2011年7月27日 星期三

匆匆忙忙沖繩四天團 - Day 4.1

快樂嘅時光永遠都係過得好快,轉眼間已經去到旅程嘅尾聲嘞!

起身後再出露台發呆一陣,望住哩個咁靚嘅環境真係有啲依依不捨呀!望望吓諗起左遠處應該係万座毛嘅位置,由於我今次帶嚟兩部相機,其中一部係以標榜影遠景,於是忽發奇想,攞部機出嚟睇吓可以影到有幾遠先。

嘩!真係影到万座毛對住嘅ANA酒呀!我就咁用眼睇係睇唔到啊!嘩!而家啲相機真係恐怖啊!如果立心不良,攞住部機周圍影重得了!

再zoom近啲先,真係好清楚啊!



拾好晒嘢就先落去餐廳食早餐先,哩間五星酒店都算幾有心思,啲早餐除咗大路嘢無咩點變外,其他好多前一日食過嘅款式哩一日會改變,食嘅嘢唔會一模一樣,令人有啲新鮮感唔使咁悶呀!



好似哩個牛油,係用沖繩出名嘅紅芋(即係紫心蕃薯)同埋塩嚟做啊!幾特別!



麵包都係紅芋





我自己就唔食蕃薯,不過哩個芋泥我細妹話好好味呀!



因為前一日食嘅煎蛋好好味,所以哩朝都encore哩隻煎蛋,但師傅唔同咗,煎出嚟嘅蛋好老啊!一啲都唔好食呀!


我真係越嚟越愛沖繩嘅苦瓜啊!



食完早餐返房拾嘢後,喺酒店大堂等旅遊巴時,見到前兩日話唔舒服嘅妹妹仔戴晒口罩,行埋佢睇吓佢,原來佢出到成面、成身都係水痘,紅紅腫腫咁,領導前一日同佢睇咗醫生,醫生雖然開咗藥比佢食,不過佢仍然發緊燒,而且醫生話水痘係會傳染,所以寫咗醫生紙要佢一星期後好返先准佢上機,即係話哩一日佢唔可以同我哋一齊返香港啊!



同佢傾咗陣知佢屋企人買唔到機票過去睇佢,佢自己身上無咩現金,醫藥費都要領導幫佢出住先,跟住重要解決嚟緊一星期嘅住宿問題,又唔可以太貴,再加上佢病成個樣,完全無人照顧,一個連食物係生同熟都唔識分嘅妹妹仔都咪話唔擔心啊!



哩一日重有幾個行程,首先要去一個魚市場睇人將一大條金鎗魚喺短時間內解體,我之前都喺網上面見過,其實覺得無咩特別,不過跟團係咁咖啦!未必每一個項目都啱自己。



一入到市場,連我唔太怕腥嘅人都覺得好腥呀!場內有一啲檔口,但佢哋嘅貨品賣相唔多吸引,亦唔係話好平,行咗一圈無咩收穫就去睇表演嘞!



工作人員係間大房裡面,我哋隔住塊玻璃睇,唔知係佢攞把刀唔夠利定係佢自己唔夠力,眼見佢劏嚟劏去都劏唔開條魚,哩個所唯表演好似流咗啲呀!不過我用快鏡錄,所以唔係好覺佢啲流嘢,最後佢將條魚解體咗一半就收工嘞!



工作人員將金鎗魚嘅背部切出嚟比我哋食,哩部份嘅味道真係好嘛嘛,食咗一舊試吓味就算啊!但我見啲團友食得好滋味啊!唔通自己食嘢真係咁挑剔?






喺試食嘅期間,有團「好美麗嘅華人」嚟到,佢哋就喺最出嘅檔睇表演,唔使隔住塊玻璃,而且落刀嘅哥哥仔重好後生同幾靚仔咖!佢嘅刀法好過頭先位大叔好多啊!又快又準,好精彩啊!





哩件一睇就先係好嘢,當然唔會攞嚟試食啦!



魚市場出面有檔生果、蔬菜檔,見到啲苦瓜250円兩條細細條,心大心細唔知買唔買好。


                                                                                                              


                                                                                                    
here
 

                                                                                                     續  ...... Day 4.2









 





11 則留言:

  1. 我地都唔係隔住玻璃ka 好近
    表演個個係男仔 我覺得佢好掂ka 無論是刀工定係個樣
    我寫到個日我都會post 同佢影個張合照先 哈哈

    回覆刪除
  2. 妳部什麼機?好利害.
     
    [版主回覆08/07/2011 14:38:00]Canon SX30IS

    回覆刪除
  3. Shirley   :            要住多一個星期都幾係野 , 俾我都帶唔夠錢啦 .  
    haha ... 用快鏡真係慳番好多時間 , 好似無影手 .   
    有得試食都唔錯喎 .  
    Bye Bye !
     
