2011年7月23日 星期六

匆匆忙忙沖繩四天團 - Day 2.4

睇完每豚表演又急急腳去大水族館,因為五點鐘會有喂食鯨鯊表演。



一過咗入閘口,就見到一個放滿海星同海心嘅水池,個個都伸手去同佢哋嚟個親密接觸。





我淨係敢摸啲海星咋!我知啲海心滑潺潺,我見有個日本女仕模到打晒冷鎮咁!都係咪搞我嘞!



再通過一個有好多熱帶魚嘅水箱。




哩條應該係班嚟咖!Yummy !




嘩穌眉呀!正呀! (真衰,嚟睇魚就掛住食人哋!)



我第一次親眼見水母咋!




跟住會經過好多個展區,但由於時間關係,室內光線又太暗,我哋唔係好識調教部相機,所以最終只係將哩啲部份記入腦中就算了。


最後去到全場嘅焦點嘞!真係好多人啊!


未出發前已經睇過哩個畫面N咁多次,所以好多人入到去到嘩..嘩聲,但我自己就平靜得多啊!



Hmm....條鯨鯊比我想像中細。



其實我覺得佢哋幾慘咖!三條咁大嘅魚比人困咗喺個大水箱入面,游嚟游去都係得哩啲啲地方。






準時五點,水面有工作人員放啲蝦落水,啲鯨鯊就將開佢哋嘅大口開餐啊!



睇完鯨鯊開餐後就準備離開,哩個半圓形通道都係熱門影相嘅地方。




喺記念品店行咗陣就差唔多要回程返去旅遊巴嘞! 之前落斜唔覺,而家要上返斜路,好辛苦啊!



經過鯊魚館,無時間入去睇啊!



重有好多展館,每個門口都整得好靚啊!




重要行多四、五條哩啲長長嘅電梯先出到門口啊!



例排又係有人遲到,不過跟住係返酒店,都已經無咩所謂啊!


返到酒店門口,突然刮起大風同勁大雨,啲雨係打橫掃過嚟,不過只係個幾字落完啊!哩幾日沖繩啲天氣都係咁呀!



萬豪酒店大堂,由於第二日全日都會喺酒店內活動,酒店嘅情況就留返下篇先詳細介紹啦!



就放住張由房望出去嘅黃昏景先啦!



我哋入住哩日係星期六,好多日本人都嚟沖繩渡假,我出發前上網睇過哩兩日啲房係full晒,所以領隊話哩日晚餐會比較多人,好彩佢一早已經幫我哋訂好位,哩餐旅行社安排咗幾個餐廳比我哋揀,琉球料理、中華料理、自助餐同BBQ自助餐,我check過酒店收費沖繩料理就要6000円,而其他就4000円,但我細妹就想食BBQ,而且領隊亦極力推介BBQ,所以就選佢啦!


當晚真係幾多人,全個餐廳都滿座,所以我哋要同團友夾台坐,我哋被安排同兩個妹妹仔坐,佢哋真係好細個,二十歲都未夠。




其實選擇嘅食品唔算太多,但啲蝦、帶子都幾新鮮啊!




又係一碟已經搞掂咗我,而且嗰兩位妹妹仔咩叫做生同熟都分唔開,一係唔熟就放落口,一係就燒到啲嘢好似舊黑炭咁,最後我同細妹唔底得頸,燒埋比佢哋食呀!所以又hea咗啲時間比佢哋,而家啲九十後真係....! 有個重話有啲水泡喺個身到發出嚟,要領隊第二日帶佢睇醫生,但重不斷咁食海鮮同牛,我同佢講咗佢都好似唔多聽入耳。佢最後原來係出水豆呀!又發燒,搞到唔可以同我哋一齊返香港呀!詳情下兩篇先再講。



食飽飽就返房沖涼瞓覺,一嚟前一晚瞓得幾個鐘,二嚟哩日嘅行程真係好攰呀!所以要早抖呀!


