京都、大阪八天遊 (第六天)

29/11/2007　晴天    有馬→ 三宮 → 難波

今朝講好八點半食早餐，所以瞓到七點就落去浸溫泉，玩到八點幾先返上嚟食早餐，由於噚晚食唔飽今朝好鬼肚餓呀！

啲早餐好過噚晚餐好多，起碼淨係個蒸蛋(正常蒸法)同碗味噌湯都可以送兩碗白飯啦！嘩！食得好飽呀！完全唔記得一陣晏就要去食神戶牛呀！

搞掂晒就check out 嘞！其實除咗噚晚餐飯難食啲外，我對哩間旅館幾滿意啊！

哩兩張係從房間裡面影出去，噚晚嚟到天黑晒，今朝瞓醒原來出面啲風景幾靚嫁！

酒店門口

時間尚早，我哋就趁朝早遊一遊哩個有馬溫泉區啦！我幾鐘意哩到呀！啲地方好舒服令我好relax呀！

酒店就喺溫泉寺隔離嫁咋！

哩到就係銀の湯啦！

有明泉源

天神泉源

好出名嘅金の湯呀！出面重有免費金湯比人飲用同浸腳。

行咗個幾鐘十一點就搭車去三宮食牛牛啦！噚日趕得制又天黑影唔到相而家補返先。唔知點解哩個車站賣最貴隻票都係¥700，我哋嚟嗰陣明明係¥900，算啦！至多去到補票啦！

 

 

有馬溫泉駅去有馬口

喺有馬口站行去對面月台轉車去谷上

 

到咗谷上就去對面月台轉車去三宮嘞

去到三宮出咗閘都唔知向邊個方向行先啱，於是問吓站長先！但佢話我哋出錯咗，要喺月台另一個方向先可去到我哋間餐廳，但係我哋張票已經比出閘機收咗啦！咁佢好好人開咗個閘比我哋入返去同比埋個地圖我哋，叫我哋喺W2(即西面第二個出口)出，但去到嗰邊出口我哋無票出閘喎！好彩頭先影底咗張票可以比個站長睇，點知我哋一行埋去佢已經開定個閘比我哋過啦！應該係頭先個哥哥仔通知咗佢嘞！

 

果然一出到地面對面已經係哩間神戶牛嘅正店，而我哋喺去左手邊間三宮分店，十幾步就到嫁啦！

http://www.mouriya.co.jp/sannomiya/index.html 

去到坐底唔係好多人，而隔離都坐住一對香港人，因為我哋上網BOOK係SPECIAL LUNCH SET，所以佢比個MENU係寫住有DISCOUNT嘅 SPECIAL LUNCH SET，而MENU有三個SET分別係二千幾、三千幾同五千八，我哋問個女侍應個價錢係咪兩個人，佢萬話係，嘩！咁咪好抵，一於豪啲叫個最價嗰個，不過當食落我覺得應該係一人¥5,800，因為個餐真係好多嘢食呀！

頭盤 – 好好味呀！

個麵包好好味呀，我食咗一個半呀！湯都好味，飲晒！  沙律好味，食晒！

嘩！神戶牛未嚟都食飽晒啦！

我哋嘅神戶牛牛呀！

嘩…嘩！好好好味呀！入口即溶聽就聽得多啦！今次真係親身感受到啦！

但真係好飽呀！阿師傅喬埋對手等我食到咁上下先再繼續煎 ，連啲配菜都好好味呀！

食…食…食！好飽啦！食咗成個鐘諗住埋單走啦！因為隔離嗰pair都係食晒啲牛就走啦！但侍應哥哥話重有個Lemon Ice-cream，噢！咁就坐返底食啦！嘩！又好好味食晒！

好啦！埋單啦！未得呀！重有甜品呀！唔係呀！哩份甜品件件都好好食嫁！又食晒！

走得未呀？答案係未呀！侍應哥哥問Coffee or Tea？吓… Tea啦！連杯紅茶都又香又滑，結果又飲埋啦！

嘩！唔得啦！真係好飽呀！都係今朝嗰兩碗白飯累事，今次真係走得啦！埋單真係¥5,800一個人，總共¥11,600免加一，但我覺得哩個錢係值嫁，我真係食得好滿足呀！

因為真係飽得制所以我哋喺附近行吓消化吓先呀！

行咗陣就去JR三ノ宮駅搭普通車返新今宮再轉南海電鉄返難波。

 

返到酒店都成四點啦！幾分鐘就搞掂check in手續啦！上到房…嘩！好滿意呀！間房好大啊！個廁所都好大呀！酒店地點又方便，哩間酒店我比一百分。

抖夠就落街行吓啦！一落街就係千日前商店街，行落啲就係道頓堀，再過就係心斎橋，勁方便呀！

我哋都無咩特別嘢行，所以就去激安の殿堂買手信，裡面真係好多嘢賣。

滿載而歸之後都重係好飽，所以我哋求奇買少少壽司同生果就返酒店。今晚喺酒店食住杯麵壽司睇住日本一套好好笑嘅遊戲節目，真係好開心呀！

www.youtube.com/watch?v=sgqOKj1hdXM

食: ¥13,576

住: Package

行: 有馬溫泉 à 三宮 ¥900x2

    三ノ宮 à 新今宮 ¥690x2

    新今宮(南海電鉄) à 難波 ¥150x2

其他: ¥1,480(鎮痛貼)