京都、大阪八天遊 (第二天)

25/11/2007　晴天    京都: 清水寺、八阪神社、衹園、平安神宮、金閣寺

由於見識過噚晚嘅萬人場面，今日真係唔想咁迫法，所以我哋決定早啲出發。天都未光清晨六點多我哋就落街嘞！

幾好呀！都唔使排隊就可以上車啦！我哋坐100號巴士大概十五分鐘就可以落車啦！

 

今朝無咩人行條路好舒服呀！但係啲舖頭亦全部未開！

 

停車場都有啲旅遊巴士已經到咗啦！

其實我舊年跟團已經嚟過清水寺，但當日得到嗰位導遊大哥悉心安排，我哋大概有半個鐘頭遊清水寺，所以我都唔知睇咗啲咩就走咗嘞！ 今日一定要慢慢欣賞吓哩個地方呀！

清水寺為棟樑結構式寺院。正殿寬19米，進深16米，依懸涯峭壁而建，大殿前為懸空的“舞台”，由139根高數十米的大圓木支撐。寺院建築氣勢宏偉，結構巧妙，未用一根釘子。寺中六層炬木築成的木台為日本所罕有。

地主神社位於清水寺正殿北側。神社內良緣之神極受年輕人的喜歡，在這裡終日可見祈求良緣的年輕女性虔誠參拜，熱鬧非凡。

地主神社裡有一對相距10米遠的「戀愛占卜石」，相傳如能閉著眼睛從這邊的石頭走到對面的石頭前，兩個人的戀愛便會如願以償。如走偏了，很可能要出現一些波折。

清水寺正殿旁有一山泉，稱為音羽瀑布，流水清冽，終年不斷，被列為日本十大名水之首。

遊覽完清水寺後，就沿住二年坂、三年坂行去高台寺嘞！都九點幾啦但係啲舖頭都係未開，所以好快就可以行到去高台寺。

高台寺係北政所寧寧(豐臣秀吉夫人）為思念亡夫而於1606年修建的寺院，也是寧寧晚年的居所和去世後的墓地。高台寺樓台閣宇，依山就勢，規模宏大，日式庭園，秀麗典雅，但不幸遭火災焚毀，現僅存開山堂等建築。

 

離開高台寺沿住ねね之道行到盡頭就會去到八坂神社嘞！　

八阪神社位於京都市內四條通大街盡頭，是日本全國祗園社的總本社，供奉消災驅邪、買賣興隆之神，深受日本人的信仰。據考證八阪神社由明治維新1868年起開始使用現在的名稱。

啱啱我哋遇到一對新人做完結婚儀式準備離開，以前睇日劇就見過，現場都係第一次咋！

由八坂神社嘅正門行出去就係祗園，我哋都係逗留咗大概半個鐘倒，覺得好似無咩特別啱行嘅地方，所以只係喺一錢洋食門外同花見小路個牌影張到此一遊就去搭5號巴士到下一個目的地 – 平安神宮。

其實嚟平安神宮哩個地方無咩目的，因又係為咗唔甘心，舊年跟團本來有哩個行程，但臨時取消咗去京都駅shopping，所以今次點都要嚟睇吓！我知神社內有一個好大嘅庭園，只不過我倆已經好倦，所以只係喺大廣場影咗相就走啦！

今日好多小朋友著住好靚嘅和服嚟拜神呀！

 

神社外有條橫街賣手信同小食，我哋就喺到食咗少少嘢抖一抖就繼續下一站嘞！

跟住搭巴士返京都駅再轉車去金閣寺，哩個行程本來諗住後日去完嵐山下就先去嫁！但因為車票問題，就決定今日辛苦啲去埋金閣寺先啦！橫店返到京都駅都係兩點之嘛！

我哋搭205號巴士，大概坐咗八九個字倒就落車啦！哩到都係唔使睇路牌你都曉去，咪又係好鬼多人囉！但我上網睇過(金閣寺內有部live camera可以睇到金閣寺即時樣貌: http://www.shokoku-ji.or.jp/kinkakuji/webcam/index.html)，我覺得金閣寺係要下就三四點啲太陽先射得佢最靚，所以人多都要下就先嚟囉！

嘩！迫都底呀！真係好靚呀！唔識形容自己睇啦！

遊覽完金閣寺後就好滿足咁搭返205號巴士返京都駅，返到去都係五點到，因為實在太倦所以我哋返咗酒店抖一抖，六點半至落街去拉麵小路食博多拉麵啊！

 

 

食飽就去伊勢丹嘅超市買咗啲生果同飲品就返歸啦！日本啲生果真係好貴，成十蚊隻香蕉六七蚊個橙。

返到酒店當然拿拿淋去大浴場沖涼浸浴啦！今晚可能早咗八點倒，好舒服呀！嘩！好嘢唔使十點就可以上床瞓啦！

食: ¥6,556

    (飯團、尤魚、香腸、拉麵、水果 + 飲品)

住: ¥8,500

行: 巴士One day pass ¥500x2

買嘢: ¥4,200

其他: ¥2,250 (Postcard、郵票及鎮痛貼）

玩: 清水寺入場卷: ¥300X2

    高台寺入場卷: ¥600X2

    金閣寺入場卷: ¥400X2