2011年7月24日 星期日

匆匆忙忙沖繩四天團 - Day 3.2

首先我哋會落沙灘先,落沙灘可以行落去或搭車,夏季(七月、八月)可以坐shuttle bus,9:00 - 19:00 喺泳池旁嘅閘口就會有得搭,一分鐘車程就到。如果選擇行落去,都係喺哩個閘口出去行幾個字就到。


如果唔係酒店旺季,酒店會改用高爾夫球車。



如果九點前就想落沙灘,可以喺酒店正門都有Shuttle Bus搭,只要去門口有個counter同工作人員講,佢就會call間小巴過嚟接人。同埋哩個counter喺夏季會放滿大毛巾比住客借用,所以唔使攞房嗰條大毛巾,如果過咗夏季,問Receiption都有得攞啊!


我哋雖然係九點後先出發,但因為喺酒店門口攞完毛巾,費事又行返落一層嘅泳池旁上車,所以叫工作人員幫我哋call間小巴過嚟接我哋。


閃兩眼就到嘞!



睇吓酒店提供嘅相,可以望到成個沙灘嘅情況,左邊係游水,右邊係碼頭。



哩到係哩個沙灘嘅服務中心,如果想參加潛水或坐觀光船都可以喺哩到報名。


首先行一圈影吓相先



哩個水池係教人學潛水,見到有啲學完就即係出去出面碼頭上船出海啊!



去潛水、坐觀光船都會喺哩個碼頭出發。






藍天白雲、水清沙唔算幼,好興奮呀!



游水嘅灘喺隔離



哩到望出去對面就係出名嘅景點 - 名護海中展望塔。有啲團友無去游水去咗哩到,佢哋都話哩到都唔錯喎!





影影吓相突然好多黑雲同刮起大風,好想落大雨啊!所以哩幾張影唔到藍天白雲添!




哩個沙灘啲沙粒比較粗呀!




個灘啲水行到好出都唔會好深,可以見到遠處圍咗波波嘅水深都係去到pat pat位,而波波出面會有好多珊瑚同石頭,唔可以游出去,所以哩到只適合玩水,唔係好適合游水啊!



啲水好清,但唔夠前一日海龜館隔離個沙灘嘅水藍呀!



好嘞!影完相去換衫嗱!出發前想睇吓沙灘嘅設備係點,但好似好少人講,所以我今次都影咗啲相,等有機會去嘅朋友有個槪念呀!


去返頭先落車位嘅大堂,然後上二樓。第一眼見到嘅係一個開住幾大冷氣嘅休息室。所以酒店條大毛巾好有用,游完濕晒個身走上嚟真係幾凍咖!無條毛巾褸住真係好易冷親呀!



跟住走過一條通道就會見到更衣室。



更衣室旁有個小朋友玩玩具嘅地方。



更衣室內有一排locker,費用100円一次,如果鎖咗又開返攞嘢,再鎖返就要再入過100円啊!換衫都係喺埋哩到。


沖身嘅地方有冷、熱水供應,但就無沖涼用品,所以要自己帶皂液同洗頭水啊!



沖涼格旁有個無水嘅風呂,點解唔放水入去用呀?



搞掂嘢換好衫就出去游水...呀應該係玩水,雖然唔係好游到水,但都玩咗個幾鐘先返上岸啊!


頭先服務中心左手邊有間細細嘅餐廳,係食一啲沖繩麵。





服務中心右手邊就係Lawson,24小時營業。




出發前開茶會,旅行社啲人話因為哩一帶得一間便利店,所以唔好諗住哩到有好多嘢食,有都會比人買晒,但我眼見樣樣都好齊喎!



飯團都好咁多種,點會無嘢食呀!早知前兩日唔使買定杯麵啦!



唔知係咪做完運動特別肚餓,見到樣樣都想食,所以我同細妹都決定個杯麵留返香港先食,今個晏就就喺到買嘢食啊!




 


 


                                                                                                           

here

                                                                                                          續  ...... Day 3.3


4 則留言:

  1. Shirley :              好詳細既呢 ~  好淺水喎 , 我比較鍾意遊泳池多過沙灘 .  
    Bye Bye !
    [版主回覆08/07/2011 19:24:00]因為之前喺網絡都搵唔到啲資料, 所以到自己去就影多一兩張比大家睇吓囉! 好似你介紹租車過程同個GPS用法, 都係比其他所講嘅詳細啊! 我都係學吓你啫! 我相反鐘意去沙灘, 就算喺香港我都係去沙灘多過去泳池啊! 當個人瞓喺個海上面飄飄吓, 好自由啊! 喺泳池咁瞓喺到比人鬧阻住晒呀!

    回覆刪除

  2.               香港相信只有海下的灘才有如此平坦和風不作浪。
    [版主回覆08/28/2011 13:26:00]海下灣?? 我未去過呀! 我通常會去銀線灣或清水灣, 有時都可以見到一群群魚仔喺海中游, 但論到平坦無風浪, 香港嘅沙灘真係無得比啊! 而且我試過佢哋啲海水, 無香港啲咁喊咁苦咖!

    回覆刪除
  3. 小子曾貼上過海下灣的網誌,歡迎來訪:
        http://hk.myblog.yahoo.com/kaileung_tsang/article?mid=2149       
    [版主回覆08/29/2011 15:15:00]個海灘果然幾靚啊!  我好鐘意海咖! 海灘更係我至愛呀! 等我究竟吓啲路線, 搵日去行吓先得!

    回覆刪除
  4. 先往西貢巴士總站,在鄰近的綠色小巴站乘 7號線(寫著往海下),尾站便是了。前往時最好先查潮汐漲退時間,若妳的到達時間遇上退潮便不應前往,因水太淺,可能行出千米水仍未過膝呀!

    回覆刪除