九天東京、橫濱、輕井澤、箱根之旅(第二天)

16/06/2007　晴天   上野 → 橫濱 (三溪園、中華街、山下公園、Marine Bayside Outlet、拉麵博物館、MM21)

今日的行程好緊密呀,所以八點幾就出發啦！但出發前有樣好緊要嘅嘢要做，就係搵日光館個婆婆(佢哋叫媽媽さ)訂多兩日住宿

。

搞掂晒！出發啦！我哋去上野站搭 “JR京浜東北・根岸線・大船行”去橫濱，車程都要七八個字啊！橫濱係一個大站，再加上今日係星期六，出咗閘好多人所以我倆好迷茫

，

於是就走去 Information Center問路兼攞地圖。跟住我哋就過去JR Counter訂定明日去輕井澤的車票。

然後我哋向住SOGO方向去巴士站，在巴士站等了十分鐘到就等到我哋要上嘅8號巴士前往三溪園，又過咗七八個字就到啦！落車後唔使擔心唔識行，基本上巴士啲人都係去嗰到，只要跟住佢哋行就得嫁啦！而且啲指示都好清楚。行咗十分鐘就到目的地啦！

三溪園原是經營蠶絲業務的橫濱企業家原三溪的宅邸，佔地廣達十七萬五千平方米，在1906年正式開放予人參觀。原三溪除將日本各地不少歷史建築移到園內，更仿照有關著名建築複製起來，令今日三溪園十七幢古建築中，便有十幢被日本政府列明重要文物。

 

 

遊覽完三溪園後我哋便乘148號巴士返回橫濱中華街，原來都到咗醫肚時間，我哋便走入中華街搵咗間大三元食晏仔嘞！

由於中華街所賣嘅嘢對我哋香港人或中國人根本就冇特別，所以我哋食飽飽就行過去山下公園啦！都好快咋！五、六分鐘到就到啦！

山下公園是日本最初的臨海公園，由此憑欄眺望橫濱灣跨海大橋和橫濱港內往來的船只以及飛翔的海鷗，極富浪漫色彩。園內海岸一側停泊著舊時著名豪華客輪“冰川丸”，其它還有水台階、水幕舞台等。

 

離開山下公園，下一站就去Marine Bayside Outlet，喺搵資料時都覺得這裡都好難去要轉好多車。咁我哋就由中華街搭地鐡返去橫濱先，跟住就返去Information Center問吓究竟啲路線係點去，於是我哋又出發啦！首先坐JR京浜東北・根岸線・大船行由橫濱去新杉田，然後轉地鐡去鳥浜站，當列車到達月台時就已經望到Outlet嘅所在地，我哋大概行咗五分鐘就去到啦!

 

大概六點鐘我哋就離開Outlet前往新橫濱拉麵博物館，但係個問號又喺個腦到出現

，究竟又要點轉車先去到新橫濱呢？出絕招

……返去橫濱Information Center問路，又係嗰位太太答我哋，佢個表情都好奇怪，又係你兩個，無計啦！真係唔係好明佢哋啲地圖搞咩呀！而且我哋恃住有個JR PASS EAST指吓個鼻就過得啦！哈！哈！好爽呀！

哩次太太叫我哋喺橫濱搭一個站去東神奈川然後過去對面月台轉JR橫濱線・八王子行就可去到新橫濱啊！經人指點後又好似唔係好難喎！

出咗站都行咗成十五分鐘先到，其實哩間嘢都幾遍辟，入到去行咗陣又係醫肚時候啦！我哋隨意咁入咗一間到食我哋嘅晚餐啦！味道本人覺得一般啦！本來我哋諗住每碗麵都加隻蛋，但買咗票坐埋位時佢先話得返一隻蛋，跟住佢講咗一大輪都唔知佢講咩！之後佢退返一隻蛋嘅錢比我哋。但食吓等吓都唔見佢比埋嗰隻蛋我哋！原來佢哋係冇晒蛋，只係諗住我哋食完加麵比我哋補償返，嘩！點食呀！最後都係算數啦！比佢收多一隻蛋錢就算啦!

 

  

食飽都九點幾啦！雖然已經好倦，但都要去埋最後哩個景點 – MM21夜景。今次知道點去啦！

搭車返去東神奈川然後轉車去櫻木町，一出閘就見到好靚嘅夜景啦！值得尊登過嚟！

十點半終於完成晒今日嘅行程啦! 返到日光館都十一點七啦！好倦好眼瞓啊!

 

食:早餐(麵包): ¥210X2

      三溪園小食: ¥350

     午餐(大三元):  ¥1,470

   飲品: ¥120X2

     晚餐: ¥1,800

住: ¥4,200X2

行:     上野 → 橫濱 :JR PASS (¥560)

        橫濱 → 三溪園駅前 :¥210 X2

        三溪園駅前 → 中華街 :¥210 X2

        中華街 → 橫濱 :¥200 X2

    橫濱 → 新杉田: JR PASS (¥210)

    新杉田 → 鳥浜: ¥250 X2

    鳥浜 → 新杉田: ¥250 X2

    新杉田 → 橫濱: JR PASS (¥210)

    橫濱 → 新橫濱: JR PASS (¥230)

    新橫濱 → 櫻木町: JR PASS (¥260)

櫻木町→上野: JR PASS (¥560)

 

玩: 三溪園入場卷: ¥500 X2

    新橫濱拉麵博物館入場卷: ¥300 X2