九天東京、橫濱、輕井澤、箱根之旅(第一天)

15/06/2007　雨天／晴天   香港 → 東京 (新宿，上野)

期待已久的日子終於到啦！今天四點鐘起身，五點鐘便出門到車站乘最早開的一班機場巴士，與同伴A在巴士 上會合後，六點半準時到達機場辦理登機手續，到達機場望電子牌才發覺原來班機早咗半個鐘登機啊！

    

我哋搭NW002,原8:35先開嫁,而家8:10就開啊!

坐咗三個幾鐘,日本時間13:15就到達啦! 我哋都只係用咗十多分鐘便順利過咗入境海關。

由於我哋喺航機上先決定今日開始用個JR PASS，所以一出到機場大堂我哋就去搵JR的COUNTER去搞個PASS先

 

跟住就換埋由成田空港至東京的NE'X EXPRESS車票，COUNTER小姐話十分鐘後就開車啦,所以我哋拿拿臨跑落月台中上車嘞!

   

15:14準時到達東京站跟住我哋就轉山手線前往上野，因為我哋這兩晚將會喺上野日光館投宿啊!都好容易就去到上野站，但挑戰開始嚟啦!原來一個上野站出口都分三層，搵咗一輪終於搞清楚我哋要去一樓的不忍改札広小路出口出

   

攞住地圖都花咗大概35分鐘先找到目的地,由於日光館位於一條橫街內，所以最初走漏眼便喺外圍啲大街兜兜轉轉咗幾個字，之後識咗路原來都只須幾分鐘就可由JR車站返到去了。

 

安頓好後都五點啦! 我哋就出咗去日暮里，因為同伴A一心諗住之後有兩晚可住返她上次自由行時那間民宿，但因言語不通，那間民宿的婆婆竟然趕我哋走，真係有生意都唔做。 咁我哋就去新宿行吓同埋去小田急服務中心睇定一啲去箱根的資料。

搞完一輪先諗起原來我哋今日冇食晏，係時候搵食啦! 咁就好求奇入咗間咖哩店食咗個晚餐啦!

食飽飽之後就諗起重未打電話返屋企報平安，因為之前跟團都喺酒店打唔使煩，今次嚟之前睇咗好多旅遊書講解都唔明，不知從何入手，咁唯有入咗便利店買咗張電話咭先算啦! 但原來電話咭都分好多種,好彩其中一個店員係從哈爾濱來的中國人，她介紹咗其中一種電話咭比我哋，重教我哋點用同邊到有電話可以打IDD，最後重指點埋我哋點行返去JR站最近，令我哋唔使行回頭路。

哩張係KDDI嘅電話咭(會連埋張MENU比你教你點用嫁)，分¥1,000、¥3,000同¥5,000，然後攞住佢去搵啲係要先入¥10或¥100啟動嘅電話，因為哩啲先可以打IDD啊！入咗錢後就打0055，跟住會聽到DO...DO...DO...一輪然後就有個人講日文然後講英文叫你打個CARＤ NO.，咁你就可以依住電話咭上嘅PASSWORD打，記住連"#"字都要打，咁跟住又有人講完日文又講英文話你知你張咭有幾錢同可以打幾耐，之後會叫你打電話號碼，咁你就打852-XXXX XXXX就得啦！ 收線後記住攞返個¥10或¥100呀！

初初好似好復雜，但試過一兩次就會好熟嫁啦！我買¥1,000可以打到七分鐘倒啦！

最後我哋都成十點幾先返到民宿，雖然今日冇咩行程可言，但都令我接觸到好多跟團唔會遇到的人和事，每様嘢對我嚟講都好新鮮 。

 

食:小吃(PIZZA麵包): ¥300X2

     生果(4個橙+1個蘋果): ¥945

    飲品:  ¥120X2

    晚餐: ¥550 + ¥480

住: ¥4,200X2

行: NE'X EXPRESS: JR PASS  (¥2,940)

     東京→ 上野(山手線):JR PASS (¥150)

     上野→ 日暮里(山手線):JR PASS (¥130)

     日暮里→ 新宿(山手線):JR PASS (¥190)

     新宿→ 上野(山手線):JR PASS (¥190)

其他: 電話咭: ¥1,000