九天東京、橫濱、輕井澤、箱根之旅(第六天)上

20/06/2007　晴天  上野→ 箱根  (上集)

今朝一早又出發啦！我哋首先去新宿小田急服務中心買箱根三日套票，哩張票好好用嫁！喺箱根要搭好多交通工具，有咗哩張票又可以指吓個鼻就過嫁啦！

買票時由於售票員啲英文幾好，我哋就問埋佢點可以去到我哋上網訂咗嗰溫泉旅館，佢又好好人啊！佢影咗張旅館穿梭巴士嘅時刻表同地圖比我哋，重搵埋張穿梭巴士嘅相比我哋認住，佢重提醒我哋哩間巴士套票唔包嫁！要比¥100啊！

我哋只係買咗普通票，並無加錢坐浪漫號快車，原來哩個係錯嘅決定，我哋坐嗰間叫做急行，但我真係唔知急喺邊，站站停，重停鬼咁耐，我瞓醒幾覺都未到呀！呆咗兩個幾鐘先去到呀！

落車時成個站都係人，好混亂好多人，令我哋有啲不知所操，諗住入去間Information Center問吓住宿資料先，因為我哋只係訂咗一晚嘅旅館而且重無比訂金，唔知人哋比唔比房我哋！好傍惶咁中咗入一間類似Information Center嘅物體，有個外籍人士要求攞地圖，有位姐姐好nice咁比佢同答咗佢好多問題，到我哋啦！佢話無地圖攞喎！而且哩到唔係Information Center，要問就過對面馬路先係喎！咁我哋叫佢介紹啲近車站嘅溫泉旅館比我哋啦！因為佢哋係啲旅遊介紹所，佢叫個唔係咁識英文嘅trainee嚟serve我哋！佢半明半唔明咁同我哋訂咗一間叫春花莊嘅溫泉旅館，¥12,000一泊兩食加¥525介紹費。算啦！比少少錢人哋賺令自己好似定啲啦！嗰位trainee姐姐仔知我哋訂咗遊心亭就教埋我哋點去。

好啦！過去遊心亭放底啲行李同比佢哋知我哋的確嚟咗，等佢哋幫我哋安排房間呀！其實巴士站只係喺箱根湯本站對面咋！

其實嗰三間穿梭巴士分別穿梭晒箱根湯本內嘅所有溫泉旅館，上咗車好快就到啦！遊心亭外觀幾好！入到去有個男人好溫柔嘅聲線歡迎我哋！我哋show咗上綱訂位張紙比佢！佢話無問題，但要到三點先同我哋check in，咁我哋放底行李同話底六點鐘返嚟食飯就出發啦！

我哋沿住巴士條路線行返落去車站，原來十幾分鐘就可以行返落去嫁啦！

都十二點幾啦！醫肚先！我哋去咗一間冷麵舖食晏！嘩！我個豆腐冷麵好好味呀！但同伴A個就麻麻哋啦！

食飽後就過去箱根湯本站搭登山電車去強羅啦！哩輛電車係Z形咁行，其實都行得好慢吓！全個車程要40分鐘。六月中至七月係繡球花花期，鐵路兩旁都種滿晒繡球花，所以好多日本人都尊登嚟睇佢哋嫁！

食飽後我哋一心上強羅然後轉巴士去御殿場Outlet，但坐完電車上到去先發覺嗰到係無車去御殿場，咁唯有先去大涌谷啦！喺車站買杯雪糕食先。

轉完一輪電車、纜車、吊車終於到咗大涌谷啦！哩個景點其實我同同伴A都嚟過啦！而家只係重遊舊地。同埋上次我係坐旅遊巴直接上到嚟，今次自己上嚟感覺都唔同。

好快咁遊覽咗一回就返去啦！前後只係幾個字，啲冒己經覆蓋成個大涌谷嘅山頭，簡直伸手不見五指呀！

有手信店緊係要入去行吓啦！哈！哈！重有隻黑玉子KITTY歡迎我哋呀！

買完手信出嚟真係大冒到差啲連返車站條路認唔到呀！而家坐吊坐返落去已經咩都睇唔到啦！好彩我哋早咗啲上嚟！

然後就沿路返去啦！去到強羅車站都差唔多五點！其實啲登山纜車都行得幾慢，一上一落都幾浪費時間。 返到箱根湯本時都已經五點八個字啦！因為返旅館間穿梭巴士溤踏三同踏九開，我哋一定要搭踏九開嗰班！否則就趕唔切準時六點返到去啦！我哋唯有飛奔去車站，好彩都趕得到，六點未到就可以返到旅館啦！