2016年3月26日 星期六

Day 8 @ 名古屋中部國際機場

2015年10月17日 / 星期六 (第八天)
10:50 ~ 11:18 | [特急]名鉄常滑・空港線ミュースカイ | 名鉄名古屋 → 中部国際空港

(交通收費及詳細資料請往交通篇)

行程最後一日係無行程,名古屋同栄都已經大致行過,而且酒店位置距離車駅比較遠,如果要寄存行李後再返嚟攞會比較麻煩,既然都無咩想行的話就決定早少少出機場,因為中部機場亦係一個購物熱點,哩個機場連佢哋當地人都會時時過去,所以每逢六、日都會有一啲活動會喺機場搞。

食咗早餐後就收拾所有嘢離開啦!


每次都係離開當天天氣特別好啊!

臨走前再喺名鉄車駅商場超市走走。


經歷過上次走嘅時候車廂迫爆,今次就比多幾百円坐ミュースカイ,全車指定席,舒舒服服咁坐半個鐘就到機場。






到咗機場後先去將行李處存喺Locker到先。然後就可以輕輕鬆鬆咁行街嘞!





先喺三樓嘅手信店行咗陣就到四樓行,四樓全層都係店舖同食店,我嘅目標係えびせんべいの里(蝦片專門店) 同食鰻魚飯。每間店舖行吓睇吓,樣樣都想買,哩到貨品價錢唔太貴,而且餐廳種類都好多,有幾間嘅名古屋出名嘅名舖喺哩到都有分店。






到午餐時間,我同大笨蛋都想食鰻魚飯,啱啱喺えびせんべいの里對面有家餐廳剛剛有我哋想食嘅嘢,所以就喺到解決我哋哩個旅程裡面最後一餐啦!

餐廳同溫泉館同一個入口,真想食飽去浸一浸先上機呀!


食物價錢喺機場嚟講都應該唔算好貴。





大家食飽之後就到戶外平台睇飛機升降!


開始慢步返去攞行李準備到航空公司Check in嘞!

順利完成過關手續後就先到免稅店睇吓有無我哋想買嘅手信,因為哩到免稅,而且有日本幾程出名手信 (I.E. 薯條三兄弟、白痴戀人、SkyTree Banana蛋糕等)  我同大笨蛋就買Royce,因為真係平香港一半呀!

免稅店超多人,哩到機場限買薯條三兄弟每人一盒,所以有大量存貨,相對関西機場同成田機場,每人可買三、四盒,所以次次去到都缺貨。

笑話一盅:話說去到免稅店正當想睇吓重有無薯條三兄弟時,有幾個女人喺貨架前齋睇唔買,但又唔讓開,跟住其中一個大叫,亞女,原來三兄弟係薯條嚟咖!真攞命!咩嚟都未知就唔好阻住啦!

買好晒嘢之後就返到候機室搵個可以义電嘅位玩陣手機又上機啦!但今次排咗好耐隊都未可以上機,然後聽到廣播叫一啲人名去最前嘅櫃位,然後有工作人員將一件件行李搬上嚟比佢哋開喼,原來有十幾人都將义電嘅尿袋放咗去寄倉行李,最後安撿過唔到要全部攞返出嚟!唉!啲人第一次坐飛機咩,就算唔係怕且啲領隊都有講啩!搞咗成個鐘搞啲咁嘅嘢,真激氣!


最後終於可以上到機,食個餐瞓個覺,咁八日行程就咁完結咗啦!



1 則留言: