2013年5月17日 星期五

Day 5.1 @ 平湯溫泉、上高地

2013年4月26日 雨/雪天
08:40~09:40 |
濃飛巴士 | 高山濃飛巴士中心 → 平湯溫泉
11:00~11:25 | 飛驒環保巴士 |平湯溫泉 大正池15:00~15:25 | 飛驒環保巴士 |上高地 平湯溫泉
(交通收費及詳細資料請往交通篇)
酒店:平湯館生粋源泉の宿


哩朝本諗住一早起身去浸過溫泉後就到高山嘅宫川朝市,點知我哋浸浸吓溫泉竟然行雷閃電喎!所以最後我哋決定既然落雨就不如唔行朝市,早啲坐車去平湯溫泉。

首先去巴士中心將第一日買嘅「奥飛騨」・「上高地・奥飛騨」まるごと・バリューきっぷ換成乘車劵。


套票要喺使用當日先可以換到,我前一日去換都唔到啊!

換咗之後就等上車,我哋會坐8:40開出前往新穗高ロープウェイ嗰班車。

夠鐘上車。

全間車都係得十個八個人。

一個鐘頭就去到平湯溫泉。

天陰陰,落緊雨,一落車就覺得好似開咗好大冷氣,凍咗好多啊!

於是就即刻開喼換返啲厚衫、褲,點知嗰刻先發覺個喼嘅較位爛咗。即場呆咗,哩個喼重係問人借咖咋!好彩我一向都有用行李帶,如果唔係都唔知點算。

好.....唔好理咁多,扎住佢先。著好晒衫就先將行李攞去平湯館放底先。話時話我又估唔到平湯車駅竟然有Wi-Fi,就連喺條溫泉街行嘅時候都可以接收Whatapps啊!

入到酒店,我都未開口,櫃台嘅台灣姑娘已經先開叫我,我奇怪點解佢咁叻,原來佢話我哋係哩日唯一嘅香港散客,台灣姑娘旁邊有個日本叔叔一直企喺佢隔離,指點佢做嘢,當然同我哋溝通就由台灣姑娘負責,佢同我哋講哩日入住嘅人比較多,所以免費提升咗我哋嘅房間由普通和洋室去特別室。面積會大一陪同埋有浴室同洗手間。酒店詳情請到平湯館生粋源泉の宿

放底行李後行返出去平湯車駅坐11:00班車到上高地。幾個字就到達咗大正池。



大正池旁嘅大正池飯店

落咗車都一直落雨,我哋停留咗一陣希望可以等個天清返啲,但好似只有越嚟越差,咁大家唯有攞齊雨具繼續前進。

蒙查查嘅大正池

真係有啲失望啊!但哩一刻所見嘅景都好靚,不過現場係好大風好凍。

由於落住雪雨,地面都幾滑,所以要步步為營。



有時會一陣大風吹埋嚟就會帶嚟好大粒嘅雪雨,又要擔傘,又要影相,真係有啲狼狽呀!

越行雨好似越大,因為重要行個幾兩個鐘先可以去到車駅,條褲防水,風褸都OK,但就怕對波鞋濕咗,因為對腳濕咗個人就好容易覺得凍,所以我哋就攞啲膠袋當襪著。哩一刻真係凍到陣呀!




行到嚟湖邊真係好想行出啲睇吓,但風實在太大,幾次把傘都吹返咗。




放段片等大家睇吓當時嘅大風先。
想再行落去,但因為條路夾雜住雪,有啲重係冰,好滑好危險,再加上湖邊真係好大風,我哋決定放棄沿住河邊行。


我哋行返出馬路,沿住馬路行去上高地巴士駅。
你兩個做咩行咁快唔等我呀!




其實沿途啲風景都幾靚咖!



唔知行咗幾耐就見到上高地溫泉酒店。


再繼續行,落落嚟嘅已經唔係雨雪,而係雪,從來未見過落咁大雪嘅我哋,雖然天氣咁惡劣,但反而覺得好興奮,好好玩。




把傘面舖晒雪


啲雪落咗喺衫袖上面都唔溶呀!

由於我哋行嘅係條車路,好多時都有啲巴士經過,所以都要好小心行,不過啲車去到我哋身邊都會慢駛。


最後行咗兩個鐘終於嚟到上高地車駅,本來出去河童橋,但大家都覺得好凍,又真係好大風大雪,出到去都係影唔到啲咩,所以最後以車駅為終點唔再行啊!所有今次睇唔到嘅景點留返下次吧!上高地我一定會再返嚟啊!


去咗車駅旁洗手間整理一吓,哩到嘅洗手間係少有嘅要收費,但我見啲日本人自己都無比,所以我都無比啊!
跟住就去咗車駅唯一嘅餐廳食晏。


選擇唔多,一版見晒,因為覺得好凍,感覺要食個熱辣辣嘅麵先得。

所以叫咗個山菜Soba,其實無咩味,不過又餓又凍就都OK啦!


B女就食豬扒飯。



多謝承惠2,800円

食飽行吓手信店就坐3:00嘅巴士返去平湯溫泉。






here





















5 則留言:

  1. 上高地的確靚到冇得頂!
    [版主回覆05/19/2013 09:57:39]可惜我哋遇著唔好天, 好多景都睇唔到。

    回覆刪除
  2. 附近仲有個「白骨溫泉」超正!但名氣似乎沒「上高地」般有名氣。
    [DM回覆05/19/2013 17:44:14]http://www.kamikochi.or.jp/facilities/stay/
    [DM回覆05/19/2013 17:36:44]我未去過「白骨溫泉」,但感覺不錯。上高地大正池冇得頂,天氣好步行到河童橋非常不錯!明神池只可步行過去,要收費。但絕對值得一看。
    [版主回覆05/19/2013 10:01:26]啱啱睇咗資料, 真係好正喎! 等我抄底佢, 列入下次嘅行程先。多謝你嘅提意呀!

    回覆刪除
  3. 建議你買埋對防水透氣既運動鞋吖,好好用架。
    [1733回覆05/19/2013 21:53:14]呢D防水透氣既運動鞋在香港落雨時候著就最正。唔洗整到對襪濕晒,返工既時候都舒服好多架。超正架。
    [版主回覆05/19/2013 21:07:27]我平時好少著運動鞋, 而家真係要諗諗啊!

    回覆刪除
  4. [版主回覆05/20/2013 19:45:44]每人行八個鐘呀! --> 係每日行八個鐘
    [版主回覆05/20/2013 19:42:47]其實今次行嘅時間都係一般, 返而係搭車搭得多, 而且上高地如果好天慢慢行, 三四個鐘真係閒閒地, 我見有啲人都行五六個鐘咖!
    我上次喺富良野每人行八個鐘呀! 嗰次真係行到腳疪呀!

    回覆刪除
  5. 真係好大風大雨大雪呀~ 另因能見度低, 睇唔到遠方嘅雪山景, 有D可惜~
    [版主回覆05/30/2013 12:55:18]係呀! 同你睇嘅真係兩回事啊! 唯有寄望下一次啦啦!

    回覆刪除