2011年7月27日 星期三

匆匆忙忙沖繩四天團 - Day 4.3

行到一點半就到領隊約定嘅地方食飯,哩間餐廳都幾出名啊!我見好多自由行嘅人都會嚟哩到食咖!

因為餐廳都幾多人幾full,所以要同團友夾枱坐,領隊又再一次安排妹妹仔跟我哋坐,出水痘嗰個就跟佢自己坐,由於妹妹仔有本事可以將條菜燒到出火,為免佢搞極都無得食,我哋唯有出手燒埋比佢食,所以都唔記得咗要影相呀!

臨尾影返張先!


哩到啲食物選擇都幾多啊!淨係飲品都有好多可以揀呀!












食完飯後準備坐車去outlet,喺等旅遊巴嘅時候,由於出水痘嘅妹妹仔唔會同我哋出機場,所以佢留喺餐廳到等酒店消息,領隊都算係咁啦!見到佢無錢交酒店費同嚟緊個星期嘅生活費,就借咗十萬円比佢,當時佢當住我哋咁多團友數錢比佢,我諗佢係想我哋幫佢做個證明,佢真金白銀咁借咗十萬円比佢啊!
雖然只係相處幾日,同枱食過幾次飯,但見到佢咁嘅情況,一個人重病緊咁要留喺一個陌生地方,真係唔係好放心啊!大家嚟個擁抱同安慰一吓之後,我哋就懷住唔安樂嘅心情離開餐廳繼續我哋嘅行程啊!搞到我都差啲喊出嚟呀!
(後話:由於實在唔放心,返到嚟香港幾日後有搵領隊問妹妹仔嘅情況,領隊話妹妹仔已經退燒同埋好得七七八八,而且重識到人出咗去玩,咁都放心啲啊! 不過好似話妹妹仔嘅屋企人關於借錢嘅事唔多認數,佢叫我如果有咩事要同佢做證,所以當日佢當住咁多人先比錢妹妹仔都啱啊!希望只係一場誤會啦!)
[2011年7月31日: 個領隊終於可以攞返啲錢嗱!不過佢要同妹妹仔啲屋企人講如果唔還就報警先肯還啊!最後都係搞到不歡而散呢!]


由國際通出發只係幾個字嘅車程就去到Outlet嘞! Outlet對於我一向都無咩吸引力,如果係自己去我一定唔會去outlet啊!一個鐘頭對於我嚟講時間太多了。
哩個outlet地方唔算大,價錢唔算平,貨品唔算新,outlet outlet,啲貨當然out out哋先襯吖嘛!



有輛小火車比小朋友坐。


哩個女仔喺到將啲玻璃用手畫上圖案做裝飾,畫得幾靚啊!


去咗間手信店行吓。


未嚟嘅時候好想買一對石獅子,但嚟到嘅時候見到又好似無無謂謂,到最後買咗哩個鎖匙扣都幾好啊!


好嘞!最後一個行程就係去赤嶺駅坐一個站嘅單軌電車去機場。

一上到月台就有車,要拿拿臨跑上車啊!








好快就到咗機場啊!


哩個喺那霸空港駅嘅指定影相位。


過條天橋就係那霸機場國內線。


我哋當然唔係去哩到上機,我哋先上返旅遊巴再過去國外線機場。由於機場真係好細,我哋到起飛前半個鐘先入閘到候機室。


候機室只有一間細細嘅免稅店。



黃昏時分,終於要踏上歸途嗱! 沖繩我會再嚟啊!


前幾年成日都覺得沖繩曾經比美國佔領過,哩到會比較西式,無咩好睇,但今次嘅到訪,沖繩令我有另一番感覺,雖然今次只係跟團,但感覺都幾好玩,成個行程都好relax,總括嚟講沖繩都好值得嚟玩,如果識揸車,沖繩好啱自駕遊,但好似我咁唔識揸車而要自由行,就要查好晒啲巴士時間表啊!否則會擔誤好多時間啊!

                                                                                                                            ...... 完


17 則留言:

  1. 唔認數? 唔係化....咁攪香港唔會有好心人了
    [版主回覆07/29/2011 20:24:00]我都係咁話, 其實個妹妹仔之前同我講無錢住酒店時, 我都有諗過借錢比佢咖! 不過後來領隊先借比佢咁, 否則到我頭痕呀! 好搞笑, 我搵佢嗰陣佢好似搵到個人可以呻! 不斷咁向我投訴, 同佢之前帶隊個style完全兩回事呀! 佢話佢返到香港佢啲屋企人聽咗佢一次電話之後, 話claim到保險先再講, 跟住就完全唔聽佢電話, 公司話無責任同佢揹哩條數, 當佢自己借比當時人, 所以佢喊晒救命啊! 我都好同情佢啊! 希望佢可以追得返啦! 大嗱嗱萬幾蚊, 都咪話唔肉赤呀!

