2013年5月7日 星期二

Day 2.5@ 室堂 - 雪の大谷

2013年4月23日 陰天
07:16~08:13 | [JR]大糸線 糸魚川方面(下り) 
松本 → 信濃大町
09:05~09:45 | 
巴士信濃大町 → 扇沢10:00~10:16  | 關電隧道無軌電車扇沢 → 黑部水庫10:16~11:30  | 步行黑部水庫 → 黑部湖11:30~11:35  | 登山纜車黑部湖 → 黑部平12:10~12:17  | 立山架山索道黑部平 → 大觀峰13:00~13:10  | 立山隧道無軌電車大觀峰 → 室堂 
(交通收費及詳細資料請往交通篇)
酒店:ホテル立山 (Hotel Tateyama)

經過成朝不斷咁轉車、轉車再轉車後,我哋終於喺十二點九成功到達室堂。

室堂車駅非常
非常之多人。



立山車駅唯一嘅食堂位於立山酒店內,可能正直午飯時間,門口排咗好多好多團等開飯。好彩我無諗住喺到開飯啫!


穿過重重嘅人潮後,我哋就到咗哩晚要入住嘅立山酒店。酒店外同酒店內好似兩個世界,無晒人潮啊!



因為未夠鐘check in ,我哋先喺酒店放底晒身上嘅負擔(手提行李)後就急不及等向雪之大谷進發,原先計劃等到五點跟隨酒店工作人員行雪之大谷,而家唔同啲團迫住,但因為哩一日嘅天氣唔係幾好,個天開始蒙蒙哋,我驚晏咗會落雪,到時就咩都睇唔到,始終山上天氣難測,我試過喺瑞士少女峰諗住食埋個包先出去睇冰河,點知幾個字後就大風大雪,有哩個教訓後,今次我唔敢再怠慢呀!拿拿臨出發嘞!


車駅對出有雪兜免費比遊人玩,我都玩咗次,好好玩呀!


大谷,我嚟啦!



條雪路全靠哩啲鏟雪車啊!




哎呀!比人影咗我同B女入鏡添!




今年雪壁有18米高,比舊年高咗2米呀!




我初初以為佢哋係林林哋,原來好堅挺咖!


我嘗試喺雪壁上刻個message比blog友1733,因為佢跟住嗰日會到,我用B女嘅行山杖刻,但冰面真係好硬,我只係刻咗 "TO: 1733" 就放棄咗啦!因為我驚整爛B女枝行山杖無得用呀!







好壯觀呀!睇人哋啲相睇得多,當自己去到好似發夢一樣呀!





轉出咗雪大谷後,就見到好靚嘅雪山境啊!

可以望到遠處嘅溫泉酒店呀!


有啲巴士停泊咗喺雪牆旁邊




比起之前大谷嘅馬路,哩條雪路滑好多,行起上嚟要好小心。

所以我同B女都著返對喺雪上行嘅防滑鞋底。



我強烈推介哩個鞋底。黃色膠下面有粒鐵釘,每隻五粒,著咗上去嘅哩啲冰面行真係唔滑咖!好多年前去北海道時喺旅行社買,後來去少女峰都帶埋佢去,今次緊係唔少得佢啦!我重見喺室堂車駅嘅手信店有得賣呀!1050円一對。


哩到比人好乾淨好舒服嘅感覺啊!


雖然天陰陰,但行起上嚟一啲都唔凍,所以我哋玩到除晒外衫,瞓晒雪,大笨蛋重除剩件短袖T-shirt添呀!

繼續向車駅進發


望返轉頭原來行咗好遠啊!


真的好美啊!


山上好多人滑雪,留下好多條雪痕。


我哋喺雪壁逗留咗個幾兩個鐘就返到去車駅啊!


最後待到巴士經過雪壁呀!不過唔係喺最高點,所以感覺唔到雪牆有幾高。

6 則留言:

  1. 雪の大谷兩傍雪牆很高呢!
    我們去年五月中旅遊時最高亦只剩15M.

    [版主回覆05/08/2013 20:34:17]舊年最高時都係16m, 你五月中去有15m都差唔多啊! 而且現場睇真係震撼好多啊!

    回覆刪除

  2. [版主回覆05/08/2013 20:36:01]

    回覆刪除
  3. 睇嚟我要自由行吋嚟多次先得 ,真係睇多好多嘢呀
    [版主回覆05/08/2013 20:39:19]我本來見啲交通咁複雜, 都想跟團算, 但見佢哋啲時間好趕, 所以最後都係自己去, 真係正好多。立山咁靚嘅地方, 有機會去多次都唔錯啊!

    回覆刪除
  4. 見到你哋可以係雪之大場落車行, 勁羨慕~
    我個日落大雪只能搭車穿過雪之大場~ 但, 都好過第二日嘅人, 據聞第二日太大雪, 雪之大場條路封了, 全團要折返~
    [版主回覆05/09/2013 12:41:25]我係由大觀峰方迥去室堂, 所以我唔係坐高原巴士去室堂,(第二日先坐高原巴士穿過雪之大谷去美女平)
    只係搭巴士穿過雪之大谷, 咁真係好可惜啊! 其實我都好擔心天氣唔好要封山, 所以我寧願比貴啲嘅酒店費都要喺室堂住一晚, 因為如果真係天氣唔好, 起碼重有第二日嘅機會囉!
    我都勁羡慕你上高地, 大正池啲境咁靚, 遲啲我寫到上高地嗰part你再過嚟睇吖, 咁你就知我有幾羡慕你啲靚相啊!

    回覆刪除
  5. 我在雪之大谷睇唔到你在雪牆上有寫上TO 1733噃?
    [1733回覆05/10/2013 21:39:59]我地事前無約到,但大家都諗到寫低D野比對方睇。
    哈哈,不過就大家都睇唔到囉。
    [版主回覆05/10/2013 21:20:22]唔夠力寫, 寫得好淺色咋! 所以影咗張相都睇唔到呀! 真失敗呀!

    回覆刪除
  6. 大雪酒店有提供雪鞋及手杖借,你地有無借到呀?
    [1733回覆05/12/2013 20:54:13]我地就乜都無,又無去借。D團友就在雪地上行得好辛苦囉。
    [版主回覆05/12/2013 20:22:50]我知佢哋有得借, 但因為B女自己有行山杖, 我哋又唔使用, 同埋又有帶防滑鞋底, 所以咪無同酒店借囉!

    回覆刪除