2007年7月8日 星期日

九天東京、橫濱、輕井澤、箱根之旅(第四天)上

18/06/2007 晴天   輕井澤 中輕井 (上集)

今朝八點就落樓下食早餐啦!今朝唔使食麵包,老闆同老闆娘齊齊整早餐比我哋兩個,我哋好似VIP咁呀!包晒全場。嘩個早餐好好味呀!老闆重喺我哋後面STANDBY,一見我哋個杯飲晒嘢就即刻過嚟加,好鬼細心啊!享用完美味早餐找埋數後,我哋就同老闆SAY GOODBYE啦!我哋重問佢攞咗COCOMO嘅 CATALOGUE 話介紹比朋友,因為佢嘅服務真係好好,老闆聴到好鬼開心,係咁躹躬多謝我哋啊!

COCOMO: http://www.saturn.dti.ne.jp/~cocomo/

離開COCOMO後我哋就行過對面PENSION EXE放底行李啦!阿婆開門萬咁問我哋噚晚係咪住喺COCOMO呀? !佢都望到我哋喺嗰邊過嚟重問咩鬼喎!係又點喎? 放好行李後婆婆就要求收咗錢先!搞掂晒啦我哋就响雲場池出發啦!

其實我哋住嗰到係去雲場池必經過嘅地方,都幾方便嫁!我哋大概行咗半個鐘就到咗啦!如果睇相或旅遊書哩個地方好靚嫁!真實去到係比想像中細,但因我之前係啲網友日誌中提及過,所以有晒心理準備,都OK嫁!影咗啲相出嚟幾靚嫁!

離開雲場池我哋本計劃行返出去輕井澤車站再搭電車或巴士去位於中輕井澤嘅石之教堂!估計都要行成八九個字先返到出去,與此同時我哋見到有一個指示牌寫住「à 中軽井沢」 咁即係話跟住個方向行都好快到姐!橫掂都諗住行八九個字,不如就行過去啦!於是我哋心口掛個勇字就咁出發啦!亦因為咁我哋就出事嘞!行行重行行,半個鐘、九個字、一個鐘啦點解重係好似森林嘅地方,鬼影都無隻。死啦!重要行幾耐呀!行返轉頭已經無可能,繼續行又唔知行幾耐,見到車站但時刻表顯示要等一個鐘先有車到!!唯有繼續行啦!

其實我睇過好多資料,但講關於點去中輕井澤嘅景點方法都唔係有太多記載,諗住嚟到會有多啲有關資料,但原來都係唔多。

繼續行行重行行!好彩間唔中出現啲好靚嘅地方,又影吓相先!行咗個幾鐘終於見到個日本太太,嗱聲問吓路先!太太知道我哋要去石之教堂就LOOK大隻眼豎起1 隻手指!唔識日文都知佢話「好遠喎,重要行一個鐘頭先到啊!」…… 唯有繼續努力啦!

終於開始見返大路同有屋啦!地圖顯示我哋已經到中輕井澤!只要行多半個鐘就會到啦!但最後都要行多九個字,去到目的地前嘅分义路我哋都行錯,好彩遇到有人又問吓!如果唔係又行旺路啊! 行足足兩個半鐘終於嚟到啦!

這間教堂「石の教会 」位於星野,由名建築師Kendrick Kellogg設計,以紀念熱愛輕井澤的基督教傳教士和思想家內村鑑三的功績。它的外表非常獨特,有別於一般教堂,全個建築物顧名思義使用各種石料造成,充份表現出與大自然的融合。

全個教堂內外都係用石做,入到去好感覺到佢嗰種氣勢,教堂內係嚴禁影相,但行咗兩個半鐘,唔影返一張半張點對得住自己呀!當我靜雞雞影咗第一張之後,教堂內嗰七八個日本人即係又攞相機又攞電話係咁影係咁影!嘩!原來佢哋重狼過我呀!



遊覽完又準備去下一個目標啦!「Zrzgebirge玩具博物館」 哩到又係無咩介紹係用咩途徑可以去到。唯有出返車站先算啦!今次我哋臨走前問清楚點行先!到有個餐廳女侍應好NICE咁教我行條無咁崎嶇嘅路返出去

今次大概用咗七個字就返到出大路,入去便利店買啲嘢飲先!收銀婆婆見我哋係外地人,就問吓我哋邊到嚟!咁我哋咪問吓佢點去個博物館啦!佢好熱心呀!”KEI LEE 姑 LU”一大輪都唔知佢UP咩!淨係到佢叫我哋搭巴士,但係邊到搭同搭咩巴士都聽唔明。

算啦!出到去又好迷茫,才研究個地圖應該個巴士站係喺附近,但我哋真係已經好倦啦!同伴A已經謝謝哋!其實大家已經有放棄嘅念頭啦!咁我哩個好懶嘅教徒就祈禱,我就同主講: 「我哋今日去唔去到哩個博物館就由祢決定啦!如果跟住落嚟我哋可以搵到個巴士站同又等到嗰間巴士我哋就繼續行程,否則就搭電車返去啦!」同伴A都讚誠哩個決定,咁我哋就繼續搵巴士站,今次唔使五分鐘就見到個巴士站,時刻牌顯示二十分鐘後會有車,好啦!既然係上天安排咁我哋就等啦!


呆坐咗半個鐘,終於有巴士到啦!好開心咁跳上車嗱臨攞地圖出嚟問司機可唔可以去到Zrzgebirge玩具博物館」,佢個表情話我哋知只可以去到附近,要自己行入去,OK!斷估點都唔使行兩個半鐘卦!司機一路揸一路幫我哋睇地圖,但仍好嚴咁叫我哋坐埋一邊,搞咩鬼呀!間車都無人使咩坐到咁迫呀!過咗兩個站原來有一大班小朋友上車啊!佢哋放學啦!有一個小朋友一上車見到我哋就想模吓同伴A隻手!佢想搞咩鬼? 全車小朋友都牛咁眼望住我哋兩個,咩我哋似外星人咩????

跟住行啲路全部都係田呀、山路呀!好彩無諗住行入嚟!跟本無可能行得到!咿…坐咗七八個站好似到啦!有小朋友要落車咪諗住跟住落,點知司機欄住我哋然後珊門開車,…原來司機好好人,佢車到我哋要行嘅路口到係兩個站嘅中間,佢專登比我哋喺到落!然後再一次用手勢話比我哋聽點行,佢重指埋地圖範圍示意我哋大概可以係邊搭返車返去中輕井澤車站,雖然唔係好明但都好多謝佢。

當我哋落車之際,頭先想模同伴A隻手個小朋友沖上嚟伸隻手仔捉住我隻手話:How are you?」 啊!原來想同我哋打招呼兼showquali,佢哋重成班走晒埋窗口同我哋Bye Bye!都幾得意!

 


好啦!我哋照住司機同地圖嘅指示繼續上路啦!又係荒山野嶺嘅地方啊!


 

                                                                                                                      ...... 待續


2 則留言:

  1. 紅葉時節的雲場池真的好靚o架....
    [版主回覆12/02/2007 00:01:00]可惜我係夏天去啦!

    回覆刪除
  2. hihi, our trip is quite similar neh
    [版主回覆08/08/2008 07:39:00]真係! 咁我去你到睇吓先!

    回覆刪除