九天東京、橫濱、輕井澤、箱根之旅(第七天)上

21/06/2007　晴天  箱根湯本 → 蘆之湖 → 御殿場Premium Outlet →

                                     仙石原  (上集)

今朝瞓醒覺就去浸返個溫泉，哩個溫泉就當然大個噚日個私人風呂，但出面個露天溫泉裝修緊所以只可以喺室內浸，今日都係私人風呂呀！因為都無人嚟浸，我哋直頭包晒場呀！

返到房到七時半就Morning Call啦！嘩！佢哋啲效率好怏啊！唔使五分鐘嗰兩個搞笑服務員就上嚟收被舖啦！然後唔使八點就上早餐啦！早餐就無好似噚日咁續樣上，今次就一次過嚟晒。

食飽後我哋就拾埋啲嘢check out啦！如果想感受吓日本傳統嘅溫泉旅館，佢係一個唔錯嘅選擇。

遊心亭:  http://www.yushintei.co.jp/

離開遊心亭後我哋就行過去春花莊啦！雖然都唔算太遠但由於中段開始要不段上斜路都幾吃力，大概三四個字就到咗春花莊啦！佢雖然都係一間溫泉旅館但係無遊心亭嗰種人情味，基本上同普通酒店無咩分別，我哋放底行李同講底我哋今晚六點半先返嚟食晚飯，然後就沿路返去箱根湯本車站，今日我哋首先會搭巴士去元箱根港，去車站前先去便利店買啲嘢食做晏就先，我哋今日好多地方去啊！應該無咩時間食晏嫁啦！好啦…出發啦！

比起坐登山電車或纜車巴士快好多，大概半個鐘就到咗啦！我哋並無喺元箱根港遊覽，只係喺碼頭影吓相。

未夠鐘開船， 喺手信店買吓嘢先。

海賊船到啦！上船先！

芦ノ湖

天陰陰，如果天氣好個景會好似哩張Poster咁嫁

對面有另一隻海賊船經過呀！

臨埋岸見到對面岸嗰隻海賊船靚好多啊！重有個海賊公仔喺到嫁！

二十五分鐘後就喺桃源台上船再轉巴士去御殿場，間巴士好舒服嫁好似旅行團啲旅遊巴咁嫁，好快呀！

  

半個鐘到就到咗御殿場車站啦！沿途重經過平和公園添！

咁我哋就喺御殿場車站再轉乘免費穿梭巴士去御殿場Premium Outlet。

其實去到之後感覺同之前兩個Outlet都無咩大分別，Outlet嘅設計、賣嘅牌子都差唔多，基本上去一個都已經足夠啦！行咗一圈後無咩收穫就走啦！我哋坐返穿梭巴士返御殿場車站，個晏仔就喺巴士上解決，但係原來巴士上面係唔食得嘢嫁！比司機話鬼添。

我哋喺車站等咗一陣就有巴士到啦！不過睇真啲原來哩間係由桃源台開去新宿嫁！如果我哋哩程喺尾站我哋就可以揸住小田急嘅套票然後加錢坐哩間巴士返去新宿。我哋再等多陣又有另一間巴士到啦！今次我攞住星之王子博物館同玻璃之森美術館嘅catalogue問車站內嘅叔叔，佢都話間車啱呀！咁我哋咪排隊上車啦！有個伯伯本來喺我哋前面，佢見我哋攞住啲catalogue就比我哋上車先然後同我哋講佢都係去嗰到，上車之後佢重坐喺我哋隔離添！

話咁快就到咗仙石原啦！咁我哋睇地圖應該喺仙石原案內所個站落車，見間車停又有人落咪又落囉！阿伯伯即刻節住我哋話咪到！佢攞咗我哋張catalogue手指指話如果我哋要去哩到(星之王子博物館)呢就未到！咁我哋又問如果去玻璃之森美術館呢?佢話都未到。

過咗唔知一個站定兩個站，今次伯伯就話落車啦！然後跟住佢過馬路，我重同同伴A講嘜阿伯伯咁嘅年記都去星之王子博物館睇咩呀? 過咗兩條馬路同行咗一段小路，伯伯就示意我哋跟住條路再行五分鐘就到嫁啦！咁玻璃之森博物館呢?伯伯話跟都喺跟住哩條再行，咁要返去箱根湯本呢? 我諗伯伯想話我哋兩個咁多嘢問嫁！HE…..HE….難得有人問，緊係好過睇地圖啦！伯伯話喺博物館一出嚟就有BUS嫁啦！哦…哦…哦！我哋明晒之後，伯伯就轉頭行返去落車個方向，啊！伯伯原來唔係去星之王子博物館，佢應該住喺哩頭，可能見我哋兩個噩噩吓，所以就帶我哋嚟！好感動啊！我又一次感受到人間溫暖啊！

                                                                                                                         ......待續