知叫佢開門比我哋上車，但佢話架車的而且確係去姬路但係唔可以比我哋上車，因哩架間係新快速哩個站係唔停同唔會上落客，嘩！鬼佬聴到就火都嚟埋！佢話我哋都係搭新快速哩個站係應該唔停同唔會上落客，但我哋就係因為佢哋嘅問題我哋而家滯留咗喺到，佢哋就要比我哋上車去到目的地，但姐姐仔淨係sorry… sorry， 但鬼佬好惡咁指住佢話 YOU SHOULD SORRY。唉！咁惡都冇用，架車最後都無理到我哋就開走咗啦！

喺交涉嘅後段亦有個鬼婆行過嚟，大家眼見架開咗，鬼婆竟然同我講 “SUE ME MA SA”我話 “WHAT?”佢以為我哋係日本人，佢話因為有人喺JR站到跳軌自殺所以搞到而家咁，跟住佢不斷咁安慰我哋叫我哋唔使擔心，但鬼佬好扯火咁走咗去，當佢走開時有一架車入月台啦！係一架普通車去到加古川(即係頭先電子牌第三行嗰班車)，好在我印晒時刻表，我哋上哩間車去到加古川可以轉到車去姬路，於是就阿鬼婆一齊上車，坐咗五個站去到加古川睇到四分鐘後有一班新快速去姬路，終於我哋都可以安然到達目的地啦！足足比預定時間遲咗40 分鐘呀！

已經十二點九我哋決定食埋嘢先入城啦！喺車站內一間意粉餐廳，啲味道嘛嘛哋！

 

出發入城啦！我知只須一條直路大概十五分鐘就會到，但諗住省返啲腳骨力，所以就比¥100去搭觀光車，點知喺對面馬路睇住架觀光車開走咗呀！算等下一架，但等咗陣睇清楚原來係半個鐘先一班車，溤踏正同踏半開。等得嚟都蚊瞓，唯有自己行啦！

 

最後搞到兩點先開始遊覽姬路城嘞！ 今日又係唔夠太陽呀！影啲相出嚟唔夠sharp 呀！不過哩個城堡真係好壯觀呀！

姬路城建於1333年，灰瓦白牆，由大天守閣和小天守閣組成的城池外觀造型猶如一只展翅欲飛的白鷺鳥，優美動人，體現了江戶時代日本最高造城技術。
由於姬路城的地理位置，在漫長的歷史歲月中，奇蹟般地幸免於戰火和火災的危害，作為日本僅存的4座城堡之一得以完整地保存下來。
姬路城於1993年作為日本最初的世界文化遺產在聯合國教科文組織進行了注冊登記。

這是主城旁邊的 “化妝櫓” ，是為了 “千姬”這位公主所建，這是與千姬有關的人的關係圖。

這就是千姬與侍女在玩遊戲時嘅情況，哩間係千姬平時休閒嘅地方，係哩到最大間嘅和式房間。

行到哩到竟然遇返阿鬼佬，嘩！我哋隔九條街已經隔岸相叫，真係好鬼高興！身邊行過啲人一定以為我哋係好耐冇見嘅老朋友呀！

大家傾一輪之後佢話佢已經finish 啦！吓我話我哋先啱啱start！咁於是大家就say Goodbye。我哋又繼續我哋嘅遊覽嘞！

條留梯好窄好企都好鬼難行

當時用嘅兵器

 

小朋友玩嘅球拍都咁靚

姬路城嘅模型

好辛苦終於爬到上頂樓啦！哩6層樓足以攞我命呀！不過上到去個景真係好靚呀！

\

腹切丸，武士們切腹之地

城內的 “菊之井”，是好有名嘅日本鬼故事發生場景。阿菊係城內嘅侍女，因為發現有人想叛變，便將事情告訴將軍，估唔到反而遭陷害，將城內值錢嘅十個一套嘅套盤收起咗一個，誣陷係阿菊所為。可憐嘅阿菊就係咁比人扔咗落井殺害。從此每晚井中都會傳出數盤子嘅哭泣聲，直至設立咗阿菊神社先至可以安撫到佢嘅靈魂。

 

四點要離開姬路去有馬啦！因我上網book房時係話五點會去到旅館check in嫁！唔係晏就班車搞到遲晒就一定趕得切，而家就好趕囉！

                                                                                                                       …… 待續