2011年7月20日 星期三

匆匆忙忙沖繩四天團 - Day 2.1

2011年7月8日 


瞓醒一覺,一望出窗外 ,天朗氣清,雖然只係瞓得四個鐘,但感覺都好精神呀!



由於餐廳7點先開始食早餐,所以先落街走走,一朝早嘅國際通冷冷清清。





每次都鐘意行吓便利店,裡面實在太多嘢睇,淨係飲品都已經眼花撩亂。



哩間咖啡店次次嚟日本都會幫襯吓,但今次無收穫。




行咗陣就返酒店食早餐,西式都係一啲例排嘢,而日式就放咗一啲沖繩嘅特產,但我嘛嘛哋有興趣。



黑糖糕



中間嗰碟係苦瓜炒蛋,左手哩碟好似係炒海帶。



沖繩名產水雲。



黑色哩個係墨魚汁包,但係因為好大個,我食飽咗先見到,所以無試到,而家諗返都有啲後悔呀!



就係食咗哩碟嘢飽晒,咩都食唔落嘞!


我哋準時8:30上旅遊巴,但哩團嘅人都唔多鐘意準時,遲咗成20分鐘先齊人開車。


臨走前影吓酒店嘅外貎先,所在地點真係好方便呀!



哩一日嘅行程係四日裡面最豐富,基本上沖繩重點嘅景點都喺今日睇晒!


第一個行程係首里城  ß有興趣可以click入去睇吓佢嘅歷史





日本嘅二千円就係用首里城嘅第一道門 - 守禮門嘅做標誌啊!二千円而家喺日本已經停印,所以哩張二千円好珍貴咖!




今日都好多團體嚟參觀呀!



有興趣可以著吓流球嘅民族服裝影吓相,當然要比錢啦!



其實城內好多建築都因為天災、戰亂被破壞後再重建,但哩道石門就由一開始直到而家,所以已經被列入世界遺產嗱!




之後就會經過幾道哩啲大門



同中國一樣,有對石獅子喺門口啊!




哩日嘅天氣真係好熱,又要行斜路、又要行樓梯,烈日當空都幾辛苦啊!



導遊一邊行一邊介紹,大家又沿途影吓相,大槪行咗半個鐘先去到主建築物。


哩個門口係售票處,過咗哩個門口就可以去到首里城嘅主殿。



要參觀哩座主殿首先要除鞋,門口會有工作人員派膠袋用嚟裝住對鞋。



展廰前半部份係嚴禁影相,裡面放咗一啲歷史圖片同埋文物,但由於時間關係,都唔係睇得好仔細。


展廳後半部份就可以影相,因為以前流球基本上都係受中國文化影響,所以佢哋哩到嘅王都係用龍做代表,不過條龍就得四隻腳趾呀!


重有坐龍椅添咖!



鑲滿咗寶石嘅官帽。



殿內大廳



後院就有返啲日本特色啊!




哩個長廊加竹簾,我睇「空間大改做」,啲日本人好鐘意哩啲懷舊feel咖!



由室內影返出去主殿嘅大門口。



參觀完畢,經過賣記念品睇咗陣,無咩收穫,都係時候集合返上旅遊巴嘞!



重要行條漫長嘅路先返到停車場啊!



上到旅遊巴之後,又係要等一啲唔守時嘅團人,最後又遲幾個字先再出發。


下一站係距離那霸市個幾鐘頭車程嘅万座毛。其實万座意思係一個比喻可以坐到萬人嘅地方,而毛就係青綠嘅平原。


香港人熟識哩到大槪係因為多年前嘅電影「戀戰沖繩」。



哩日啲太陽真係想將我晒溶呀!



哩個位就係全場嘅焦點呀!



啲水清到見底咖!



再 zoom 近啲先!



啲水藍得好靚啊!



我好鐘意哩到唔同嘅藍色呀!




有隻觀光船經過呀!




哩間就係ANA酒店嗱!





海中心有一對「夫妻石」呀!




影完相,當然又係去門口嘅記念品店八卦吓!不過都係無咩特別收穫啊!




下一站係去果園同埋水族館。


                                                                                                          

here

                                                                                                          續  ...... Day 2.2


14 則留言:

  1. 最討厭的事就是遲到 , 誤人誤己
    [版主回覆07/21/2011 12:40:00]係囉! 而且哩啲有傳染病, 最初只有一、兩組人遲, 遲遲吓就有一半人都遲, 跟團最唔好係哩樣呀! 雖然我知每次都實會遲, 但我自己緊持準時到集合地點啊!

    回覆刪除
  2. 人人自律就最好呢 !!
    [版主回覆07/21/2011 20:58:00]完全同意啊!

    回覆刪除
  3. 哈哈, 你應該學吓D 香港 C9, 帶多幾個袋去食自助餐  . . .
    [版主回覆07/21/2011 20:59:00]! 我又無諗過要袋走啲嘢食喎! 我食自助餐係最蝕底, 次次都食得唔多就飽晒啊!