     
    [版主回覆08/07/2011 19:36:00]係呀! 所以我開頭都擔心佢而想借錢比佢咖! 不過好彩我無咁做, 我諗你睇咗後幾篇已經知點解, 最弊佢連card都話無, 出得嚟玩我自己點都有啲準備, 起碼出起事嚟夠錢買張機票返屋企先得啦! 個新相機有個快鏡function真係幾好用啊!

    回覆刪除
  4. 2011-08-07 14:38 Canon SX30IS-/ 呢部機我買o左唔識用, 最後賣o左比院長~ (行山隊長)
    [版主回覆08/10/2011 07:45:00]其實部機係我爸爸買, 但佢買咗話唔識用比咗我, 我搵朋友教我, 但都係模唔清點用, 而家都係識用佢少少function咋! 都係傻瓜機啱我多啲囉!

    回覆刪除
  5. 我係zoom o既時候, 隻手唔夠定, 影相影到郁晒, 我見你影ana間酒店影得好定好清呀~
    仲有我唔鍾意佢wide得滯, 影風景好, 但係影全體相o既時候, 則邊個d人邊做晒肥人 , 但係你d相又影得好好喎, 你呢10幾篇blog o既相係咪都係用呢部影得多d呀??
    [版主回覆08/11/2011 07:42:00] 係呀! zoom嘅時候要隻手好定先可以影到相, 所以影ana酒店時我係將個相機晾喺露台嘅扶手上面先影到咋! 至於影人我又無留意會唔會肥啊! 不過哩部機因為強項影遠嘢, 所以近影(微距)完全唔掂, 同埋我真係重未理解晒佢嘅用法, 所以啲相係一半用哩部機, 一半用舊嘅傻瓜機(canon 850IS), 你見相頂頭有我個blog address, 如果個address嘅size大啲就係用舊機, size細啲就係用SX30IS啊! 部傻瓜機影夜景真係唔錯咖! 成日都可以呃到人以為係用啲大機影, 所以雖然用咗幾年想換機, 但最後都係唔捨得佢啊!

    回覆刪除
  6. 妳爸爸詐唔用,有心醒妳咋,傻女!

    回覆刪除
  7. 妳爸爸詐唔 識 用,有心醒妳咋,傻女!
    [版主回覆08/28/2011 13:34:00]! 真係咁嘅咩! 我真係唔知喎!

    回覆刪除
  8. 天下父母心皆如此,做仔女的識做啦!
    [版主回覆08/29/2011 15:21:00]所以放假都會陪佢哋飲吓茶, 行吓街咁囉! 

    回覆刪除
  9. 千祈不要學觀塘那個醫生,告完爸爸告媽媽,他眼中只有一個 「錢」 字!不是嗎,據報章引述,這個醫生擁有超過25個物業,身家過億計,單靠收租,已可過風流快活日子,但同仍然年中無休,星期一到五,朝九晚九,星期六和日就收早兩個鐘,幾搏?
    [版主回覆08/29/2011 15:32:00]我都睇過哩單新聞, 都唔明哩個醫生搵埋咁多錢做咩? 有時見到啲家庭為咗錢吓吓搞到上法庭, 你告我我告你, 為咩呢? 搵埋咁多到最後都帶唔到落去咖啦!

    回覆刪除
  10. 妳真乖女,妳知道:「樹欲靜時風不息」的下句啦?
    這位大醫生正在為他的子女作反面教材呀!
    [版主回覆08/29/2011 16:37:00]我只係做返本份啫! 又或者我媽咪做咗一個好磅樣, 因為佢好孝順老人家咖! 以前對嫲嫲、公公同婆婆好好咖! 甚至乎到而家我姑婆, 即係公公嘅家姐, 已經105歲啦! 雖然住喺老人院, 媽咪都成日同我哋一齊去睇佢, 陪佢傾計, 幫佢清潔咖! 佢話襯佢而家重食得, 聽得就比佢食, 同佢講嘢! 咁樣係佢自己本人感受到, 否則一旦佢返咗去天主到, 到時燒咩講咩都只係比生嘅人睇, 對於走咗嘅人都無意思啊! 能力可以而唔做到時有時只會遺憾! 我唔想自己有咁嘅遺憾啊!

    回覆刪除
  11. 105歲?不要替他戒口呀,他老人家要食乜便給他食乜,盡量滿足他的口福便是了!
    [版主回覆08/29/2011 18:38:00]係呀! 佢最鐘意飲咖啡同食熱香餅, 我哋隔個星期就帶佢去嘆茶咖啦! 老人院啲姑娘成日叫我哋唔好比咖啡佢飲, 無益喎! 但都百幾歲, 只要佢鐘意又食到, 我哋都無理咁多啊!

    回覆刪除