2007年7月15日 星期日

九天東京、橫濱、輕井澤、箱根之旅(第九天)

23/06/2007 晴天    上野 築地 香港


今日係旅程最後一日,所以淨係安排咗去築地市場,我哋都成八點幾先出發,出去前將所有行李寄喺日光館,媽媽さ好醒目呀!知我哋今日走啦!所以問定我哋會幾返嚟攞行李


我哋今日諗住喺上野站搭地下鐵去築地市場,但我哋搞唔清究竟係搭日比谷線定都營大江戶線,咁咪諗住問吓個服務員囉!但佢好串呀都好似唔想采我哋,求奇失張地圖比我哋就算,我哋再研究一輪發覺如果我哋喺上野御徒町站上車就可以唔使轉車直接去到築地市場,於是我哋出返地面穿過アメ橫丁就去到上野御徒町站啦!好快就去到築地市場嘞!




我哋穿過個貨場就到咗好多人排隊嘅壽司店



我哋嚟到都九點幾啦所以已經好多人排緊隊






我哋並無排啊!只係選咗一間唔使排緊但又全店都坐滿日本人嘅舖頭食咗一個set,其實我哋並唔係壽司魚生痴,所以唔係好高要求或識得分好唔好,我哋覺得味道ok用料都新鮮吖










食飽後就喺外圍行咗陣,除食壽司其實哩到都好多嘢食,而且離開咗頭先幾條排晒隊嘅街,出面都重有好多壽司店,價錢重平好多添呀!其實都係喺同一個地方攞貨,我諗味道同質數都唔會差好遠卦!只係無咁出名姐!






行咗輪就返去啦!我哋見重有時間就喺上野再遊吓!






100円店入去睇吓





出到嚟有個男人走過嚟打開手上個牌話係警察話要睇同伴APASSPORT,又嚟,我扮嘢行開兩步扮唔知,點知前面即係多個男人埋嚟節住我,咁咪退後囉!嘩!後面又多個,使唔使呀!同伴A問佢哋點解要查我哋WHY??? 但係佢哋都唔識答,佢哋都係睇我哋入境嗰版,我話佢知我哋今日會返香港嫁啦!佢哋好大反應....HK,然後好有禮貌咁躬講THANK YOU!咁就差唔多,不過我條氣都係唔順,橫睇掂睇我都唔似過期居留呀!我喺香港從來無人查我身份證嫁




我哋去麵包店同埋便利店買定嘢一陣喺機場開餐,哩間就係我哋哩幾日幫襯麵包店嘞




最後我哋差唔多行到返日光館,經過日光館前幾條街0101就諗住入去行個圈就走,點知竟然有Agnes B嘅counter,重有我之前見過無買嘅袋,我話過如果比我再見到佢我就買,而且比起喺參表道間專門店哩到重平啲喎




因為唔夠10000円退唔到稅sale重教我喺店內選多樣嘢超過251円就可以去退稅嫁啦!就係咁搞咗輪選咗個262円頭飾再搞埋退稅,嘩!夠晒鐘啦!於是就飛奔返日光館攞行李,好彩媽媽さ醒目已經交帶咗個人等我哋攞行李,跟住又飛奔去車站,又好彩我哋噚日探晒路,所以都順利搭到我哋預算搭班車,其實我哋係預多咗成個鐘,就算遲一班車都唔怕,但早啲都係安心啲



好啦!到離境大堂咗機位寄埋行李就去侯機室等上機啦!原來我哋兩個夾埋都係得30kg行李咋!重有10kg嘅QUOTA呀





嗰張機票好似張fax紙咁咋



我個lunch呀



未見過原來佢哋係咁抺窗啊


好啦!日本再見啦!



: 早餐:  ¥4,275


      飲品: ¥120X2+¥105


     生果: ¥200


     午餐: ¥100(飯團)+(麵包)¥170+(咖啡)¥380


:  上野御徒町 → 築地市場: ¥260X2


      築地 → 上野仲御徒町: ¥160X2


     上野 → 成田空港Terminal 1: ¥1,920X2


手袋加頭飾: ¥9,800+¥250


 

5 則留言:

  1. Shirley 妳個網誌寫得好好,我朋友都讚好,下次去完京都都要寫個BLOG,大家分享啊!  

    回覆刪除
  2. 嘩................好想食呀!!!!!!!! 咩西北航空將機票咁搞笑o既...係唔係d電腦壞左先寫張機場ja.....

    回覆刪除
  3. 你寫得好詳盡啊,輕井沢和箱根我都會去不過是在2月新年我諗應該幾凍, 點解你在輕井沢唔租單車嘅?咪唔駛行得咁辛苦囉! 我都係諗住去東京輕井沢箱根7天唔知會唔會好趕呢?
    [版主回覆10/19/2007 10:04:00]Hi, Bebila I have replied in your blog

    回覆刪除
  4. 哈," 我哋兩個夾埋都係得30kg行李咋!重有10kg 嘅QUOTA呀 !" 我第一次去, 一個筴都已經30幾kg . . . .  西北6點幾機, 3點就到機場 . . . 你真系超穩陣 . . . .不過, 都系好既經驗
    [版主回覆10/24/2010 18:05:00]! 因為嗰次係第一次自由行, 真係咩都驚驚青青, 所以樣樣都遇早啲囉! 重有可能係遺傳啩! 聽日出發去台, 集合時間係10點! 爸、媽已緊張話要7:30出門口啊!  

    回覆刪除
  5. 哈哈, "聽日出發去台, 集合時間係10點! 爸、媽已緊張話要7:30出門口啊!" 如果我無記錯, 你地要坐A22, 明天唔系紅日, 人人要上班, 晏咗出門都幾多人, 早D出門OK嫁, 大不了去食個早餐再集合吧    玩得開心D, 特別要和爸、媽影多幾張相,  佢地一定推三推四, 不過D相曬好, 佢地就會四維囉比人睇 . . . ..  

    [版主回覆10/24/2010 19:38:00]係呀! 我係搭A22咖! 佢哋咪就好似你咁講驚返工多人, 所以早就早啲啦! 反正喺屋企佢哋都行唔安坐唔落! 早啲出去咪等佢哋四周圍行吓囉!
     

    回覆刪除