                                                                                                         

here

                                                                                                          續  ...... Day 3.1


8 則留言:

  1. 你影d相好靚呀!
    [版主回覆07/24/2011 12:46:00]! 多謝晒! 其實唔關我事, 只係啲影靚咋!

    回覆刪除
  2. 我覺得你地d 食物好似好過我上次...你跟那間?
    [版主回覆07/24/2011 13:15:00]我跟縱橫遊, 可能哩個團嘅團費真係比較貴, 所以每餐嘅質素真係唔差啊! 只係自己食量唔大, 好多時都唔係食得太多。 我知你上次跟東瀛, 其實以前未識自由行時, 我次次都跟東瀛咖! 公司同領隊都真係做得好好, 但前幾年遇到一個超賤嘅領隊, 成個旅程除咗sell嘢就咩都唔講, 包括行程、歷史,幫團人買嘢又極略水, 佢重夠膽死喝啲團友熄攝錄機呀! 其實人哋係影風景都唔係影佢! 我知佢而家重喺東瀛做, 所以我唔會參加哩間公司嘅日本團咖嘞!  跟團去旅行真係好睇個領隊/導遊咖! 

    回覆刪除
  3. ~~ DoNaLd & IrIs 愛閒遊 ~~2011年7月24日 上午11:42

    不用出發去, 見到妳d相片都開心啦~~~
    好像身在其中囉~~
    [版主回覆07/24/2011 12:52:00]! 多謝! 我每次睇你啲旅行相就會搞到自己心癢癢, 好想再出發啊!

    回覆刪除
  4. ~~ DoNaLd & IrIs 愛閒遊 ~~2011年7月24日 下午5:40

    哈哈, 有沒咁誇張呢, 係妳個心一直想想想想想出發囉 @@
    [版主回覆07/26/2011 20:15:00](Empty)

    回覆刪除
  5. 哈哈,我終於可以睇到你噶blog啦..追翻曬你以前的blog先~
    [版主回覆07/26/2011 20:15:00]咁犀利, 係喎! 你最初係可以睇到blog同開咗account喎! 咁你慢慢睇啦! 我一陣send返啲相去你之前比過我嘅e-mail到啦!

    回覆刪除
  6. Shirley :           呢個 "水族館" , 果然係重頭戲 , 俾我都 "嘩嘩聲" 啦 .  
    有時搭落D "騎呢" 團友度 , 真係血都嘔埋 , 自己都唔識照顧自己 , 就咪鬼出門啦 ,      所以我最鍾意自己一個人遊 , 仲要自駕果隻 .
    Bye Bye !
    [版主回覆08/07/2011 19:17:00]如果我自己唔係喺啲blog到睇咗哩個大場面, 我都會嘩咖! 都真係幾壯觀啊! 所以我覺得哩個地方幾值得嚟啊! 跟得團都遇咗會有啲騎呢或麻煩嘅團友咖啦! 不過之前通常一家人出發先跟團, 所以好少要夾其他團友坐, 而今次哩兩個妹妹仔我真係可以寫個服字比佢呀! 有一次其中一個扒咗啖飯入口先問我哋啲飯係咪熟咖! 使唔使放落煎吓先食呀! 我當堂將口中嘅食物噴返出嚟咁制呀! 米已經煮成飯都分唔出,  香港以後就係靠哩啲楝樑, 你話死唔死得!

    回覆刪除
  7. 人類是最自私的,海中魚,空中鳥都被困在水箱中,樊籠裏,本來是世上最自由的動物,由於我們的自私,滿足個人喜愛,奪去了牠們的自由!奈之何!
    [版主回覆08/28/2011 13:23:00]係囉! 明明哩啲咁大嘅動物應該係大海自由自在咁游咖嘛, 我見佢哋只可以喺哩個有限嘅魚缸裡面, 游兩吓已經到盡頭, 真係好慘啊!

    回覆刪除
  8. 所以小子只會養貓狗,不會養鳥與魚,就是這個原因。
    [版主回覆08/29/2011 15:12:00]哦! 原來係咁! 有道理...有道理!!

    回覆刪除