    回覆刪除
  4. 呀, 我以前有個專門對付 唔多鐘意準時團友嘅辦法 . . . 我會上咗車後, 攞住部相機落番車影相, 一個一個影底晒D "遲來者" 仲要食中飯時翻出嚟一路睇, 一路點名. . . 睇你第二日點死 . . .
    [版主回覆07/21/2011 21:03:00]吓! 咁佢哋會唔會仇視你咖! 我之前跟團好少遇到唔守時嘅人, 係今次咁咋! 不過佢哋除咗唔準時外, 其實個個都無咩嘢! 唔算麻煩啊!

    回覆刪除
  5. 風景好靚!
    另外便利店食物排得咁整齊, 真係不得不服日本人!

    [版主回覆07/21/2011 21:08:00]係呀! 哩日睇嘅風景真係好靚,好舒服,可惜係跟團,啲時間唔係自己控制,所以有啲地方想留耐啲都唔得啊!但唔跟團,啲景點太散,只靠巴士的話,得四日比較難搞,好似你咁識揸車就唔同啊! 日本人嗰份堅持同執著精神我一向都好佩服啊!

    回覆刪除
  6. 愛笑愛哭的人2011年7月21日 下午4:16

    我之前6 月都跟左團去沖繩 不過是5 日 你跟4 日團是不是好急呀 ???
     
    我地個團人大部份都幾好 起初都兩個妹妹仔成日遲到 但俾個領隊串下佢 之後個3 日佢地都好準時了 哈哈
    [版主回覆07/21/2011 21:17:00]四日真係有啲趕, 而且我哋重有一日係自由活動, 所以其實只有一日係遊景點, 不過因為批假問題, 所以無辦法啊! 我哋嗰團都係有兩個妹妹仔一開始就遲, 話無帶手錶喎! 領隊比較好人, 無特別話佢哋, 不過就算話, 佢哋好似都唔多聽到咁, 次次都要領隊搵佢哋返嚟, 到最後行完outlet要趕往機場佢又遲, 可能真係要趕飛機, 最後領隊真係黑面搵佢返嚟, 重喺旅遊巴好嚴厲咁話佢, 但我見佢都唔係好覺得自己有錯囉! 除咗兩位妹妹仔外, 其實啲團友個個都幾好, 幾好傾、幾好相與, 係可能因為次次都有人遲, 自然人人都會繼續遲囉!

    回覆刪除
  7. 嘩!好好天氣!影得有靚,藍天白雲好寫意啊。
     
     
    [版主回覆07/22/2011 07:29:00]係呀! 所以差啲將我晒溶咁制呀! 不過咁啲相影出嚟先靚啊!

    回覆刪除
  8. ~~ DoNaLd & IrIs 愛閒遊 ~~2011年7月21日 晚上11:31

    d相影得好靚喎 !!!
    今次旅途愉快嗎?
    多不多收獲呀???
    [版主回覆07/22/2011 07:32:00]去玩就一定愉快 ! 收獲?? 你意思係買嘢, 因為今次時候真係唔多, 而且啲嘢好貴, 雖然我啲円嘅對換率係0.0765, 但都唔捨得亂買嘢, 再加上今次嘅團費真係好貴, 所以就忍吓手咁囉!

    回覆刪除
  9. 想問下你張二千YEN係邊度換架?
    [版主回覆07/22/2011 07:28:00]張二千円唔係我咖! 係領隊借比我哋影相咋!  而家無咩機會有人搵出嚟用咖啦!

    回覆刪除
  10. Shirley :           酒店早餐都唔差 ,         遲 20分鐘都得 ? 都好有時間觀念 .       2000Yen ? 我都從未見過 , 真係大開眼界呀 .
    果個海岸景 , 真係靚到爆 .  
    Bye Bye !
    [版主回覆08/07/2011 18:59:00]哩幾日嘅早餐都非常唔錯呀! 係自己嘅食量唔有限, 所以試得唔多囉! 我都好想擁有一張2000yen呀! 不過真係好難, 我睇個有個blog友好好彩, 佢就係哩個首里城嘅記念店有個好心嘅太太找比佢呀! 開心到佢死呀! 個海岸如果比你去, 一定行返佢暈佢成個山頭呀! 嗰到真係正到痺呀!

    回覆刪除
  11. 只可惜呢個所謂「守禮之邦」曾有過侵略我國的 血 的歷史!
    [版主回覆08/28/2011 13:14:00]所以我都唔係完全認同日本人嘅行為, 我去咗咁多次日本, 但我唔會去靖國神社囉! 重有就係釣魚台係中國咖!

    回覆刪除
  12. 情意結始終存在心裏,所以就算見到日本的景色怎樣怎樣靚,一想到他們祖宗昔日對我同胞的惡行,這些靚景色便沒有心情欣賞下去了。
    [版主回覆08/29/2011 15:07:00]所以我對日本哩個地方真係又愛又恨呀!

    回覆刪除
  13. 以妳這個年輕人來說仍未忘歷史教訓,實在難得了!

    回覆刪除
  14. Hi Shirley ,

    我呢係首里城換到幾張順霖巴嘅二千円呀~~~超好彩....
    有機會想去多次沖繩玩添~~
    [版主回覆10/19/2011 08:40:30]你咁好彩, 喺邊到可以換到呀? 咁你好好收藏啊!
    我都想再去呀! 下次要自己去先得呀!

    回覆刪除