    回覆刪除
  2. Shirley, 你跟邊個旅行團架?4天團費多少?旅行時,你仲會唔會戒口的呀?
    [版主回覆07/29/2011 20:41:00]Hi, 好耐無見你嗱! 近來好嗎? 剛剛過去你個blog到睇過, 見你都應該唔錯啊! 因為近哩幾個月工作實在好忙, 平時放咗工都好少上網, 所以好耐都無去啲blog到探吓啲blog友仔, 真係有啲慚愧啊! 我今次係跟縱橫遊, 因為哩個團標榜兩晚住萬豪同埋食得到唔錯, 所以團費相對比較貴, 四日要7400蚊(團費+燃油附加費同機場稅) 再加400蚊導遊費, 當中有兩餐唔包要自己食啊! 我平時都重有戒口, 但去旅行嗰幾日就無刻意咁去戒, 不過我都唔會太放肆, 好似我而家己經戒咗唔飲凍嘢, 咁就算嗰幾日都都無咩飲凍嘢, 因為已經習慣咗! 但至於雞呀、牛呀或燒烤嘅嘢就食少少囉! 份量唔算多, 我同我個中醫講, 佢都話我平時都幾乖, 幾日去玩就唔好就住就住, 所以我就好放心盡情咁去任食幾日啊!

    回覆刪除
  3. Shirley :              咦 ~ 寫到返 "香港"  , 我未開始睇架 , 今個星期日一鋪過煲晒佢 , Yeah ~   
    Bye Bye !
    P.S. : 好高興妳可以玩得咁開心 .  
    [版主回覆07/30/2011 15:11:00]慢慢嚟, 個blog唔會走咗去啊!

    回覆刪除
  4.  當日 . . . 領隊見到佢無錢交酒店費同嚟緊個星期嘅生活費,就借咗十萬円比佢,當住咁多團友數錢比佢,我諗佢係想我哋幫佢做個證明,佢真金白銀咁借咗十萬円比佢啊! . . . 有無寫借據 ? 有無簽收 ?  公司話無責任同佢揹哩條數 . . . 系正常架,   因為, 領隊完全唔應該自己攞錢出嚟. 因為, 咁會變成自己責任; 應該先匯報公司, 再由公司聯繫團友嘅家人 (報名時要留的) 如果嗰個家人OK, 公司會按保險程序做嘢(公司自己一定有保險). 如果嗰個家人唔同意, 公司可以轉介香港入境處跟進, 同交帶領隊嘅責任 . . . 唉, 嗰個妹妹仔出得嚟玩都唔太細啦. 唔可能自己唔負責 . . . 不過, 個領隊如果真系遇人不淑 . . .唉, 真系愛莫能助
    [小肥回覆10/09/2011 09:01:29]歡迎光臨火星 ^O^.
    [版主回覆07/30/2011 15:37:00]佢無寫收據呀! 因為原定計劃係完咗outlet嘅行程先同佢分手, 點知食完餐飯佢話好唔舒服唔肯再行, 咁個領隊又見夠鐘要出車, 所以就當住我哋大槪十個人到, 數錢同話係借比佢, 所以只有我哋同佢做證啊! 領隊同我講因為當時喺日本嘅時候, 佢家姐不斷咁求領隊一定要幫佢細妹, 而個妹妹仔又一個無助樣, 講真連我自己都有啲心軟咖! 不過見佢身邊個friend口口聲聲話要留返啲錢去outlet買嘢都唔肯借錢比佢, 咁我哩個平水相逢嘅團友又好似無理由我借比佢啫! 而家旅行社就係話領隊責任係通知佢屋企人, 至於佢無錢, 就叫佢屋企人自己匯錢比當時人, 可能哩個領隊經驗尚淺, 佢返嚟香港做領隊都未夠一年, 所以我只能同佢講, 如果事情真係發展到佢要去報警嘅時候, 我可以做嘅係唯有幫佢做證佢的而且確借咗錢比哩位妹妹仔囉! 其實我覺得應該係一場誤會啫,  講真哩個團嘅團費都唔平, 既然佢屋企有錢比個女去旅行, 無理由咁cheap借咗錢唔認數, 反正到而家都隔咗成兩星期, 領隊都無話要我幫佢做證, 我諗事情都應該解決咗啊! 希望佢今次上咗寶貴嘅一課啦! 你講得啱呀! 個妹妹仔其實都成二十歲人, 但就真係好似無咩責任感, 樣樣都指望有人幫、有人照顧,淨係講次次遲到, 一句無帶手錶或唔記得時候就算, 一啲歉意都無咖! 出得嚟玩連哩啲基本責任佢哋都唔識/唔理, 都唔好指望佢可以負責其他嘢啊!

    回覆刪除
  5. 唉呀,好吸引(尤其係個RESORT)....點算呢...超晒BUDGET啦今年已經..
    [版主回覆07/30/2011 22:08:00]我都係哩個trip超晒呀! 而家到10月嗰兩個星期假都唔知點算呀!  真係分分鐘到時要留喺香港發霉呀! 不過哩次嘅旅程又真係物有所值, 好正、好叹relax!! 唔怕啦! 而家諗吓先! 通常諗諗吓就可以成行咖啦! 自遊行一定會重好玩呀!

    回覆刪除
  6. 喂 - - 我過咗去啦. 舊POST都系番度. . .系唔見咗你地啫 同埋呢D . . .表情多多嘅符號 你地過咗嚟就要 ;P 先得
    [版主回覆08/03/2011 21:57:00]我去咗你到睇過啊! 好似都唔錯咁喎! 但我對啲新嘢都係有啲抗拒呀! 都係再睇定啲先! 不如你試多啲然後比啲意見我哋吖!

    回覆刪除
  7. 幾靚喎~
    [版主回覆08/07/2011 14:33:00]係呀! 好多人都圍住嚟睇佢畫呀!

    回覆刪除
  8. Shirley :            總算睇完呢個精彩行程 ,        去旅行要做埋褓姆 , 真係唔好彩 , 不過點都唔夠位領隊咁黑仔 , 唔借錢俾佢 , 返 "香港" 佢可能周刊唱衰你 , 借錢俾佢 , 攪到自己好似大耳窿收數咁 , 做呢D客 , 真係前世唔收 .  
    俾我既話 , 佢借10萬 , 我還夠廿萬 , 仲要上去公司表揚佢傑出員工獎添 .  
    Bye Bye !
    [版主回覆08/07/2011 19:55:00]我聽到佢同我伸訴嘅時候, 真係覺得佢好無助, 但除咗話可以幫佢做證, 其他我都無能為力啊! 不過好彩佢都收得返, 但就比公司丙咗獲囉! 我諗以後有咁嘅情況, 人哋真係須要幫忙, 佢都唔會再幫人囉! 真係累街坊呀! 你真係好勁呀! 真係一口氣睇晒! 多謝捧場呀!

    回覆刪除
  9.  點都好啦. 總算解決咗, 訓得安樂就好了.
    [版主回覆08/10/2011 07:30:00]係呀! 大家都瞓得安樂啊!

    回覆刪除
  10. 那些玻璃窗上的圖案真的很美啊
    [版主回覆08/10/2011 07:32:00]我睇住佢畫睇到入晒神呀! 佢最勁係有啲日文字, 因為佢喺係裡面畫但出面睇, 所以佢寫字時係要將啲字反方向寫, 但一樣咁靚啊! 我即場想鼓掌呀! 不過好似好白痴咁呀!

    回覆刪除
  11. -/好彩領隊收得番d錢~ 
    [版主回覆08/10/2011 07:35:00]係呀! 開頭真係戥佢擔心, 一片好心幫人但搞到自己咁麻煩, 但總算收得返, 日後真係有人要幫, 我諗佢都唔會再幫啊! 真可惜呀!

    回覆刪除
  12. 有時真是好人難做,很諷刺。
    [版主回覆08/28/2011 13:36:00]係呀! 我都好戥個領隊唔抵咖! 幫多人多謝都無句, 重搞到自己一身蟻, 好彩最後都收得返, 如果真係搞到要報警就真係好無引啊!

    回覆刪除
  13. Pandora 香傭講法文2011年8月28日 下午8:37

    nice trip^^
    [版主回覆08/29/2011 15:37:00]Merci beaucoup ^v^

    回覆刪除
  14. 有借有還先係上等人 ~ 最憎啲人借錢唔還 !!
    [版主回覆08/29/2011 18:43:00]我都係咁話, 尤其嗰啲有能力都唔還嘅人呀!

    回覆刪除
  15. (Empty)
    [版主回覆09/11/2011 10:56:00]Thanks, Sandy!! 中秋節快樂呀!

    回覆刪除
  16.  中秋節快樂 !!! 食多D, 開心D.  
    [版主回覆09/13/2011 15:43:00]Thank you!!

    回覆刪除
  17. 嗨, 最近還好嗎? 好耐無見你出現.
    [版主回覆10/09/2011 08:09:00]多謝你關心啊!!因近哩一、兩個月工作實在忙,每日放工返到屋企只係有能力,食個飯、沖個涼後就好去瞓,所以都無咩上網去探吓你哋啊! 係喎!你應該去完立山黑部返嚟喎!等我去你到睇吓靚相,提提神先!

    回覆刪除